《愛在。貴族學園》: Ch 24 ~ 心碎 Part 7

Ch 24 ~ 心碎 Part 7（連載日期：2023/03/10）

「雖然你咁講又好似有少少遠，不過我就應該都冇咩問題嘅，星期日我不嬲都唔會太忙。咁禮謙你呢？」俊軒先應承天殷。
 
「我就應該都可以掛，如果到時候屋企真係有事呀，我咪話約咗你地先囉！而且好多時候就算有事都好，都唔一定會關我地事嘅！」禮謙都幾乎即刻答應。
 
「咁就very good啦！」天殷即刻竪起拇指咁講「不過，我都可以講多少少嘅，其實我大概就係諗住，要製造一個危急嘅場面，去刺激小喬嘅本能反應，等佢要喺你地兩個之間做出選擇。」
 
「下，你咁樣得唔得咖天殷？如果你用危急場面去逼小喬表態做出選擇嘅話，我怕咁樣會令到小喬因為唔識處理而失去理智，最後可能會傷害到佢自己咋！」禮謙好坦白咁講出自己對天殷呢個計劃嘅憂慮。
 




「但我地之前唔係就已經講過，小喬就係需要有啲殺到埋身嘅嘢刺激到佢，佢先會通過自己嘅潛意識，令佢發現自己對情感嘅認知。」天殷反駁禮謙道「而且最重要嘅係，面對嘉惠喺唔同範疇嘅步步進逼，我地已經時間無多，依家就係要採取行動嘅時候啦！」
 
「咁殷殷你想點部署先？」俊軒再一次一臉好奇望向天殷。

「你兩個企埋少少先，我唔想畀其他人聽到…」天殷捉住佢地兩個講「不如咁啦，我諗住呢……當日就安排你兩個一齊出去，然後途中扮發生交通意外……」
 
「之後我就會打電話同喬喬講，你地兩個發生意外出咗事，但送咗去唔同嘅醫院。到時候我地三個人就睇下小喬會講邊個個名先，然後就出發去嗰間醫院度等小喬，喺見面之後，我再慫恿喬喬同軒仔一齊…」
 
「雖然我知道咁樣做對喬喬其實都有少少殘忍嘅，但係我相信咁樣做嘅話，就可以令到喬喬覺得自己唔可以再對感情事視而不見，要學識及時珍惜眼前人。唔知兩位大哥，點睇小妹嘅計劃同佈局呢？」





禮謙非常同意咁話「Ok喎天殷同學，其實我覺得呢個辦法確實唔錯！雖然真係狗血同過分咗少少。但係為咗小喬同小軒兩位嘅幸福，我都覺得不得不出此策略呀！男主角，你自己又點睇呀？」

俊軒摸一摸下巴就話「我都覺得幾好呀殷殷！不過我係有啲擔心，到時候聽到我同謙謙出事嘅話，小喬會情緒失控啫。咁就……事不宜遲啦，就約定喺考完試之後嘅星期日好唔好？至於行動代號，暫時就叫做…“和我一起”好冇呀？」

禮謙同天殷同時話「好！」「就咁樣決定先啦，至於其他嘢，今晚再決定啦！我地都係返入去先啦！」天殷繼續講，然之後就前後腳咁返入班房度。
 
「喂殷殷，你地幾個頭先喺出面做咩呀？鬼鬼鼠鼠咁！講！你地三個係咪有野暪住我唔畀得我知？！」韻喬見幾個好朋友圍威喂完，嘻嘻哈哈咁走返入班房，於是就捉住天殷追問。
 
「暪你個頭呀暪！都唔知做咩張韻喬依家都會咁多事咁八掛都有嘅！」心虛嘅天殷好大聲咁否認，同時都選擇扯開話題「話說Ms張同我地幾個調咗位，依家我地幾個坐埋一齊，會唔會覺得咁樣會開心啲呀？」
 




「嗯！我覺得幾好呀天殷，我就覺得除咗我地都可以friend啲之外，至少大家隔開咗咁遠，佢地兩個都可以冷靜一下先。」禮謙先開口話。
 
「都係嘅，不過話時話啦，我地幾個都friend咗咁耐啦，好似又真係都冇試過坐埋一齊喎，最多都係我四年之前同小喬一齊坐過一段短時間咋。」俊軒喺講嘅同時，又再一次拎返中一嘅事出嚟講，搞到韻喬聽到之後紅都面哂。

（待續 ~）

IG link https://instagram.com/bear_big_big_writer