《愛在。貴族學園》: Ch 23 ~ 施壓 Part 3

Ch 23 ~ 施壓 Part 3（連載日期：2023/01/21）

「但校長、Ms Koo，我當然明白你地嘅意思，但係我最擔心嘅點係，我地係唔知道黃嘉惠同學喺被正式處理之前，會唔會再會對張韻喬同學，做啲咩違反校規或者欺凌嘅行為……」Ms張非常擔心咁講。

「不過，喺聽日班主任堂嘅時候，我都會先調位隔開兩個同學，另外我都會再要求黃同學喺小息嘅時候，去教員室外面同我解釋清楚成件事，之後再交由Ms Koo甚至校長你決定下一步嘅行動。」Ms張再講。
 
「可以，就跟你意思去做啦Ms張，然後訓導組再睇下可以點樣處理今次嘅事！」Ms Koo好快就認同咗Ms張嘅做法。但係，校長喺考慮咗一陣，就突然之間出聲話……

「一係咁啦兩位老師。其實我同黃同學嘅爸爸私底下有交情。不如咁啦，我自己打電話同黃生講，同時叫黃同學喺電話裏面親自解釋，等Ms張你嘅workload可以冇咁大先…」兩位老師聽到校長咁講，即刻變得好驚訝。
 




但陳校長好似都預計到，兩位老師聽到呢個關係之後一定會覺得好驚訝，而喺繼續講之前微微一笑...

「另外，喺聽日上堂打鐘之前，麻煩你地兩位老師都過一過嚟校長室，睇下我一陣聽完黃嘉惠同學嘅解釋之後，睇下可以點樣處理啦，唔該哂兩位老師！」
 
「唔該校長幫忙就真！」Ms Koo同Ms張道「咁校長，我同Ms張都係返去教員室先啦！」

「可以Ms Koo！」Ms張於是就同Ms Koo返上去教員室。

而喺兩位老師離開校長室之後，陳校長就親自打電話畀嘉惠嘅爸爸，就係想親自聽下嘉惠對欺凌韻喬嘅解釋...





「喂！Richard，陳校長呀，今日打畀你，係因為有少少關於嘉惠喺學校嘅事，唔知你依家方唔方便講兩句呢？」
 
黃生同陳校長其實份屬小學同學，兩個人喺足球場上面認識，之後喺上到中學同大學之後，直到依家各自喺商界同學界發展之後，周末都仲有一齊踢波嘅習慣。
 
「乜咁錯蕩阿Charles，我依家其實都ok嘅。不過Charles，我想知道，我地嘉惠係咪喺學校發生咗咩事，要校長你親自打電話同我……咦…..Charles，嘉惠啱啱放學返到屋企，你要唔要都同佢講兩句？」

黃生喺聽到開門聲，見到嘉惠喺門外行入大屋裏面，就同陳校長講。

而同一時間，嘉惠都有同爸爸打招呼「爸爸，我返嚟啦，但係點解你今日咁早返嘅？」「冇呀，公司冇咩特別嘢做，咪返嚟陪下你同媽咪囉！」
 




而上面短短嘅對話，全部都畀陳校長聽到「呀Richard，我啱啱好都有事需要搵嘉惠傾下，唔知你可唔可以叫佢嚟，同我講兩句咁話呢？」陳校長於是就提出相關要求「不過Richard呀，唔知你可唔可以開speaker？因為我有少少嘢我都想你聽埋先！」
 
「喔，好呀Charles你等等呀…….小嘉呀！你返到嚟就啱啦，新學校校長啱啱打電話嚟，話有事需要同你講兩句咁，你唔好返上房住先！」黃生喺電話嘅另一邊同嘉惠講，同時都按下speaker制。
 
「喔好呀……到底校長搵我咩事呢？係咪就咁聽就得咖啦？」嘉惠問黃生道，不過黃生冇回應嘉惠嘅問題，只係叫嘉惠同陳校長打招呼，然後嘉惠就講「喂，校長？我係嘉惠啊，請問校長你咩事要搵我同爸爸？」
 
「小嘉你好呀，其實都唔係話咩特別嘢嘅，就係想了解一下，唔知你轉咗過嚟我地學校幾日，習慣哂我地嘅校園生活未呢？而且又唔知你過得開唔開心呢？」陳校長首先關心嘅，就係嘉惠喺新學校嘅校園生活過得如何。
 
嘉惠對於校長用比較輕鬆嘅語氣嘅問候自己，自然都變的毫無顧忌，於是就照直講話...

「嗯……其實都幾好吖校長！Form 5A嘅同學對我都好好，而且Ms張同埋其他老師、同學都好用心咁幫我。同學們都對我好nice，基本上有咩我要注意嘅，佢地都已經同我講哂啦校長。」
 
「至於學校方面，雖然返放學依家都仲係遠咗少少，但依家算近市區比較方便。而且新學校勝在環境比以前嗰間學校幽靜，鳥語花香，人都反而比以前更加精神啲！」嘉惠繼續好興奮咁講，根本毫無危機意識。

（待續 ~）





IG link https://instagram.com/bear_big_big_writer