《愛在。貴族學園》: Ch 27 ~ 第一次約會 Part 6 & 7

Ch 27 ~ 第一次約會 Part 6 & 7（連載日期：2024/03/17）

「小喬呀，唔通你忍心睇住我掛住你咩？」

韻喬當然唔會咁容易屈服啦，面對俊軒施以扭計魔法，先是白眼反上天，然後用俊軒一樣嘅語調去反駁俊軒「小軒呀，咁唔通你又忍心睇住我熬溫夜書，然後溫到直接趴喺張書枱上面訓著啦喎？」

俊軒見到韻喬扮自己之後都好快破防，而且自知理虧。其實又唔可以話理虧嘅，只不過俊軒感到有少少難為情，於是好細聲話「咦，你之前唔係已經溫咗聽日quiz嘅嘢啦咩？做咩又溫多次呀？」

「小軒呀，就算我之前已經溫咗幾次都好，都要做多次revision先得咖嘛！如果唔係嘅話，我點知自己係咪真係記得哂啲嘢。小軒你就乖啦，聽日你返到學校之後，你咪又係會見到我咖啦！」韻喬一邊氹俊軒嘅同時，無意中透露自己成績一直畀對方好嘅方法。





「原來你一直用呢個方法去溫習，唔怪得成績一直比我好啦！」俊軒知道咗之後就摸一摸韻喬額頭「果然我女朋友真係叻豬。不過呢，一陣可唔可以喺訓教之前，同我傾一陣電話呀？」

韻喬一諗到自己依家就好似愛情小說裏面嘅幸福女主角咁，夜晚可以同男朋友傾電話嘅時候，心裏面就即刻覺得甜甜的，於是就話「好啦好啦，知道啦，知道你好掛住我啦，咁我今晚就同你講一陣電話先訓啦。」

「不過呀！你依家就要聽你女朋友我話，快啲同我返屋企，處理咗你啲緊要嘢先，等我溫完書之後先同你講，如果唔係，就唔同你個衰人講電話咖！知道未？」可能俊軒都估唔到，大家都只係第一日喺埋一齊，韻喬咁快就開始食住自己。

所以俊軒聽到韻喬嘅狠話之後，就即刻嚇到成個震一震「嘩！小喬，你第一日同我一齊就食住我啦！？好啦，咁我等陣就返屋企啦。不過呢，我依家都仲係唔捨得放開你隻手啊，點算啊點算啊-><-？」冇錯，俊軒依家仲係拖住韻喬隻手唔放。

但喺韻喬聽到俊軒又一次喺度扭計之後，就再一次反白眼，然後好強勢咁話「係呀衰人！我依家擺到明係食住你咖啦林俊軒，係咪唔得呀！？仲有呀，我同你講你唔好太過分啦下！咁你依家到底想點呀！？應承咗你今晚陪你講電話，你又唔肯返屋企，真係吖！」





雖然又畀韻喬閙，但俊軒都覺得值得，於是就好細聲咁喺韻喬耳邊講「冇呀，我好簡單咋嘛，就係想……親口聽你講一次我愛你之外，我冇其他要求啦！」

韻喬聽到之後，就覺得對方得寸進尺而好過分，於是就想用力甩開俊軒拖住自己嘅手。不過因為俊軒拖得實在太實，韻喬雖然已經花唔少力氣，去試圖鬆返開自己隻手，不過俊軒實在將韻喬緊緊握緊，所以到最後俊軒依然都係將韻喬拖住咗。

「喂呀！死人頭你整到我好痛呀！！點解你可以咁大力都有咖……鬆極都鬆唔開都有嘅！？」韻喬見俊軒捉到自己痛到死，而對男朋友抱怨道。

不過俊軒完全冇要放手嘅意思，反而仲露出一個奸笑嘅表情對住韻喬講話「嘿嘿嘿小喬！如果你肯講嘅話，我咪放開你囉，然後喺返屋企搞掂啲嘢之後，陪你講電話囉……」

韻喬即時紅都面哂，不過今次韻喬雖然都有停一停諗一諗，但係好快就耷低頭，好細聲對住俊軒講「我愛你……」





隨住韻喬終於開金口，俊軒於是都笑逐顔開「我林俊軒等咗咁耐，終於可以喺你口中，聽到你對我講呢三個字！我真係好……好感動！嘻嘻我都愛你啊，張韻喬！」

韻喬見到俊軒如此反應表示極度無奈，感覺自己已經畀俊軒呢個極度中二嘅男朋友玩到陀陀令。兩個人之後都冇再點講野，就on99咁拖住對方嘅手，企喺條街度，冇嘢做之餘但係又喺度陪住對方咁。

「夜啦小喬，我都係陪你返上去先啦，廢事有人趁我唔喺度，flirt走我個小喬！」面對俊軒突然之間開口咁樣講，韻喬雖然都好想俊軒送自己上樓。

但係韻喬心裏面怕畀父母撞破，所以就唔係好願意話「唔使咁麻煩啦，而且我邊會咁容易就畀人追走喎！你就早啲返屋企，早啲陪我講電話啦，好嗎？」
 
之後韻喬就試圖推俊軒走，但試問一個女仔，正常又點會推得郁一個男仔呢？結果韻喬再一次出盡九牛二虎之力，但俊軒依然都成尊佛咁站立原地，而俊軒就喺度偷笑。

「哈哈，推唔郁我呢！因為陪你返上樓係我嘅特權，係作為小喬個男朋友嘅特權！邊個都唔可以阻止我咁做咖啦！！」俊軒偷笑完，就講咗呢句說話，如果身邊有天殷同禮謙喺度嘅話，佢地應該都會畀俊軒同韻喬閃死。

面對俊軒如此肉麻咁宣示主權，韻喬都非常難為情，面紅紅話「哎呀，你講到咁…我真係怕咗你啦，好啦好啦，畀你送埋我上樓啦！以後唔可以再咁樣扭計啦！聽到未啊！」

「嘻嘻！咁你帶我行啦！」俊軒嘅計劃就係咁成功咗，而韻喬就拖住俊軒入去大廈裏面等lift。




 
同一時間，林太send咗個signal畀俊軒。俊軒feel到自己個電話震一震，知道有人搵自己，於是就趁韻喬唔為意嘅時候，睇下邊個搵自己，内容如下

「媽媽：小軒，依家屋企兩架車都用緊，一陣你同張小姐去完拍拖之後，自己坐的士去金鐘太古廣場等我，我有嘢要同你睇         20:45」

俊軒見到林太個message之後，就因為仲同緊韻喬一齊行，而冇覆到林太。

但俊軒喺心裏面，就覺得好奇怪“到底我媽做咩要我出去睇嘢呢？要去金鐘太古廣場，好多名店喺度，媽媽又會突然之間想我點呢？唔通真係？”

俊軒心裏面越諗就越亂，自己嘅直覺就覺得，林太係為咗自己同嘉惠兩個禮拜之後嘅訂婚禮，而出去同自己睇定珠寶首飾，所以心裏面就有各種唔開心同難過。

因為林太嘅行為，再一次提醒自己，自己同韻喬嘅情侶關係，只可以維持兩個禮拜嘅時間。

但係，俊軒又唔想眼前嘅韻喬，見到自己唔開心嘅話，就會開始亂諗，甚至因為咁樣為自己而流淚。





所以，俊軒都係選擇暫時強忍即將分離嘅痛苦同對未來嘅不安，諗住等送咗韻喬返入屋之後，先自己一個再將壓抑已久嘅情緒爆發。

（Ch 27 第一次約會 ~ 完）

IG link https://instagram.com/bear_big_big_writer