《愛在。貴族學園》: Ch 24 ~ 心碎 Part 13

Ch 24 ~ 心碎 Part 13（連載日期：2023/03/31）

「你就覺得今次黃家突然上去你屋企，其實係黃同學喺背後操作，然後借用佢地公司嘅名義向你屋企施壓？」一直身為韻喬邁向感情路上軍師嘅天殷，第一件事自然就諗到呢個非常狗血嘅可能性。
 
「我諗大概就會係囉。不過我都有問過我爸爸，佢話我地公司的確要準備同黃氏要傾生意。但係我希望聽日班大人，真係上嚟我度傾生意，而唔係畀黃同學嚟我屋企踩場搞屎棍啦…唉！」俊軒帶點無奈嘅語氣回應。
 
「不過，我想問呢……你媽媽有冇話黃家聽日幾點鍾左右去你屋企？」天殷再問俊軒。

「好似話約咗爸爸下晝十二點半喎。不過殷殷呀，我地聽日唔係約咗中午咩？」俊軒同天殷再三確認時間。
 




「係呀，不過我突然之間覺得，既然黃家聽日就可能出手嘅話，我覺得我地都唔可以再拖啦，一定要盡快令小喬做你女朋友啦！」講完呢句之後，天殷發現遠處嘅韻喬開始望住自己「喂，唔同你講住啦，有咩今晚先再喺電話度傾啦，bye！」
 
「喂，做咩……」俊軒未講完呢句，就已經被天殷匆忙cut線。而天殷就回復一面冷靜咁，行返去餐枱度繼續同韻喬食飯。

「唔好意思呀喬喬，頭先咁樣冷落咗你，不過又係啲比較私人嘅嘢，所以一定要行開聽……」
 
「唔緊要啦，不過頭先邊個搵你呀殷殷？而且我見你好似收線收得好快好急咁，係咪有咩急事你要處理呀？如果係不如我地快啲食完出去啦…」本來食緊嘢嘅韻喬依然非常好奇咁，望向啱啱坐返低嘅天殷。
 
「冇呀！咪就係電話公司打嚟話要傾續約咋嘛！我於是咪話我依家唔得閒，所以叫對方夜少少先再打過嚟姐。我地繼續食野先啦！」雖然韻喬一向都好聰明，但係天殷當然唔敢話頭先就係同俊軒講電話啦，免得韻喬再喺度懷疑自己啲咩。
 




而韻喬聽完天殷嘅解釋之後，都冇再刻意去深究，只係專心咁繼續同天殷食飯。

然而，喺天殷嘅内心入面，此刻就變得非常不安，但係又要好努力咁，將擔憂嘅表情收起。但好彩嘅係，韻喬都發現唔到天殷有異樣。
 
不過，韻喬覺得天殷都應該會趕時間返屋企處理佢嘅嘢，於是喺食完飯之後，都冇再喺餐廳度坐得太耐。而因為李家嘅司機暫時唔得閒嘅關係，所以天殷就同韻喬坐巴士返屋企，但同時通知司機去福生大廈附近接佢。

「殷殷呀，聽日我地仲一唔一齊練習呀？」韻喬喺車上面，突然之問問心裏面非常混亂嘅天殷。
 
「聽日……都係唔練住啦，而且我地都練咗咁多日，都係時候要休息一下咖啦，如果唔係陸運會之前整親嘅話就麻煩啦，而且咁重視成績嘅你唔使溫書咩？」天殷表明立場話唔再練，原因就係因為聽日要一切按計劃，進行“和我一起”嘅行動。
 




「哦，咁好啦，而且我考完試之後，又真係冇溫過書呢…」韻喬若有所思咁講「不過殷殷呀，你司機仲有幾耐先到呀？如果太耐嘅話，你不如上嚟我屋企等啦？」

天殷問過司機之後就話「佢應該都要一段時間先到，但係我上去嘅話，會唔會阻住你同uncle、auntie呀？」天殷反問韻喬道。
 
「佢地唔會介意嘅，不過我媽媽應該會有嘢想同你講掛，上嚟啦殷殷！」

「咁，今次真係打搞哂啦喬喬！」於是喺巴士返到北角之後，天殷就跟住韻喬，上去對方屋企。
 
「媽，我帶咗天殷同學上嚟呀！」韻喬一打開家門，就向喺客廳裏面嘅張太大叫道。

「Auntie你好呀！」天殷一邊除鞋，一邊好有禮貌咁同張太打招呼道。而喺天殷入屋之後，韻喬就喺後面幫手閂門。
 
「噢，原來係李家大小姐呀？幸會幸會，入嚟坐丫！」「Auntie你真係客氣啦，我就無啦啦比你個女拉咗上嚟，而且我又冇帶禮物上嚟，兩手空空上嚟咁又打搞你地休息真心唔好意思呀Auntie！」天殷回答嘅時候都不忘抱怨韻喬嘅任性。
 
「哈哈，又點會打搞呢？而且李家大小姐你又靚女，對人又有禮貌！隨便坐啦，當呢度自己屋企得咖啦！」





韻喬放低自己啲嘢之後，就斟咗一杯水畀天殷「啦飲杯水先啦殷殷！」「唔該喬喬！」

（待續 ~）

IG link https://instagram.com/bear_big_big_writer