《愛在。貴族學園》: Ch 26 ~ 好景不長 Part 3

Ch 26 ~ 好景不長 Part 3（連載日期：2023/12/03）

「咁我自己諗下點樣同小喬講先啦。媽媽，咁我想問下，我同黃同學嘅訂婚幾時要做？」俊軒以非常失望同無奈嘅語氣講。
 
「剩低畀你同張小姐嘅時間其實唔長，訂婚禮就係喺兩個禮拜之後舉行，小軒你有冇意見？」林太非常平淡咁問俊軒一個冇選擇嘅選擇題...

「既然你地都已經應承咗黃家，我都冇選擇餘地啦。但問題係，媽媽，我真係真係好鍾意好愛小喬，同時我真係對嘉惠毫無興趣，應該話，經過咗咁多事之後，其實我對黃同學非常反感囉！」俊軒帶有小激動咁同林太講。
 
「一來係佢嘅性格問題。二來，佢居然可以為一己之私而拆散人地之餘，仲要向其他人施以極限施壓，今日就話搶人地男朋友，又或者拔出自己所謂嘅眼中釘，將來難保佢會搶走天榮咖。媽媽乜你真係好想，將你自己同爸爸咁多年嚟嘅心血，拱手相讓畀一個不分青紅皂白嘅妖女咩？」
 




「嗯，媽媽其實知道你點諗，而且我都睇得出你好錫張小姐，呢個我會再同你，以及同爸爸諗辦法啦。我地都傾耐咗啦，你快啲去匯合返張小姐佢地啦，我唔阻住你地幾個後生啦，有咩今晚返到屋企再講啦！bye！」林太講完之後就收線。
 
俊軒喺聽到以上一連串消息，以及諗到自己居然會有同韻喬分開嘅一日，而且仲要喺短短兩個禮拜之後，就即刻流下眼淚。

但俊軒為咗唔想大家擔心，所以喺收線之後，就自己走入洗手間裏面洗面。

不過，雖然俊軒嘅動作好快，但係喺俊軒走入洗手間嘅一刻，依然畀女朋友——韻喬發現。
 
喺洗手間入面，俊軒終於都忍唔住，放聲大喊，而且不停喺度自責...





「點解我要咁冇用？好唔容易先可以將小喬追到手，但轉頭……轉頭就要同一個自己唔鍾意嘅人訂婚！」
 
「如果我一早知道嘅話，我就一早收心養性，全心全意咁去追小喬，點解人永遠都係咁犯賤？永遠都係要等到失去嘅時候，先會學識珍惜？！我真係好憎我自己呀林俊軒！」之後俊軒不停用凍水洗面，等自己可以冷靜一下頭先過於激烈嘅情緒。

5分鐘後，俊軒終於整理好心情，稍微用自己塊手巾抹好塊面，然後先再慢慢步出洗手間。

不過俊軒一打開門，就見到韻喬貼住牆壁企，好似想偷聽人地咁，自然就畀韻喬嚇一嚇啦「嘩！小喬你做咩喺度嘅，嚇死人咩？！」
 
「搞錯呀！乜我男朋友咁細膽咖？不過點呀，做咩講完電話之後，個人就頭耷耷咁嘅？做咩呀，畀屋企人鬧完嚟啊？」韻喬含情脈脈，但又帶點恥笑咁望住俊軒。





不過俊軒喺出嚟之後，為咗唔想畀韻喬知道自己唔開心，所以不斷逃避韻喬嘅眼神。

但韻喬見到俊軒咁樣之後，就忍唔住話「林俊軒，你做咩唔望住我？同埋個樣做咩咁唔開心？」

「唔係呀小喬，我又無啦啦又點會畀人鬧呢？不過，頭先都聽到啲唔係啲值得開心嘅野姐！但係我真係冇事喎！你就放心啦喬喬！」俊軒講完之後，就對報以韻喬微笑，不過係強顔歡笑。

韻喬聽到俊軒咁形容之後，就感到非常奇怪，於是就再追問俊軒發生咩事「聽到啲唔值得開心嘅野，但係又話自己冇事？到底你喺度講緊咩呀？我唔明喎林俊軒，你快啲話我知，到底發生咗咩事啦？」

（待續 ~）

IG link https://instagram.com/bear_big_big_writer