《愛在。貴族學園》: Ch 23 ~ 施壓 Part 2

Ch 23 ~ 施壓 Part 2（連載日期：2023/01/17）

Ms Koo冇等Ms張回應就再繼續講落去「所以我覺得，呢件事，可能需要由校長親自處理。但因為黃同學的確犯校規在先，我會要求校長，就黃同學掌摑張同學一事上，處罰黃同學。」
 
「至於喺校外發生嘅一part，我諗我都需要先同校長商量，我先可以知道要點樣處理，畢竟由學校處罰學校以外發生嘅事，的確比較困難。不過都請Ms張放心，我地都盡量喺我地老師嘅層級上處理呢件事…」

「知道，多謝Ms Koo先。但頭先我都已經同林同學、張同學解釋過，學校喺今次事件上嘅難處。不過我都想知道Ms Koo你，大概幾時會同校長講呢件事？」Ms張回答嘅同時，都想知道Ms Koo嘅部署。
 
「不如就依家啦Ms張？一來其實我依家手上嘅嘢都唔係好趕…」Ms Koo呢個教畜考慮咗一陣就話「但最重要嘅係，始終我地都唔知道，到底黃同學之後仲會唔會繼續喺學校内外針對張同學，所以為保校譽同避免加深同學之間嘅衝突，我地都要盡快處理。」
 




「咁Ms張你依家ok未？你ok嘅話，我就直接同你過去搵校長咖啦！」

「我ok呀，而且我今日都唔係太忙…」之後Ms Koo就返埋位，打intercom問校長有冇空閒時間見面。但出奇地獲得校長正面回應，於是兩位老師喺整理好資料之後，都好快前往校長室搵校長。
 
喺進入校長室閂好門之後，陳校長就笑住問Ms Koo同Ms張「Ms Koo，Ms張坐低先啦！」

「係！」就喺兩位老師就坐之後，陳校長就講「兩位老師，唔知你地咁急搵我，有何貴幹呢？」
 
「校長，我地搵你，其實係有學生嘅紀律問題，可能需要你幫手解決…」Ms Koo好客氣咁對陳校長講，但係陳校長就唔係好明白...





「咪住先Ms Koo？個別學生嘅紀律問題，唔係一直由你嘅訓導組負責咩？做咩要放到上嚟我個層面去處理？」

「如果係平時嘅話，我對自己絕對有信心可以解決到…」Ms Koo又喺度開始同陳校長hard sell自己辦事能力高，但Ms張就對於Ms Koo拖延時間而深感不滿。

「但係今次呢件事涉及嘅人，唔係咁簡單，喺我同Ms張都係商量過之後，先決定交由校長你介入…」

校長聽完Ms Koo咁講就即刻問「咁請問係同邊位同學有關呢？」

「今次嘅事，其實就係關於5A嘅黃嘉惠同學，喺佢早前轉校入嚟之後，對同班嘅張韻喬同林俊軒同學，喺學校内外所發生嘅紀律問題事件。」Ms Koo簡單解答陳校長嘅提問。
 




「Ms Koo，你係話黃嘉惠同學同張韻喬同學？佢地兩個之間究竟發生過咩事，而引申到有紀律問題出現？」陳校長忽然若有所思咁講「畢竟一個係新嚟嘅轉校生，一個係全校老師心中嘅寵兒，照道理唔應該會有嚴重紀律問題要我處理咖喎？」
 
「校長，當初喺我聽到有呢件事嘅時候，我都唔太相信Ms張嘅說話，至於發生咗咩事，呢個不如交畀5A班主任Ms張嘅錄音去解釋啦？」「好！」

「Ms張咁你播段錄音畀校長聽先！」Ms Koo示意Ms張replay頭先俊軒佢地嘅錄音内容。
 
校長一路聽，就一路搖搖頭，而且眉頭深鎖，喺知道錄音播完之後，校長就即刻問Ms張「我想問下Ms張，請問你聽咗黃嘉惠同學嘅解釋未呢？因為喺呢段錄音裏面，我好似聽唔到黃同學把聲。」
 
「校長我其實未聽嘉惠嘅解釋，因為喺錄音帶中出現嘅四位同學，都係喺頭先放咗學之後，先上去教員室同我講呢件事。」

「我明白校長你嘅意思，而且我都認為自己身為佢地嘅班主任，我都覺得需要喺聽日畀機會黃同學解釋件事，先至再決定下一步要點做…」Ms張回答陳校長嘅問題。

「咁你呢個當然係必須啦Ms張，始終我地都唔可以單憑四個人同時指證，就去處罰黃同學，咁樣對黃同學係未審先判，係非常唔公平！」Ms Koo道。

（待續 ~）





IG link https://instagram.com/bear_big_big_writer