《愛在。貴族學園》: Ch 27 ~ 第一次約會 Part 5

Ch 27 ~ 第一次約會 Part 5（連載日期：2024/03/12）

韻喬喺見到大熊大之後，就好似個大細路咁叫「熊大、熊大！」，然後兩個人喺熱心路人嘅幫助之下，就同line friends store出面嘅巨型熊大、熊妹影咗唔少相。

俊軒見到韻喬咁開心之後，自己覺得眼前嘅韻喬，都同平時喺學校嘅韻喬有唔同，而且都覺得呢個韻喬嘅性格更加真實。

而韻喬仲睇中咗少少精品，包括一隻豬熊大公仔，不過韻喬都係自己睇下，然後就有少少失望咁，將佢地放返低喺貨架上。

俊軒暗暗見到呢一切之後，就知道韻喬想買嘢畀自己，作為一位稱職嘅男朋友，俊軒就即刻趁韻喬去洗手間嘅時候，自己就拎咗韻喬頭先睇中嘅豬熊大公仔，同埋少少精品同文具，就去收銀處度畀錢。





但係，當韻喬返到去搵俊軒嘅時候，就見到俊軒手上拎住一袋嘢，韻喬就即刻反俊軒白眼，然後想質問俊軒「林俊軒做咩你……」

「冇呀，頭先喺見到你摸一摸隻豬熊大公仔同埋啲文具之後，你就好失望咁放低，所以我就覺得你係想要…」

不過，似乎韻喬唔係好接受俊軒嘅解釋，但其實又畀俊軒睇穿咗自己，於是就反駁話「咩呀！？我都係想自己睇下咋嘛，又唔係真係一定要買，你喺度浪費埋啲無謂嘅錢！你知唔知你父母賺錢賺得好辛苦咖？」

「咁你明明就係想要隻公仔，但係你就話自己只係睇下。如果你真係只係睇下咁簡單嘅話，咁點解你放低嘅時候，你個表情會咁唔開心嘅呢？」俊軒喺鋪頭外面反問韻喬，不過韻喬今次真係答唔出……

「咁係因為你心底就好想要嘛！既然女朋友想要，做男朋友又有能力嘅話，係咪應該要買畀女朋友呢？而且，今日係我地第一日喺埋一齊，就當呢度裏面隻豬熊大公仔，係我送畀你嘅第一份禮物，好冇？」





「所以……請你收咗佢啦！」韻喬於是就冇再講嘢，隔咗一陣之後就話「既然你都講到咁，咁我就收咗佢先，多謝你！」

「唔好客氣啦，而且男朋友買禮物畀你，都係應該要做嘅！」俊軒好溫柔咁答返韻喬。

「好啦小軒，我真係要返屋企啦，今日玩咗好耐啦！」韻喬終於又一次催促俊軒，自己要返屋企。

於是俊軒就提議話「咁好啦，我送埋你返北角啦！」於是喺俊軒安排自己司機去北角等之後，就同韻喬去對面Sogo門口，等巴士返韻喬屋企。

雖然巴士上面嘅乘客都唔少，不過都好好彩佢地有位坐。但正常一個星期日晚，銅鑼灣一帶都唔會點塞車，所以唔使20分鐘，兩個人已經返到韻喬屋企樓下。





不過林家嘅司機話要車林太出去外面，要遲少少先可以去北角接俊軒。

「哎呀，點解今次咁快就返到嚟北角咖！？小喬呀，我地可唔可以再夜少少先返上去呀？」俊軒見巴士咁快返到北角，自然唔捨得同韻喬講再見「而且我都唔明，點解嗰日由學校，搭巴士返嚟要咁耐，但今日由銅鑼灣返嚟就咁快！」俊軒喺同韻喬扭計嘅時候，突然提返起同禮謙一齊送韻喬返屋企件事。

韻喬聽到之後，就到佢嘟嘴啦「唔好咁啦小軒……我都同你拍咗成日拖啦喎，你都仲唔夠呀？！我今日好攰啦，而且都已經夜啦，屋企仲有好多嘢等住你要處理咖！加上我地都仲要溫書呢！你呀都係快啲返屋企啦！如果唔係聽日你邊度夠精神返學喎！？」

俊軒繼續展開扭計攻勢，於是拉住韻喬嘅手，繼續扁哂嘴話「小喬呀，唔通你忍心睇住我掛住你咩？」

（待續 ~）

IG link https://instagram.com/bear_big_big_writer