《愛在。貴族學園》: Ch 24 ~ 心碎 Part 8

Ch 24 ~ 心碎 Part 8（連載日期：2023/03/15）

「喬喬呀，你做咩聽完軒仔講之後，你就突然之間面紅呀？你又唔舒服呀？定係因為……嘿嘿嘿！」天殷故意借在俊軒嘅說話挑起韻喬嘅情感。而俊軒同禮謙都忍住笑，而且仲忍得好辛苦。
 
「喂呀！你個死人頭冇嚟正經呀你！Ms張調佢地兩個過嚟我地度…….目的都係想你同禮謙……兩個成績好啲咋嘛！」韻喬吞吞吐吐咁回應，但偏偏呢句講出嚟都冇太大說服力。
 
「天才話係點就係點啦下！不過話時話啦，考完試之後就好快會到陸運會啦喎，你地幾個報咗咩項目呀？」天殷話題一轉，一年一度嘅陸運會，會喺考完試之後嘅下個禮拜就舉行，亦都係“和你一起”行動之後嘅幾日。
 
「係喎，你唔講我都差少少唔記得添！我報咗呃……三級跳、800米同1500米呀。你呢禮謙？陸運會會玩咩呀？」俊軒先回答天殷嘅問題。
 




「我……」「小軒你認真咖？800同1500米喎！？夠唔夠氣跑咖你？」天殷打斷咗禮謙嘅話「你呀！唔好到時候跑到唔夠氣訓低，然後要first aid拎擔架出嚟，抬你出去喎！你都知道幾咁樣衰咖啦！」
 
「我就梗係知道啦咁樣好樣衰啦！不過呢，其實呢次我喺陸運會嘅目標，就係要攞到獎牌！」俊軒目標明確非常明確咁，回答天殷嘅問題「所以我先話想參加比較少人嘅項目，競爭細啲，自然可以增加攞嘅機會囉！」
 
「woo……林俊軒居然想話要喺比賽攞牌，唔通……你要氹女呀？」旁邊嘅女同學聽到之後立刻起哄，而且有意無意咁，將視線投射到身邊嘅韻喬身上。

天殷聽到班女同學咁講之後，就即刻怒啤過去。韻喬聽到當然都好難為情，但係個心……又一次亂跳起嚟。
 
「我就參加咗鐵餅同100、200米，志在參與一下咖咋！」禮謙喺天殷同俊軒講完之後，先至再有機會去講返頭先講唔完嘅說話。
 




「但係禮謙呀，呢幾項出哂名競爭都好大咖喎，因為需要嘅技術都唔係好多，你真係唔諗住贏出比賽攞牌咩？」韻喬一臉疑問道，但係今次韻喬嘅問題，就真係問起禮謙，完全唔知點答。
 
天殷為咗可以化解尷尬局面，於是就主動解圍話「喬喬呀，你就由得謙謙佢參與下就算啦，無傷大雅嘅。至於我就去參加標槍同100米啦。咁喬喬你呢？睇下我地會唔會做競爭對手！」
 
「我都係報咗100米、200米同跳遠。不過，聽到小軒頭先咁講之後，我就想大家唔係剩係參與下咁少啦…」韻喬突然間好認真咁講...

「因為，禮謙、殷殷，小妹我想你地盡力去比賽，如果可以嘅話，贏塊獎牌返嚟啦，好唔好？」
 
天殷諗咗一陣，認為韻喬嘅說話都不無道理，於是就話「好啦，既然喬喬你都講到咁啦，咁謙謙，不如我地都加油啦！喂喬喬呀，就快打鐘啦！你陪我去一去洗手間得唔得呀？」韻喬點點頭之後就同天殷去洗手間，留返兩個男仔喺度。
 




小息過去之後，去教員室見Ms張嘅嘉惠都返到班房，但喺佢返入班房嘅時候，面色就比起小息之前更差。

或者，都係因為佢會畀學校，最少重罰一個缺點，兼罰留堂一個禮拜，所以黑住面咁行返班房。

當然，知道自己係畀情敵搞到畀人罰，嘉惠自然都唔會放過可以怒啤韻喬嘅機會，韻喬見到之後都覺得嘉惠真係好恐怖，而且心裏面一直都有一股無形嘅壓力喺度。

不過喺陸運會之前，其實就已經去到學校上學期考試嘅時候，所以喺報名之後嘅一兩個禮拜，大家都停止課外活動，而專心咁準備考試。

當然，就連要密謀喺韻喬手上搶俊軒返嚟嘅嘉惠，都暫時停止策劃佢嘅大計。

（待續 ~）

IG link https://instagram.com/bear_big_big_writer