《愛在。貴族學園》: Ch 22 ~ 心動 Part 6

Ch 22 ~ 心動 Part 6（連載日期：2023/01/06）

雖然如此，但係韻喬依然都想嘗試開脫，仲喺張太面前力數俊軒嘅缺點「媽咪呀！你諗多咗啦！我又點會無啦啦鍾意咗佢先得咖？之前佢呀成日喺學校調戲其他女同學，莎莎滾咁，花心到死！」但喺講完之後，韻喬塊面依舊都係紅卟卟。

張太聽到之後哈哈大笑「之前喺點都唔重要，但係依家呢？個男仔依家仲有冇咁樣做呀？」

韻喬諗返起自從要開始冒認係俊軒嘅“女朋友”之後，俊軒都刻意同其他女同學保持距離，而且好多時候都陪喺自己身邊，所以就搖搖頭回答張太嘅問題。
 
「咁如果依家冇嘅話，媽媽會覺得……呢個男仔都可能對你有意思，然後可能都為你而做出改變呢？」韻喬聽到張太呢句之後好驚訝「而且……既然個男仔都已經做到咁出面囉，你媽媽我覺得呀，會唔會係你個傻女，一直對於愛情呢方面，其實諗得太少啦！」





韻喬喺聽到媽媽咁同自己講野之後，都表示難以置信「唔......唔會咖！？我……我咁快去諗呢啲做咩喎！」

殊不知，張太就繼續講「其實我同爸爸都好奇怪，點解明明呀女你條件咁好，都冇聽過話你有鍾意嘅男仔，又或者有男仔追你嘅？」

張太嘅連串問題，基本上一下子點中哂韻喬嘅要害。不過，韻喬依然都要喺度嘴硬「咁係因為我自己覺得，咁多男仔喺我身邊喺度團團轉，真係好煩呀嘛！所以咪推哂佢地囉！」

但係聽完個女咁樣講，張太就蠱惑咁再追問「咁啫係小喬你喺學校有男仔追你啦？」

「你可以話係啦，而且都有好多……呃我都係唔講啦，我……我去沖涼先啦！」於是韻喬就去準備沖涼嘅用品，順便想盡快完結呢個令自己非常難堪嘅話題。





但係，張太喺離開韻喬間房之前，再語重心長咁同韻喬講多次「阿女，如果你真係鍾意咗人，你咪同爸爸媽媽認咗佢囉！而且時代都已經唔同爸爸媽媽以前嗰個年代咖啦，依家女仔去主動追求心儀嘅男仔，都好平常咖咋！」
 
「不過，媽媽唔係話咩，只要你可以好好咁，將感情同學業嘅時間分配好，我同爸爸都唔會反對你去識男仔，甚至拍拖。當然應承個男仔嘅前提，就係呢個男仔係真心愛你同對你好，而你自己都係真心咁愛佢。」
 
「媽媽自己就覺得，機會永遠都唔會等人嘅。如果你依家再唔敢去面對，或者勇於承認，呢個越來越強烈嘅諗法嘅話，你就有可能會後悔一世咖。一陣間沖完涼，小喬你自己好好咁諗下啦！」說罷張太就出番客廳睇電視，留低韻喬一個呆坐床上。不過韻喬好快就走入浴室沖涼。
 
喺打開水龍頭過後，花灑嘅熱水徐徐咁，流過韻喬嘅秀髮同肌膚，但係韻喬就再一次陷入回憶嘅漩渦，諗番起近期所發生嘅事。
 
呢啲回憶，包括自己第一眼喺學校見到俊軒，被綁架去林家大宅，見俊軒家長冒認對方“女朋友”、因為發高燒引致肺炎入醫院、星期五晚郭氏party，以及仲發生緊嘅俊軒禮謙大戰，同埋今日喺圖書館嘅事。然後韻喬諗起……
 




“如果你依家再唔敢去面對，或者勇於承認，呢個越來越強烈嘅諗法嘅話，你就有可能會後悔一世咖”
 
但喺諗起張太頭先最後嘅一句話之後，韻喬嘅身體再度灼熱起嚟，同時心裏面有一種對戀愛嘅渴望，突然之間熱烈咁爆發出嚟。或者，喺韻喬嘅大腦控制室裏面，情感小精靈再度發功，而且將自尊同理智壓制住。

又或者換句話講，韻喬嘅情感認知終於萌芽，發現自己經過一連串同俊軒嘅相處之後，韻喬都終於被對方嘅認真打動，而對俊軒心動起嚟。

（待續 ~）

IG link https://instagram.com/bear_big_big_writer