《愛在。貴族學園》: Ch 26 ~ 好景不長 Part 2

Ch 26 ~ 好景不長 Part 2（連載日期：2023/07/29）

俊軒拎起電話嘅時候，就見到來電顯示為“屋企”，於是就十五十六咁，考慮緊聽唔聽電話好。

因為俊軒都預計到，屋企突然之間咁樣打電話畀自己，覺得可能將會有啲唔好嘅事發生，所以先話唔想面對。

不過，韻喬都見到俊軒個電話屏幕，認為都係有緊要事先會搵俊軒，所以韻喬就叫自己男朋友盡快去聽電話「咦小軒呀，係你屋企打電話搵你喎，仲唔快啲去聽電話？！唔好要uncle auntie等你咁耐啦！」
 
既然女朋友都開到口，俊軒都冇藉口唔聽個女朋友話「唔好意思呀各位，咁我去聽個電話先！你地等我一陣，失陪！」俊軒好唔好意思咁講，然後就自己走去樓梯附近聽電話。
 




「喂！」俊軒手震震咁按下電話上嘅接聽鍵「喂，小軒？你依家方唔方便行開講兩句呀？」電話嘅另一邊，即刻傳來林太急速嘅聲音。

聽到林太咁樣話要行開講，俊軒都知道自己媽媽講嘅，都一定唔會係咩好嘢。
 
「可以呀，咁咩事呀媽媽？係咪有咩急事要同我講？」俊軒冇考慮太多就應承咗林太。

「不過小軒，喺我開始講之前，我想問你個女朋友呀張小姐有冇喺你隔離？」林太再一次好小心咁問俊軒。
 
俊軒聽到之後一臉疑惑咁反問林太「冇呀，不過佢同天殷、禮謙就喺附近咋。做咩？你係咪有嘢要同小喬佢講？如果係嘅話，我叫佢過嚟聽電話？」
 




「唔係，我有樣嘢要同你講，不過呢件事事關重大，你要同我聽清楚，知道未？」林太語氣突然間嚴肅起嚟「知……知道！」

「今日黃家上嚟我地屋企，你都應該知咖啦，原本諗住就單純傾下將來我地天榮集團同黃氏企業，喺生意同戰略上面嘅合作…..」
 
「不過，就喺傾完嘅時候，黃uncle話佢個女兼你地幾位嘅同班同學嘉惠小姐好鍾意你，而且仲喺大家面前話一定要同你結婚……」俊軒聽到呢度非常震驚，但自己未有出聲，等林太繼續講落去先。
 
「而且小軒你都應該清楚知道，黃氏企業比起我地天榮集團，喺規模、業務上都大好多，而且都叫係天榮非常重要嘅生意夥伴。於是，唔知係咪嘉惠小姐之前不停咁求過黃uncle啦……」
 
「黃Uncle話其中部分同我地天榮嘅生意，同將來嘅戰略合作，都會有條件，條件就係，要你應承同嘉惠小姐訂婚，黃氏先會繼續同我地做生意。否則，黃氏唔單止唔同我地做，以及取消全部訂單之餘，仲可能會對天榮提出敵意收購。」
 




俊軒聽到呢一大堆嘅條件之後，心裏面就覺得非常嬲，認為嘉惠為咗可以得到自己同趕走韻喬，竟然逼大人喺商場上不擇手段，於是就好不滿咁講...

「媽咪，你都應該好清楚知道，我同小喬一齊緊，我又點可能會突然間要我應承同黃同學結婚呢？」
 
「而且，我都好肯定黃同學一定有喺背後煽風點火，黃uncle先會用生意去要脅我地同天榮，而且媽咪，我都應該冇同你講，上次喺郭氏個party上面，同埋喺學校裏面，黃同學都做咗好多好過分嘅嘢，令小喬非常難過，而黃同學都因為咁而畀學校處分。」
 
「我知道，黃uncle其實私底下有同過我講，不過其實黃家原來同你地學校校長關係密切，而黃Uncle都有講自己識你地學校校長。」林太用一個想俊軒可以冷靜嘅語氣同俊軒講「小軒呀，其實媽咪好明白你嘅意思，不過，暫時我都冇其他辦法，可以同你擋咗去，真係恕我無能為力啦，而且，你都可能要幫我同爸爸，同張小姐講聲對唔住。」

（待續 ~）

IG link https://instagram.com/bear_big_big_writer