《愛在。貴族學園》: Ch 24 ~ 心碎 Part 14

Ch 24 ~ 心碎 Part 14（連載日期：2023/04/04）

「哈哈Auntie你就唔好咁讚壞我啦，相比起我，喬喬佢就更加有禮貌同氣質之餘，成績又好喎，auntie你有個咁好嘅女，你就真係有福氣啦！我就…..點都唔夠喬喬佢完美咖啦。喬喬你過埋嚟一齊坐啦！」天殷於是就坐過少少等韻喬坐落嚟。
 
「哈哈，天殷小姐你都幾識氹人開心咖喎！我呢個衰女包呢，樣樣嘢都做得好好，從來都唔使我同爸爸擔心。但唯一可以搞到一塌糊塗嘅，我諗天殷小姐你都應該知道啦……」張太刻意去到呢個位停低，等天殷自己去思考，而韻喬就已經用手遮住自己塊面。
 
「Auntie你嘅意思係，喬喬佢唔識照顧自己？」天殷反問張太，而張太都即刻點頭同意話「哈哈！天殷小姐你真係聰明啦！冇錯，我就係想講呢樣嘢！」
 
「媽咪呀！明知有客人喺度，你都畀返少少面子畀呢個女我得唔得呀？唉心淡呀！依家都唔知邊個先係你個女嚟！」韻喬喺度同張太抗議，引得天殷呢個花生友喺度哈哈大笑...





「哈哈，喬喬你就認咗佢啦。你呀！搵男朋友同老公記得要搵個醒D咖，最好係可以幫你執手尾嗰啲！」
 
天殷呢句說話再一次搞到韻喬紅都面哂，而張太都向韻喬打咗個眼色「哈哈，睇嚟我個女唔識照顧自己嘅事，我諗依家應該全班同學都知道啦？就好似之前咁，自己發燒都可以唔知，仲搞到肺炎入醫院咁大件事…」張太非常無奈咁講。
 
「不過天殷小姐，上次都係多得你同另外兩個男仔，臨時上陣幫我同我老公照顧住韻喬，我地先唔使即刻由駐馬店趕高鐵返落香港，畢竟高鐵連去深圳嘅班次都唔係多……」
 
「所以天殷小姐，我一直都想同你地親口講聲唔該，因為我都知道呢個寶貝女嗰陣時，搞到好多麻煩問題比你地幾個，而且你地又要做notes、教功課，又要照顧起居飲食……」
 
「而且就快又到學校嘅陸運會，呢個女又開始好高騖遠，想話要攞獎牌喎，呢幾日都要你地陪住個女練習，真係辛苦哂。」張太一邊飲茶一邊同天殷講咗一大堆感謝嘅說話。





但更多嘅係，韻喬覺得張太兜好大個圈，暗示自己好麻煩。
 
「邊度係呢auntie！其實我地幾個都好樂意陪佢咖。雖然話就話小喬喺學校好受同學同老師歡迎，但係真係關心佢嘅人，由其係同學，其實都唔係好多，好多都係另有目的埋小喬身……」天殷道。
 
「不過好坦白講啦Auntie，其實我自己喺學校裏面，真正嘅朋友都唔係好多，都係當初小喬主動過嚟識我，所以我地喺學校都係互相照顧姐！」天殷繼續講。
 
「嗯，你地幾位能夠有呢種關係，真係好好同好難得，Auntie見你地幾個相處得咁好，真係安樂哂啦。不過阿女呀，你都真係要好好照顧自己啦，如果真係有咩搞唔掂嘅話，就搵天殷同學幫手啦…」張太同佢地兩個講。
 
「哎呀！我會改咖啦長氣大師！但係你都唔使將我啲瘀嘢，咁樣同其他人唱通街咖嘛！」韻喬好緊張咁講，但係天殷就即刻話「怕咩呀！至少呢間屋裏面嘅人都知咖啦！」





「李天殷！你唔出聲嘅話，其實都唔會有人話你啞咖！」韻喬瞪大自己對眼喺度抗議「係啦媽咪呀，今晚呢你唔使煮我太多飯啦，頭先我同殷殷喺出面食咗啲嘢先返嚟…」韻喬對張太講。
 
張太聽到之後就笑笑口話「唔緊要啦阿女，今晚我都唔係煮咩九大簋，都係普通飯菜啫，食多食少都無所謂嘅！咦，天殷小姐，不如你都留喺度食埋飯先返屋企好冇呀？」
 
「唔使啦auntie，今晚我屋企會出去食飯呀！不過我都好多謝你嘅好意。之後有機會嘅話，我先再嚟食飯啦!」天殷非常有禮貌咁推卻張太嘅好意，目的就梗係唔係要同屋企人出去食飯咁簡單啦，而係要繼續同俊軒佢地商量第二日嘅事。

而天殷嘅電話同時都收到訊息，天殷喺睇完之後就話「噢Auntie、喬喬，我司機話過多幾分鐘就到啦喎，我都差唔多要落去等啦！」
 
「噢，你地司機咁快就到啦。阿女呀，你就陪天殷小姐落去等車啦！天殷小姐你自己都小心啲啦！之後陸運會加油！！」張太微笑咁同天殷講。

「我知道咖啦，而且都多謝張Auntie你！下次我地再見啦，bye！」同張太揮手道別之後，韻喬就帶天殷落去等李家嘅座駕。

（待續 ~）

IG link https://instagram.com/bear_big_big_writer