《愛在。貴族學園》: Ch 24 ~ 心碎 Part 4

Ch 24 ~ 心碎 Part 4（連載日期：2023/02/28）

嘉惠聽到俊軒呢番說話，就當然非常唔憤氣，於是又好大聲講話「我……我唔理你點諗啦！總之我已經同你講咗，咁就麻煩你做好心理準備咯，就係準備你同個窮家妹會畀我拆散啦！bye！」

之後嘉惠就返埋自己個位，同時都向韻喬抗議「你個死cheap人，就同我睇住嚟啦，我一定會爭贏你咖！張韻喬！」

韻喬聽到嘉惠嘅說話之後就冇出聲，但係塊面就黑哂咁，搞到天殷都有少少驚。

而喺聽完一大輪佢有佢講、自己有自己講嘅對話之後，俊軒完全唔知畀咩反應「咩世界呀依家！？都唔知條女到底想點？！我咪話咗我唔鍾意佢囉，真係咁鬼唔化都有嘅！」
 




「Bro, I know how you feel, take care!」禮謙安慰俊軒道。俊軒點點頭道謝「I am fine，但係我都唔係你想象中咁脆弱。放心啦，我一定會記得你頭先同我講過嘅嘢，而且都一定做得到！」禮謙都拍一拍俊軒膊頭。
 
「噹噹噹噹….」八點十五分，學校上堂嘅鐘聲準時響起。因為今日學校有早會嘅關係，所以Ms張喺班房同大家點完名之後，就同大家落去禮堂。

但係有同學已經發現，今日Ms張嘅氣場好似有少少可怕。
 
同好多學校一樣，平時早會都係講廢話為主，有時候又會有專題講座，甚至有部分班別嘅表演等等，但係今日嘅早會，罕有地由陳校長親自主持，而且所講嘅嘅題目居然係學校嘅欺凌問題。
 
韻喬喺聽到呢個話題之後，面部顯得有少少尷尬，畢竟自己都面對過唔少校内欺凌問題，但因為自己係prefect嘅關係，早會要看住一班Form 3嘅學生，所以都唯有強忍自己淚水，去聽校長嘅說話。
 




而至於喺禮堂另外一邊，身為韻喬好姐妹嘅天殷，聽到題目之後，都非常擔心韻喬嘅情緒。但礙於自己都係prefect，而且都要管理一班Form 2嘅秩序，所以唯有不時遠望韻喬嘅方向，當係睇下韻喬點樣。
 
至於喺插班之後，不停欺凌韻喬嘅嘉惠，知道校長所講嘅題目係針對自己之後，面部表情顯得非常不悅，於是喺心裏面怒駡“呢個topic一定係Uncle Charles刻意安排咖啦！”。而其他非prefect嘅5A同學，就覺得嘉惠依家個樣好可怕。
 
至於班主任Ms張，面部就毫無表示，只係好專心咁聆聽早會嘅内容。
 
早會喺半個鍾左右就結束，全校老師同同學都返上班房準備上堂。而早會之後都係Ms張嘅中文堂。

喺再次同老師敬禮之後「各位同學，喺上堂之前，我想調幾個同學個位先…」Ms張返到班房第一件事就講咗呢兩句。
 




全班同學於是屏息靜待Ms張嘅調動。過咗一陣之後「黃嘉惠同學，請你同林俊軒同學調位。而程禮謙同學，請你同方文曦同學調位，依家即刻執埋書包去調。」幾位同學眼大大咁望住Ms張兩秒，然後就開始收拾細軟，調去新座位。

而嘉惠喺離開自己原先座位嘅時候，都用一個非常不友善嘅眼神，望向韻喬，哪怕就算Ms張喺度都好。當然，韻喬就冇理到嘉惠嘅反應。
 
「張韻喬同學，你以後就同林俊軒同學一齊坐。而李天殷同學，你就繼續坐喺張韻喬同學嘅後面。程禮謙同學，你依家就坐林俊軒同學後面，以後就同李天殷同學一齊坐！」Ms張繼續喺全班面前講。
 
「至於方文曦同學，你就坐黃嘉惠同學後面…」幾位同學於是就繼續搬動自己嘅物品，去自己個新座位度。而原先方文曦同學嘅位置，Ms張就決定暫時懸空。而過多幾分鐘，等幾位同學都安頓好哂之後……

（待續 ~）

IG link https://instagram.com/bear_big_big_writer