《愛在。貴族學園》: Ch 27 ~ 第一次約會 Part 1

Ch 27 ~ 第一次約會 Part 1（連載日期：2024/02/11）

（今日係年初二，先祝大家恭喜發財，身體健康，隆景虎猛，步步高升）

就係咁，俊軒同韻喬呢對“苦命鴛鴦”，就開始佢地呢段看似不被上天祝福、只有十四日期限嘅感情。

俊軒將抱住韻喬嘅手由腰間鬆開，改為拖住對方嘅小手，好溫柔咁問「喬喬，你肚唔肚餓呀？使唔使同你去食少少野先？」
 
對於男朋友咁快就改口叫一個咁親密嘅名，韻喬自然面都紅哂，但係就即刻搖搖頭話「我唔使啦，頭先我都喺屋企食完早餐，然後先收到天殷電話咖，傻鬼！咁男朋友你呢，肚唔肚餓呀？」





而韻喬嘅語氣，都變得比一直喺學校嘅時候，更加溫柔。

「我麻麻地啦，咁不如我地出咗去先啦，唔好留喺醫院度阻住人地啦！」二人於是手牽手咁步出醫院急症室。當然，喺離開瑪麗之前，俊軒都已經見完醫生，以及攞埋藥啦。
 
「衰人！乜你都會覺得自己喺醫院急症室，喺度玩埋啲咁無聊嘅嘢，係會阻住人地嘅咩？！」韻喬聽到俊軒嘅說話，即刻鼓起泡腮，而且依家仲可以攞正牌閙下自己個男朋友。

但係俊軒依然笑笑口話「為咗可以得到喬喬你，我就算做咩都值得啦，係咪？」再錫咗韻喬一啖，但韻喬就唔係好受落啦……
 
「死人頭有咩咁好笑啊！萬一人地醫院真係好忙，你地咁樣喺度玩，搞到啲病人嘅時候，你地幾個良心會過意得去咩？！」韻喬就更加大聲去指責俊軒，仲拍咗俊軒嘅手臂幾下。不過俊軒都冇去閃避，任由自己個女朋友去打。
 




俊軒之後就話「係啦係啦，唔會再有第二次啦，所以依家咪要同我個女皇，去第二度拍拖囉！」

「咩女皇呀！我邊有咁霸道喎衰人！仲有吖！我一啲都唔港女啊！」聽到俊軒用女皇去形容自己，韻喬就覺得俊軒喺度話自己喺港女，所以就嘟起個嘴仔扮嬲。

但係，俊軒依然都怕韻喬會肚餓，所以就同韻喬講「嗱，我怕你仲肚餓呀，食住包餅先啦，一陣出到去同你食tea，好冇？」

「好呀……唔該小軒！」於是俊軒就由背囊拎包餅乾出嚟，一邊排隊等小巴一邊同韻喬分享。

當然俊軒都有餵韻喬食餅，但同之前喺林家大宅，“見家長”飯局嗰陣唔同，今次韻喬都心甘情願畀俊軒餵「你真係吖，你做咩食塊餅都可以食到一嘴都係餅碎都有嘅？」俊軒當然都好細心咁，幫韻喬抹走嘴角邊嘅餅碎。而韻喬塊面就怕醜到變得面紅紅咁。





過多一陣，俊軒就同韻喬上到去中環嘅小巴。喺坐低之後，雖然佢地冇再講太多嘅說話，只係靜靜咁拖住手坐喺度，但兩個人都流露住幸福嘅表情。

而俊軒都為鉵等韻喬坐得舒服啲，於是都用手攬住韻喬嘅腰間，韻喬當然都挨住俊軒個身坐。

而且仲趁住小巴後座冇人見到，呢對熱戀中嘅小情人，就偷偷地喺位度，同對方情深一吻起嚟。

當然喺錫完之後，俊軒同韻喬都互相同對方講I love you，再繼續原本佢地嘅坐姿，繼續佢地嘅車程。

好快，小巴就返到中環環球大廈。喺落咗車之後，俊軒就拖住韻喬穿過交易廣場嘅天橋，行去附近嘅IFC，去Lady M排隊食下午茶。

韻喬認得呢個牌子，於是就問俊軒「做咩想同我食蛋糕嘅？」

「冇呀，食蛋糕，甜甜地，唔好咩？」俊軒回答韻喬，不過韻喬就反問話「下？我地依家仲唔夠甜咩？因住我地兩個都會急性糖尿病喎！」

「唔怕啦，我地就係要急性糖尿病呀！」俊軒講完之後，就點一點韻喬個鼻，而韻喬就當然都係甜笑起嚟。





喺被安排座位之後，佢地就叫咗兩件千層蛋糕同兩杯茶，喺享受食物嘅同時，一邊同對方說情話，一邊喺度討論學校嘅八卦同屋企嘅事，而佢地都趁住呢個機會，更加深入咁認識同了解對方嘅性格，畢竟喺學校同係自己嘅另一半，點都會有分別。

而呢對幸福小戀人，仲不時互相餵對方食嘢，完全進入派發強烈閃光彈嘅狀態，基本上身邊嘅人都一定要戴住太陽眼鏡，先可以擋得過佢地散發嘅戀愛光芒。

（待續 ~）

IG link https://instagram.com/bear_big_big_writer