《愛在。貴族學園》: Ch 23 ~ 施壓 Part 4

Ch 23 ~ 施壓 Part 4（連載日期：2023/01/26）

「哈哈，咁樣都幾好呀小嘉你！既然小嘉你轉校之後，覺得呢度好過以前嘅話，就希望你真係可以忘記之前學校裏面嘅事，而俾心機喺度讀書，始終你爸爸都係社會上有名望嘅人，你學業表現都唔可以太過差！」陳校長就同嘉惠講。
 
「不過，嘉惠，就算我同你爸爸好熟都好，有一樣嘢做為校長我都必須要提醒你，我好希望你唔好再喺學校，去濫用你嘅家庭背景，或者用一個唔禮貌、唔友善甚至有惡意嘅方式，去同你所新認識嘅同學相處，咁嘅做法係其實好唔理想…」校長講完呢句之後，嘉惠成個身即刻因為感到不安而震咗一下。
 
「咪住先Charles，我想搞清楚一樣嘢先，你咁講嘅意思係，嘉惠喺學校…….？」黃生喺聽到陳校長呢句，同埋嘉惠奇妙嘅身體反應，都估到自己個女喺學校有事發生咗，於是就即刻追問陳校長嘅意思。
 
「嗱Richard，我就念在我地咁多年老朋友，我有話就不妨直說啦！」陳校長嘅語氣已經同頭先唔同，變得非常認真。





「就喺頭先，我收到嘉惠所讀嘅5A嘅班主任張老師投訴，話小嘉喺插班之後，涉嫌多次喺課室，使用歧視性嘅字眼，以及當衆喺課室，打傷一個屋企冇咁有錢嘅同學…」
 
嘉惠聽到陳校長將自己喺學校所做過嘅事，喺爸爸面前講出嚟之後，個身就比頭先仲震得犀利，但好快嘉惠嘅面色都由懼怕化成憤怒，因為佢覺得係張韻喬呢個窮家女將自己舉報畀Ms張知道。
 
至於黃生，佢喺聽到嘉惠喺學校，做過咁多錯事之後，就即刻睥住嘉惠，好似想表達自己嘅不滿之餘，仲要警告嘉惠一陣要從實招來嘅口氣。

同時，黃生都去問陳校長「Charles，我想問，你頭先所講嘅，都係呢幾日發生嘅事？」
 
「係呀。不過Richard，喺決定誰對誰錯，同下一步點做之前，我都想先聽一下小嘉嘅版本同解釋，因為學校嘅老師都係喺半個鐘之前，先收到同學嘅投訴，但基於事情嚴重，所以都要先同我報備。」陳校長道。





「黃嘉惠同學，麻煩請你合作同誠實，喺爸爸面前將你做過嘅事，同埋你做呢啲事情嘅原因同埋動機，清清楚楚咁同校長同埋Daddy交代。雖然我私底下認識你，但係基於你今次有觸犯校規嘅嫌疑，校長我今次必須要秉公辦理！」校長繼續加強警告嘉惠，同時都要嘉惠知道事態嚴重。
 
面對陳校長非常嚴厲嘅警告，嘉惠初時都好怕，完全係唔敢出聲，於是陳校長就喺電話裏面喂咗兩喂...

「黃嘉惠！既然校長都已經要求，麻煩你就將件事同校長講清楚佢啦！如果你冇做錯，或者覺得老師冤枉你嘅話，咁點解唔出聲以表清白呢？」黃生好唔耐煩咁同嘉惠講。
 
於是過多十秒左右，嘉惠最後都受唔住爸爸同校長壓力，就將事情嘅經過同生事嘅動機，一五一十咁講哂畀校長同爸爸知，包括上星期五嘅事，以及自己對韻喬出身嘅感覺。

黃生喺聽完個女嘅表述之後，塊面完全燶哂，表達出對嘉惠非常失望嘅情緒。
 




「嘉惠，我唔知你爸爸媽媽平時喺屋企，係點樣教你待人接物嘅方式同態度，但係如果你繼續抱住咁樣嘅價值觀嘅話，其實都會出先好大嘅問題，而今次之所以出問題，就係因為你啲待人接物嘅態度，引致到你觸犯到校規…」陳校長非常認真咁斥責嘉惠所犯嘅事。

（待續 ~）

IG link https://instagram.com/bear_big_big_writer