《愛在。貴族學園》: Ch 28 ~ 唯一 Part 1

Ch 28 ~ 唯一 Part 1（連載日期：2024/03/24）

就喺幾分鐘之後，韻喬隻左手就繼續挽住俊軒嘅右手手臂，一齊上到張家所在嘅樓層，二人徐徐行到張家門口。

而喺屋裏面，都傳出電視嘅聲音，韻喬就知道兩老都可能喺屋企裏面，所以都唔可以畀俊軒喺度搞太耐。

而俊軒都好識做，所以想將韻喬帶離張家門口有少少遠嘅地方，然後就好溫柔同韻喬話「好啦喬喬，你返到啦，我就送到你嚟呢度啦！記住呀，一陣唔好溫得太過辛苦呀！我會心痛咖，知道未呀？」

韻喬面上再一次泛紅，輕聲道「我知道啦小軒，你呀，今晚都唔好咁夜訓呀，知道未呀？聽……」





俊軒冇等到韻喬講完呢句說話，就一手將韻喬拉入自己嘅懷抱入面，感受住愛人嘅體溫。

韻喬於是都將自己個頭，挨去俊軒嘅心口上邊，佢可以好清楚咁感受到自己同俊軒嘅心跳。

之後，韻喬就感受到俊軒輕輕一吻喺自己嘅頭髮上，感到非常安心、溫暖，同時都感覺到，俊軒係真心愛自己，先會對自己咁好。

或者，自從喺郭氏party之後，韻喬其實就已經覺得，俊軒嘅懷抱係自己嘅避風港。

「小軒，你做咩突然之間咁嘅樣呀？你唔開心呀？」韻喬之所以咁問，係因為佢喺抬起頭，對俊軒微笑嘅時候，見到俊軒突然收起咗笑容，然後完全唔出聲，只係眼紅紅咁，默默咁攬住自己。





俊軒初時並冇出聲，只係繼續緊緊抱住韻喬。而韻喬都感覺到，俊軒心跳突然之間變得好亂，就知道對方心裏面一定有事發生，所以就即刻問俊軒「你有咩就講出嚟啦，我係你女朋友嚟咖，有咩事唔係都應該要講出嚟一齊面對咩？而且，你講出嚟嘅話，個心都應該會舒服啲咖！」

面對韻喬已經將自己睇穿，俊軒一來都好驚訝。但同時既然韻喬都開到聲，叫自己同對方分享咩事而突然間唔開心，所以俊軒都好難得咁感性起嚟，同韻喬講到底發生咩事「因為……我真係唔想你，只可以同我喺埋一齊十四日咁少…」

「如果可以嘅話，我好想可以同你，永遠咁喺埋一齊。真係…..真係好想永遠咁一齊，然後冇人可以分開我地兩個。」

講講下，俊軒隻眼已經紅哂。好明顯，俊軒都係因為再忍唔住，頭先喺收到林太嘅Signal之後，心裏面所引起嘅猜測。不過，俊軒都係冇同韻喬交代一陣要去太古廣場嘅事。

「傻瓜，你覺得依家嘅我……我會唔想同你永遠都喺埋一齊咩？」韻喬見到俊軒咁樣，於是自己都忍唔住，雙眼嘅淚水開始湧出，再將原本放喺俊軒胸膛上嘅雙手，改為環抱俊軒嘅腰間。





「自從經過我地“見家長”嘅飯局，到後來我病咗入醫院，直到我地上次喺學校圖書館嘅事，我都開始發現經過你嘅改過，自己慢慢去接受你，同開始對你有好感，而且仲要越來越強烈…」

「我真係好憎自己，點解對情感呢樣嘢嘅感覺會咁慢！我好憎我自己，點解我明明鍾意咗你咁耐，但我居然可以一啲都唔知，自己喺呢一連串嘅事嘅時候，已經慢慢鍾意咗你！」
 
「嗰啲咩理智、咩自尊，咩自然嘅反應，原來全部都係耽誤我同你之間嘅情感，我依家真係真係好憎好我自己！我好後悔點解要咁遲先要同你一齊呀！」
 
「嗚嗚嗚！對唔住呀小軒！我真係好冇用呀，我睇埋咁多愛情小說，應該都要早啲去意識到呢樣野，而唔係等黃同學出手先要同人爭呀！」韻喬越講越激動，淚腺亦都瞬間大爆發。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer