《愛在。貴族學園》: Ch 24 ~ 心碎 Part 6

Ch 24 ~ 心碎 Part 6（連載日期：2023/03/07）

「你所講嘅危機嘅意思係……？」俊軒好似完全唔明白天殷嘅意思，搞到天殷都好少有咁反俊軒白眼，而且仲要抱怨對方「搞咩呀你，load得咁慢都有嘅？完全唔似你喎林俊軒！」
 
「咪就係嘉惠今朝同你講話，要同你屋企人施壓嗰件事囉！你唔係咁都唔知下話林俊軒！？」禮謙打斷咗俊軒嘅疑問。

天殷於是就稱讚禮謙嘅聰明道「冇錯啦謙謙！今次謙謙終於都反應快過小軒你喎，有進步呀下。林俊軒，我今日想好認真咁同你講，如果你同喬喬再喺度拖，唔快啲同對方表明心跡嘅話，我好肯定你地兩個連開始嘅機會都唔會有啊！」
 
「下？！邊有咁誇張呀殷殷？但係我覺得，嗰個嘉惠都應該得個講字咖啫，佢點會夠膽做得出先得咖？真係唔怕畀人吹花咩？」俊軒好不屑咁講「而且，黃uncle喺商場裏面都出哂名做事公正，佢又點會畀自己個女亂嚟先得咖？仲有呀，我地其實都就快考試啦喎，你覺得我依家講嘅話，小喬呢個讀書魔人會理我咩？！」
 




「唔係囉林俊軒，其實黃嘉惠佢就係嗰種，為求得到自己想要嘅嘢，而不擇手段嘅人嚟咖，你就唔好輕敵啦軒少！」禮謙同俊軒分析道。
 
「上一次嘉惠就話用言語羞辱小喬咁，但好明顯經過尋日之後，學校已經開始做嘢去阻止嘉惠繼續去咁做，單憑今日校長今朝早會嘅主題，同Ms張突然之間調我地幾個嘅位，就已經知道發生咩事啦…」
 
「既然嘉惠佢喺學校，用咁嘅方式搞小喬係行唔通嘅話，嘉惠佢自然就會想用其他方法，試圖去得到資金同埋自己想要嘅嘢。而今次嘉惠就已經同你講，佢會選擇直接向你屋企落手！」
 
「軒少，唔好話我危言聳聽啦，我都希望你自己諗清楚林家同黃家之間嘅關係啦，兩家實力懸殊就大家都知道嘅，我就覺得就算你自己可以抗拒嘉惠同學都好，但係你屋企就未必有能力，可以抗拒到黃家喺財政上嘅施壓。」

「畢竟之前都已經知道，黃氏企業佔咗你屋企天榮集團唔少嘅生意額，林uncle未必願意為你嘅兒女事情，而將公司陷入存亡嘅境地，而且咁樣嘅話，你爸爸都冇辦法同董事局，以及同出面嘅股東交代，所以你反抗嘅話，最後你都係會輸！」
 




講完一大輪之後，天殷聽得頭頭是道，然後就話「謙謙今次分析得好好，如果今次係LS考試嘅話，相信謙謙你呢條一定會滿分！」

「多謝你啦天殷！不過我都係有嗰句講嗰句啫…」禮謙面紅紅咁同天殷講。

天殷於是就接住講「而我自己就覺得，就算你之前可以點化解都好，軒仔你今次真係唔可以輕視嘉惠同黃家對你同林家嘅行動。所以，小妹我為咗幫喬喬同你，可以趕走嘉惠喺埋一齊，我已經開始計劃緊一個行動。」

俊軒同禮謙驚訝咁望住天殷，同聲道「開始計劃一個行動！？咩行動嚟咖？」

「天殷，你老實同我講你想點做先，睇下係咪真係work先得咖！」俊軒非常緊張咁問天殷，而且俊軒嘅眼神仲充滿住唔少期待。





「嗯，但係軒仔你可唔可以冷靜少少先，你唔好咁樣望住我……其實呢，我自己就未完全諗好嘅……」天殷答返俊軒「不過呢，既然你頭先都講我地就快考試啦，應該短期都唔得閒咖啦。咁我想問你地……考完試之後第一個星期日嘅中午，你地兩個得唔得閒先？」

（待續 ~）

IG link https://instagram.com/bear_big_big_writer