《愛在。貴族學園》: Ch 23 ~ 施壓 Part 1

Ch 23 ~ 施壓 Part 1（連載日期：2023/01/13）

時間返番去同一日嘅下晝，當俊軒同韻喬佢地四個，喺放咗學見完班主任Ms張之後，少有處理學生紀律問題嘅Ms張喺教員室裏面，就即刻同訓導主任Ms Koo，討論嘉惠欺凌韻喬嘅事「Ms Koo呀，唔好意思打搞你，我想請問你依家得唔得閒講兩句？」

坐喺座位度處理緊領袖生記名紀錄嘅Ms Koo，就用非常好奇嘅語氣咁問「Ms張你搵我有事？」

「係呀Ms Koo，因為我嗰班有個同學，懷疑有紀律問題，而畀同班嘅其他同學投訴，而且我聽完之後，我覺得學校係需要即時處理，所以我想問下Ms Koo你依家可唔可以抽少少時間，聽下頭先幾位同學嘅投訴…」

Ms Koo聽到Ms張講，話係自己嗰班有同學有紀律問題之後，就即刻放低支筆同手上嘅紀錄，然後用一個不可置信嘅語氣反問Ms張「Ms張，我究竟有冇聽錯？你話你Form 5A有同學有紀律問題？」





Ms張於是就點點頭話「係真嘅Ms Koo，初時我聽到嘅時候都唔敢相信，不過我幾位學生都講得好仔細，所以我諗都好大機會係真…」

「但係今屆嘅5A，可以話係近年最乖嘅一班，點可能會有紀律問題呀？」Ms Koo依然都唔係太相信Ms張嘅說話。

「所以我先話我都好奇怪，點解我嗰班突然之間有紀律問題…」Ms張回應道「不過，我都已經將重點mark好咗，就等睇下Ms Koo你有冇時間可以聽下學生投訴嘅内容先！」

經過Ms張咁樣講，Ms Koo終於都對5A嘅問題有少少興趣「但係班學生呢？佢地喺出面等緊我地？」

「唔係呀Ms Koo，佢地已經放咗學。」





「咁佢地放咗學，我又點聽佢地投訴呀？」Ms Koo有少少唔耐煩咁反問Ms張。

「呃…你放心啦Ms Koo，頭先我都已經將佢地投訴嘅内容，用錄音筆錄起，所以先至想請問你可唔可以抽少少時間畀我，去聽下錄音嘅内容先！」畢竟Ms Koo喺學校裏面，都係非常資深嘅前輩，而且深受校長器重，所以身為後輩嘅Ms張，都要對Ms Koo非常客氣。

Ms Koo考慮咗一陣之後就話「咁好啦Ms張，我地去board room度傾，我暫時都唔想畀其他同事聽到。」

「好嘅，唔該Ms Koo！」Ms張於是就返埋自己個位，準備定錄音筆同筆記簿，等睇下Ms Koo要點處理嘉惠。

當Ms Koo準備好之後，Ms張就開始播返頭先俊軒佢地上去搵自己嘅錄音。





Ms Koo一邊聽内容，一邊節錄重點，而且去到某一啲情節比較嚴重嘅時候，Ms Koo都搖一搖頭，表示不能同意相關嘅行為。
 
而喺Ms Koo聽哂錄音嘅内容後，就即時整理一下筆錄嘅重點。然後就同Ms張講話「喺聽哂林俊軒同學整個陳述之後，喺牌面上一定係黃嘉惠同學唔啱，始終喺學校打同學同言語欺凌，都係相當嚴重嘅事…」

「但係，我相信Ms張你自己都應該好清楚，黃嘉惠同學…嘅身份都有少少特殊，之前喺黃同學上嚟見校長同我地嘅時候，校長都應該有同你解釋過，佢地之間嘅關係啦。至於張韻喬同學，同樣你都應該知道，佢喺學校嘅特殊身份同喺同學之間嘅名氣。」「係…」
 
「不過Ms張，趁依家得我地兩個，我都唔怕同你坦白再講多少少。喺黃嘉惠同學入學之前，佢爸爸黃生係親自打電話，請求陳校長畀黃同學入嚟插班。而且你都知道黃生喺社會上，都有相當崇高嘅地位，所以陳校長最後都決定破例容許黃同學插入5A班。反而其實我地手上，仲有另一個插班生申請，但遲遲未能獲得校長嘅批准，就已經知道咩事。」
 
畢業之後，本來對教育有滿腔熱誠嘅Ms張，喺聽到Ms Koo親口講出如斯教畜嘅說話之後，心裏面都覺得非常無奈。但基於Ms Koo嘅地位喺自己之上，所以Ms張都只係全盤接受。

（待續 ~）

IG link https://instagram.com/bear_big_big_writer