《愛在。貴族學園》: Ch 24 ~ 心碎 Part 12

Ch 24 ~ 心碎 Part 12（連載日期：2023/03/28）

「話說殷殷呀，做咩今日小軒同禮謙佢地兩個唔同我地一齊練嘅？」
 
韻喬問完呢個問題之後，天殷就即刻有少少緊張，吞吞吐吐咁話「冇……呀，因為佢地兩個都話想專心啲嘛，所以咪各自去練囉。不過都係托你話要大家喺比賽爭牌嘅福啦！by the way你想食咩呀？喬喬你揀嘢食先啦！」於是天殷就將點餐紙交畀韻喬，然後韻喬就喺點餐紙度揀咗一個set。
 
「嗱，到你揀啦！你叫完順便落埋單啦！唔該殷殷！」韻喬就將張紙畀返天殷，之後天殷都揀好食物，就將點餐紙交畀侍應生落單。
 
就喺等食物嘅時候，韻喬同天殷兩個人都傾返學校同Form 5A嘅是非，老師、同學都有份成為佢地嘅話題...





「喬喬呀，其實你有冇發覺5A呢幾個禮拜，好似有少少太靜，而且係好唔尋常嘅寧靜？」天殷突然講出呢句，令到突然發緊夢嘅韻喬都感到非常意外。
 
「我都覺呀殷殷，呢排實在係平靜得太可怕…」韻喬一邊飲抹茶，一邊好擔心咁講「我希望…….依家唔係關於我嘅一場暴風雨來臨的前夕，而係因為來自於陸運會嘅壓力啦！」
 
講講下，佢地所點嘅食物都開始嚟到，天殷喺接過食物之後就問「喬喬呀，要唔要食少少鰻魚呀？」韻喬點點頭之後，天殷將件鰻魚夾畀韻喬。

而韻喬就將自己嘅吞拿魚分咗少少畀天殷「殷殷呀，呢度個拖羅幾好食咖，喬喬我嘅誠意推介嚟！」「係咩？咁等我試下先！」
 
天殷毫不客氣咁，就將件拖羅放入自己口中。幾秒之後，天殷就立即做出一臉滿足嘅表情（當然都係浮誇嘅表情），然後就話...





「果然好食過出面好多餐廳唔少喎！而且都好新鮮，仲識得入口即溶！就好似喺日本黑潮或者豐州市場食咁。小喬，你真識食呀！」
 
「哈哈！小妹我就係知道，你地班有錢人有幾咁嘴刁咖啦，所以先同你嚟呢間餐廳食飯咋！」韻喬夾起一件壽司一邊道

「咩嘴刁呀張韻喬！不過呢，今次真係令我對你刮目相看呀喬喬，識得帶我嚟食好西！我欣賞你！」天殷非常滿足咁講。
 
「滴滴……」就喺兩個女仔繼續一邊食嘢，一邊繼續喺維港景色面前談天說地嘅時候，天殷嘅電話突然響起。

「殷殷，係咪有人搵你呀？」韻喬見到天殷部電話着燈之後，就問食緊天婦羅嘅天殷。
 




「咦係喎！唔該哂你呀喬喬，等我轉頭睇下先！」「唔使客氣啦殷殷！」天殷好快就將食物放入口，然後就睇下發生咩事。

但係天殷睇過之後，佢就瞬間面色一沉，因為係俊軒傳signal嚟，而内容就係話……

「5A林俊軒：十萬火急！           17:15」
「5A林俊軒：我媽頭先話黃家聽日會去我屋企傾生意            17:15」
「5A林俊軒：不過我媽話佢地會帶埋嘉惠去我屋企          17:16」
「5A林俊軒：我覺得有少少唔簡單！點部署！               17:16」
 
天殷覺得好唔對路，於是就即刻同好奇嘅韻喬講「唔好意思呀喬喬！你介唔介意等我一陣先，我有個緊要電話要打，你繼續食嘢先，失陪哂！」天殷於是就跑咗出去門外，然後即刻打電話畀俊軒。
 
「林俊軒，你依家方唔方便依家講兩句？真係講兩句咖咋！」喺電話接通之後，天殷直接講咗呢句說話。
 
「可以呀殷殷。我自己就覺得黃家聽日過嚟，而且仲要帶埋黃同學上嚟嘅話，成件事絕對唔係傾生意唔簡單！」俊軒都直接咁講「講真呀，就算平時我爸爸喺屋企真係要同黃uncle傾生意嘅話，黃uncle都唔會帶埋黃同學上嚟嘅！」
 




「不過，自從早幾個禮拜Ms張話要罰黃同學之前，黃同學都曾經話過，一定會令我真心鍾意佢，然後趕走小喬。唔通……」

（待續 ~）

IG link https://instagram.com/bear_big_big_writer