《愛在。貴族學園》: Ch 22 ~ 心動 Part 5

Ch 22 ~ 心動 Part 5（連載日期：2023/01/04）

「小喬以後你唔好再喺洗手間搞咁耐啦，快快手冲好個涼咪算囉！仲有呀，記得每日換衫之前，記得要睇天氣報告呀！知道未呀？」

韻喬聽到之後當然有同父母道歉「知道啦爸爸媽媽，真係好對唔住呀，我以後都會注意咖啦！」
 
除咗呢啲之外，可以攤上張家飯枱上面講嘅，離不開都係韻喬嘅成績，同埋韻喬喺學校嘅生活過得如何，韻喬都有講畀父母知。

但係，近日發生嘅俊軒vs禮謙求愛大作戰，以及新同學黃嘉惠羞辱自己嘅事，韻喬都隻字不提，一來唔想自己難過亂諗嘢。二來都係唔想父母太過擔心。
 




喺食完飯之後，韻喬就好乖咁，幫手將餐具執好同幫手洗碗。而喺洗完碗之後，韻喬就返入自己間房度溫習，順便等自己可以抖下先去冲涼。
 
不過，韻喬今晚用咗好耐時間，都集中唔到精神溫書。但係原因都非常簡單直接，唔使講都知道係因為同晏晝圖書館件事，以及嘉惠嘅問題有關啦。韻喬於是就放低書同托起頭，自言自語咁話…
 
「張韻喬！你到底依家喺度做咩呀？！你點解會對嗰個花心到死嘅賤人，會有亂紅心跳嘅感覺咖？」
 
「而且，點解最近就算你冇同佢見面嘅時候，佢塊面好似都成日會喺你嘅腦海度，然後又突然之間出現咁，然後好快又會消失咁嘅？」
 
「點解當你一對住佢嘅時候，你個身體都會好似不受控、着咗火咁熱呢？！然後仲會好似頭先喺圖書館同喺車上面咁，不自覺咁哄埋去林俊軒度。點解呀？點解呀張韻喬？！」講到呢度，韻喬就變得自己嘅思緒越嚟越迷茫，甚至開始將書掟向自己張床度。





一直喺客廳度睇電視嘅張太，聽到韻喬間房傳出以上嘅獨白，於是同老公打個眼色之後就問「（老公呀，個女唔知係咪十月芥菜呀，然後頭先喺度自言自語，不如我去開解下佢，睇下可以點樣幫佢好冇？）」

「（但係老婆，乜個女……最近有同男同學行得好埋咩？）」張生非常奇怪咁反問張太，但張太就表示唔知情「（小喬冇同我講過呀，而且佢一直都覺得太多人追好煩咖喎，又會突然之間咁大轉變都有嘅？）」

「（哈哈，老婆，今次就拜托你啦！）」張生笑笑口咁講「（但係我覺得，如果小喬真係有鍾意一個男仔，而且想拍拖嘅話，我都覺得好正常嘅，畢竟個女都已經16歲啦，對愛情點都會有憧憬嘅…）」

「（老公呢個我都知嘅，不過就算小喬真係拍拖都好，我都要小喬佢唔好掛住拍拖咖啦！）」

張太同張生商量完之後，於是就走入去韻喬間房搵個女，開解下佢「傻女，咁係因為你鍾意咗佢！所以先會有以上嘅感覺咋嘛！」
 




「呃……媽媽！你……全部都……聽到哂呀？！」韻喬一聽到張太把聲喺後面傳出之後，就即刻擰去後面，然後煞有介事咁望向佢，而且成塊塊面紅哂，又頭耷耷咁唔敢望住張太。
 
「哈哈！傻妹你頭先講得咁大聲，而且又喺度掟哂書咁，間屋又唔係大，我同爸爸就梗係聽到啦！」張太微笑咁回答韻喬，然後坐喺韻喬張床上，再將韻喬拉入自己懷内，因為張太知道，依家就係要關心韻喬，而唔係怪責個女嘅時候。
 
不過，韻喬依家嘅表情完全冇放鬆到，依然都係非常驚恐，所以張太都要氹下韻喬...

「哈哈，你唔使咁驚喎，小喬。不過媽子我都係想知道，到底係邊個男仔咁神通廣大，可以令到我地張韻喬，為咗佢而搞到自己神魂顛倒呢？」張太繼續笑笑口道。

（待續 ~）

IG link https://instagram.com/bear_big_big_writer