《愛在。貴族學園》: Ch 24 ~ 心碎 Part 5

Ch 24 ~ 心碎 Part 5（連載日期：2023/03/03）

「嗯……暫時就咁樣坐住先，之後有時間嘅話，我會再按照大家學習進度再去進行調位，希望你地幾位調位之後，可以好好咁同同學相處…」Ms張就同全班講關於呢個調動。
 
「另外，黃嘉惠同學，麻煩你小息嗰陣，去一去教員室搵我，我有件事想要單獨同你講。不過，我想問下嘉惠，其他同學教咗你點樣去教員室搵老師未？」
 
「好嘅，Ms張。其他同學都教咗我啦，所以我都識！」嘉惠回答道。

「好，班務先處理到呢度先。咁我地開始今日嘅課堂，麻煩拎返早兩日，我派畀大家份工作紙出嚟……」Ms張之後就開始上堂。
 




上堂嘅時候，嘉惠都偶爾偷望去俊軒佢地嗰邊，有少少面露不悅。

原因嘛，都係因為依家自己鍾意嘅俊軒，同自己嘅情敵，兼自己睇唔起嘅韻喬一齊坐，心中當然不是味兒。
 
至於俊軒同韻喬，雖然佢地喺調位之後，可以有更多時間同對方相處，但係有時候佢地兩個都覺得上堂有少少無聊，於是大家都開始喺本書上面畫公仔解悶。

起初韻喬覺得自己畫嘅公仔，有少少唔太滿意，於是畫完又擦咗去，擦完又畫過，來來回回咁好幾次。
 
俊軒見到韻喬畫極都唔滿意之後，就認唔住決定出手，認真望住韻喬細細聲咁講話「（你呢個......呢度要加返少少眼神落去，個公仔先會靚咖，就好似咁樣咁）」，然後俊軒就捉住韻喬嘅小手，慢慢開始幫韻喬畫。
 




韻喬對於俊軒突然捉起自己隻手喺度畫公仔，感到非常尷尬，成塊面紅到好似個蘋果咁。不過，喺俊軒嘅帶領之下，韻喬終於都畫到一隻自己滿意嘅公仔，於是喺自己本書上寫咗句嘢畀俊軒「多謝你呀！小軒！^v^」。
 
俊軒於是對韻喬微微一笑，然後都喺韻喬本書上面寫咗回應「唔使客氣啦小喬，不過你記得以後都要咁畫先好睇喎！」韻喬喺見到之後，塊面再一次紅起上嚟，心跳都越來越快。

而喺呢兩堂裏面，韻喬都畫咗唔少公仔喺本書上面，而俊軒每次見到之後都笑一笑。後來韻喬仲喺俊軒嘅書上面，畫上自己嘅公仔。
 
捱過呢兩堂之後，終於都到小息時間，一打鐘嘅時候，嘉惠就按照Ms張嘅意思，自己行去教員室搵Ms張。
 
「5A李天殷：小軒、謙謙，我有嘢同你地兩個講，出一出去走廊度等！        10:00」





天殷為咗唔想韻喬喺自己叫兩個男仔出去之後會喺度亂諗，所以用signal通知兩個男仔出去傾。兩個男仔喺收到訊息之後，就自動波走出去走廊度等天殷。
 
「小喬呀，我有少少事要出一出去，你就乖乖地留喺度啦！」天殷臨出去之前，同韻喬交帶低要出去，但係就冇講話同兩個男仔傾啲嘢。
 
「好呀殷殷，不過你要自己小心啲喎！」韻喬都未講完，天殷就已經跑走咗出去，所以韻喬就好無奈咁話「唉！真係呀，又會跑得咁快都有嘅！都唔知個大小姐有冇聽我講咖！」然後韻喬就繼續喺位度溫習。
 
至於喺班房出面，兩個男仔都唔明天殷搵自己搵得咁神秘嘅原因「殷殷呀，你係咪有咩神秘嘢想同我地講呀？仲要係唔畀得小喬知道嘅？」俊軒首先開口問天殷。
 
「仲使問嘅，咁就當然係講你同小喬之間嘅事啦！」天殷好唔耐煩咁講「不過我覺得，你兩個如果真係對對方有意思嘅話，就唔應該再拖落去啦，因為你都應該都感覺到，危機都差唔多已經嚟到，你地係時候要同對方講清楚啦。」
 
「你所講嘅危機嘅意思係……？」

（待續 ~）

IG link https://instagram.com/bear_big_big_writer