《愛在。貴族學園》: Ch 26 ~ 好景不長 Part 6

Ch 26 ~ 好景不長 Part 6（連載日期：2024/01/27）

「小軒，其實我依家…會唔會令你難做呀？如果會嘅話，不如我就退出呢場遊戲，成全你同嘉惠同學，將頭先發生嘅事，都當作發咗一場夢，好無呀？而且多謝你畀個機會我同你互相表白…」
 
其餘三個人聽到韻喬呢句之後，都顯得非常驚訝，因為冇諗過韻喬居然會順從嘉惠嘅要求，去犧牲自己同俊軒剛剛開始嘅感情。

而第一個提出反對嘅，當然就係男朋友俊軒……

「唔得啊小喬，如果要我放棄你，同嘉惠一齊嘅話，對我嚟講實在實在實在係太難啦，甚至我可以話我係一定做唔到嘅！而且，我林俊軒都千等萬等，先可以等到呢一日，張韻喬，我同你之前已經浪費咗四年幾嘅光陰啦！」
 




「再加上，難得小喬你終於鼓起勇氣，坦白咁去面對自己嘅愛情，我就更加唔可以放棄你然後同第二個女人一齊。所以，小喬你就唔好當頭先嘅事，係發一場夢啦？可唔可以呀？」

韻喬聽到之後整個人頭耷耷，但好快就再度抬起頭，對俊軒話「我明你嘅意思呀小軒，但問題係，當你最後都要去嘉惠身邊嘅時候，就注定我地一定會分手嘅一日。」

「既然依家都已經知道，我地嘅結果一定會係痛苦嘅時候，咁點解我地依家仲要開始呀？」
 
「如果我地依家仲走去開始嘅話，之後對我唔公平都算啦，咁對你自己都唔公平，對黃同學都係唔……」

俊軒冇等到韻喬講完就馬上反駁「唔會咖小喬！愛情從來都係自私咖，傻妹點解你會諗埋個第三者咖。而且黃同學咁樣做，夾硬將我由你身上搶走，佢咁做何嘗都唔係自私咩？」
 




「而且小喬，其實我知道你之前有睇過<<讓我愛你三十天>>呢本書嘅。一係咁吖小喬，我有一個諗法，不如今次，就等我地兩個，上演專屬於我地兩個嘅“讓我愛你十四天”啦，好嗎？」

韻喬再次若有所思起嚟，然後就想喊話「想，我就梗係想啦！不過小軒呀，我就係唔想你兩個禮拜之後會唔捨得，同埋會傷心，所以我先話唔好開始。因為我怕我地一開始嘅話，十四日之後，就會更加難放手咖啦！」

俊軒即刻緊緊抱實韻喬，話「難放手咁又點呀？小喬唔通你唔記得咗啦？我地係唔應該因為一段感情結束而喊，而係應該以佢曾經發生過而微笑咩？」
 
「反正，我只有呢一次嘅感情咖啦，將來我同黃同學喺埋一齊之後，我就唔可以再同任何其他人，包括你，喺埋一齊。」此刻嘅韻喬都已經被俊軒嘅誠意打動，原先嘅諗法都已經慢慢消失。
 
俊軒於是再繼續深情咁講落去「小喬，我想同你講嘅係，兩個人可以遇上，已經係奇蹟。可以愛上對方嘅話，就更係奇蹟中嘅奇蹟。但當我地能夠未開始就可以做到兩情相悅嘅時候，就更加係奇蹟中嘅奇蹟嘅萬分之一。」
 




「我地兩個既然可以相愛，咁即係話，呢個係上天賜畀我地嘅奇蹟，即使依家遇上好大嘅考驗，我地唔係更加應該去珍惜，而唔係因為害怕傷害而拒絕咩？」俊軒呢番話，令到其他三個人一時間完全駁唔到，因為都深受俊軒嘅感動。
 
「嘩！估唔到林俊軒你……你可以咁浪漫喎。喬喬呀，你就趁呢段時間，同小軒好好過呢兩個禮拜啦，做一對幸福嘅小情侶啦，好嗎？」天殷都已經聽到眼濕濕。

韻喬於是就將頭，依靠去俊軒胸前，而雙手就環抱住俊軒嘅腰，哽咽道「衰人！你係都要整喊人咖喎！好啦！既然你都講到咁啦，咁就喺嚟緊呢十四日裏面，我地就好好咁愛對方啦！」

俊軒聽到韻喬親口放棄打消頭先嘅念頭，個人就即刻放鬆哂，於是就話「多……多謝你啊小喬!呢兩個禮拜，我一定會好好照顧你，愛你，寵你，張韻喬，我…愛你呀！」

「唔！我都愛你呀，林俊軒！」之後佢地兩個都忍唔住，喺大家面前輕輕一吻對方嘴唇。

禮謙同天殷見到眼前呢對小戀人咁幸福，都無謂再繼續做電燈膽，於是二人互相微笑打個眼色之後，天殷就話「咁既然係咁，你地兩個就慢慢去拍拖啦，我同禮謙就唔阻住你地啦，拜拜！聽日見啦！」
 
「下？！但就快陸運會啦喎，大家唔洗再去練習啦咩？」韻喬非常好奇咁問天殷，但天殷冇答到韻喬...

「我地會練呀，不過我就係同天殷自己去練，廢事阻住你地兩個呀嘛。咁聽日翻到學校見啦，再見！」





禮謙之後就同天殷離開瑪麗醫院，留返俊軒同韻喬兩個喺度。

但就係一分鐘之後，俊軒同韻喬都收到天殷嘅Signal，俊軒同韻喬睇過之後，就即刻一齊反白眼。

「5A李天殷：恭喜你兩個呀！記的請食出pool飯呀！               13:26」

「李天殷真係誇張呀！佢使唔使咁快呀？」韻喬非常嫌棄咁講。

而俊軒就即刻喺度笑「我都覺得呀小喬，不過天殷為咗令我地可以一齊，喺背後都做咗好多嘢，遲啲我地先再請天殷同禮謙食飯啦！」

「唯有係咁啦！」韻喬非常無奈咁講。

（Ch 26 好景不長 ~ 完）





IG link https://instagram.com/bear_big_big_writer