《愛在。貴族學園》: Ch 26 ~ 好景不長 Part 5

Ch 26 ~ 好景不長 Part 5（連載日期：2024/01/06）

「頭先我媽打電話嚟同我講，話我將要同黃嘉惠同學……宣布訂婚。」...

講完之後，俊軒非常無奈咁，用手遮住自己塊面，狀似唔敢面對大家之餘，面上仲有失落嘅表情。

韻喬、禮謙同天殷三個，聽到“訂婚”兩個字，下巴就即刻好似跌咗落地咁話「咩話？！你話你…..要同黃同學……訂婚？！」

俊軒聽到之後就一臉無奈咁，同幾位知心好友確認「係呀。我之前咪話過，今日黃氏一家人會上我屋企傾生意嘅？」





「係呀，咁跟住呢軒仔？」天殷繼續追問落去，皆因韻喬都已經成個人呆咗。
 
「我媽頭先喺電話同我講，話因為黃家借機向我屋企，利用生意去做籌碼嚟施壓，話我一定要同黃嘉惠同學訂婚，黃氏企業先會繼續同我屋企公司做生意。」
 
「如果唔係嘅話，黃uncle話唔單止會即時終止，兩間公司之間嘅所有商業合作，而且仲要追擊我屋企間公司，令到我屋企一無所有。」

天殷聽到之後握緊拳頭咁話「有冇搞錯呀！咁樣要脅人都有嘅！我可以肯定，如果你地兩家真係訂婚嘅話，呢個會係一段冇感情可言嘅婚姻，仲要係完全冇呀。因為你地其中一方，根本都唔鍾意對方，到時候要夾硬結婚嘅話，最後你地都係會離婚收場咋！」

「與其喺將來會有搞到咁核突嘅危險，咁其實就算依家話要咩訂婚、結婚嘅話，都完全冇意思。」同一時間，天殷就拖住韻喬嘅另一隻手，以示同韻喬打氣。





至於禮謙，就由實際角度出發去睇呢一件事「點解黃家突然之間要咁樣去做呢？照道理，黃uncle做生意嘅時候，一向以頭腦極為理性冷靜見稱，不然點解黃氏企業可以做得咁成功？」
 
「而且黃uncle對家人同其他商業夥伴一直都好照顧，事事都由得到真正快樂同互惠互利嘅角度去出發，正常黃uncle肯定唔會畀嘉惠同學，有一場唔幸福嘅婚姻咖喎，但點解今次黃uncle又會畀嘉惠，同小軒你喺埋一齊呢？我唔係太明喎。」

天殷點點頭表示同感「我都覺得好奇怪呀謙謙，所以我聽完小軒咁講之後，我覺得可能黃uncle都係被逼咁做。我估呢，應該都係嘉惠同學喺party上面，見到小軒同小喬一齊，返到屋企之後就同黃uncle要生要死咁扭計，黃uncle可能冇個皇帝女乎，於是就應承嘉惠同學，安排小軒同佢結婚吧。唉，搞到咁，何必呢？」

「小軒，我想問下…林auntie頭先有冇講過，到底訂婚禮幾耐之後會舉行？」禮謙突然之間問及時間嘅問題，而且呢個問題都非常重要，但都居然冇人問俊軒。
 
至於韻喬，由於佢自己出身普通人家，對於上流社會，以及佢地幾家人嘅各種關係都唔認識，所以頭先一直無出聲，默默咁聆聽其他三人嘅對話。





但當韻喬聽到呢個消息之後，内心當然都唔好過。

畢竟自己難得先可以同俊軒一齊，但係就即刻有人嚟搶男朋友，而且仲要係一個好唔鍾意嘅人，去搶自己初戀男朋友，心裏面自然都好唔甘心，於是塊面都變到好黑咁。

「有呀，訂婚禮喺兩個禮拜之後就會舉行，所以我地時間都唔多，而且都因為咁，我呢排都可能會好忙，而且仲有陸運會呢！哎呀諗起都覺得好煩呀！」俊軒突然間感到非常頭痛。

俊軒講完之後，大家都因為唔知可以點做，而安靜咗二十秒。不過，一直冇再出聲嘅韻喬，突然間開口話...

「小軒，其實我依家…會唔會令你難做呀？如果會嘅話，不如我就退出呢場遊戲，成全你同嘉惠同學，將頭先發生嘅事，都當作發咗一場夢，好無呀？而且多謝你畀個機會我同你互相表白…」

（待續 ~）

IG link https://instagram.com/bear_big_big_writer