《愛在。貴族學園》: Ch 26 ~ 好景不長 Part 4

Ch 26 ~ 好景不長 Part 4 (連載日期：2023/12/16）

「聽到啲唔值得開心嘅野，但係又話自己冇事？到底你喺度講緊咩呀？我唔明喎林俊軒，你快啲話我知，到底發生咗咩事啦？」韻喬有少少緊張咁問俊軒。

俊軒當時心裏面好怕，因為如果咁直接同韻喬講，自己要同嘉惠訂婚嘅事，就一定會令剛剛成為自己女朋友嘅韻喬，造成極大嘅傷害，對方甚至有可能會情緒崩潰，又或者要同自己分手去成全嘉惠。

但俊軒自己都好想繼續同韻喬一齊，認為呢件事都仲可以轉危為機，所以自己都應該將呢件事隱瞞。

喺經過一陣權衡之後，俊軒決定繼續作大話，掩飾自己嘅失落，以及可能對韻喬嘅傷害，所以喺講嘅時候攬住韻喬嘅腰，然後再微笑話「not a big deal，唔使擔心我喎，喬喬！」





韻喬對於俊軒咁樣hea答自己，當然感到好唔滿意，認為俊軒都仲係唔肯講真話，於是擺脫俊軒嘅懷抱，非常不滿咁講...

「林俊軒！你好話畀我知發生咩事啦下！如果你唔講清楚嘅話，我就唔畀你攬我、拖我咖！」

而喺呢個時候，天殷同禮謙見韻喬同俊軒咁耐都唔返去，於是就走到俊軒同韻喬面前，但佢地一去到，就見到韻喬對俊軒，擺出一個非常不滿嘅樣，交換眼神之後就覺得可能有事發生。

而俊軒就繼續好盡力咁，掩蓋自己嘅無奈與不安，裝作堅定咁話「小喬，真係……真係冇咩特別嘢啦，你就唔好咁擔心我啦，好嗎？乖！」然後俊軒就吻向韻喬嘅後頸。

以韻喬嘅聰明才智，要揭穿一個人嘅内心，其實唔難，由其係眼前呢位五年前第一位喺學校識嘅人，依家仲要成為咗自己男朋友嘅林俊軒，而且最絕嘅就係「件事就係咁簡單？如果真係咁簡單嘅話，咁點解你依家會笑得咁牽強啊？」
 




「而且林俊軒，唔該你同我記住一樣嘢，依家嘅我已經唔係你一個普通嘅朋友，或者只係同班同學咁簡單，而且都曾經係你嘅好朋友，依家我仲要進化到係你嘅女朋友，你好快啲一五一十咁，話哂畀我知咩事啦下！」韻喬呢個時候嘅脾氣已經略帶浮躁。
 
「係囉軒仔呀，你就快啲坦白同喬喬講啦，始終依家喬喬係你女朋友嚟咖，你兩個有咩事都好，應該要坦誠面對咖嘛！你唔係咁快就想呃我好姐妹下話？我唔放過你咖衰人！」天殷此時都忍唔落去，開口叫俊軒交代頭先喺電話嘅内容。
 
「而且軒少，除咗小喬同學之外，其實你仲有我同天殷嘛。作為你嘅兄弟，你有咩事，我都一定會出嚟幫你咖。如果真係有好大問題嘅話，你就講出嚟大家幫手面對啦！」連禮謙都加入勸服俊軒道出事實。
 
俊軒聽完之後，深呼吸一下，好平靜咁反問大家「你地真係要聽呀嘛？既然大家用群衆壓力，或者講得好聽，出於好朋友身份去幫我、關心我嘅話。咁好啦，我唯有講啦，不過你地要應承我，唔好有太大反應喎！」

「得啦，我地三個一定會應承你！你就放心同我地講啦！」韻喬第一個出聲，去叫俊軒講





「頭先我媽打電話嚟同我講，話我將要同黃嘉惠同學……宣布訂婚。」

講完之後，俊軒非常無奈咁，用手遮住自己塊面，狀似唔敢面對大家之餘，面上仲有失落嘅表情。

（待續 ~）

IG link https://instagram.com/bear_big_big_writer