《愛在。貴族學園》: Ch 22 ~ 心動 Part 4

Ch 22 ~ 心動 Part 4（連載日期：2022/12/31）

「小軒！」

「嗯？小喬你做咩呀？」俊軒一面奇怪咁，望住面紅紅嘅韻喬。但係，韻喬又一次好似頭先喺圖書館嘅時候一樣，將自己哄到好近俊軒，然後就突然之間錫咗俊軒塊面一啖。

韻喬喺放開口之後，只係好簡單咁講咗一句「聽日見啦，bye bye！」

俊軒喺未反應得切之前，韻喬就已經離開咗林家座駕，返到福生大廈嘅大堂裏面。而同時司機都已經準備好，將車開返去林家大宅。





喺車上面，俊軒完全唔知道，韻喬突然之間錫自己嘅目的係咩。

但係，韻喬嘴唇嘅溫度，一直停留喺俊軒嘅面上，久久都揮之不去，直到俊軒返到林家大宅、食完飯坐喺書枱面前溫習嘅時候，俊軒依然都冇辦法理解，韻喬點解會突然之間再一次錫自己。「小喬佢最近…做咩呢？點解佢依家都冇任何表示呢…」

而喺另一邊箱，韻喬好快就返到自己屋企，一打開門就聽到厨房裏面傳出炒餸嘅聲音。

「媽，我返嚟啦！」韻喬習慣如果屋企有人嘅話，一番到屋企就一定會大叫自己返到。
 
「阿女，你放學返嚟啦？做咩今晚咁夜先返嘅？定係你又放咗學之後自己一個走咗去行街呀？」張太一邊喺厨房裏面炒菜，一邊問喺度換上拖鞋嘅韻喬。
 




「冇呀媽咪。我頭先留喺學校圖書館，搵資料做功課同整筆記，然後又借咗兩本書返嚟睇，而且頭先又塞車喎，所以我先咁夜番啫…」

但喺韻喬回答之時，韻喬都聞到厨房傳來陣陣飯香，於是就好興奮咁話「咦！好香喔，媽咪你炒緊咩呀？我好掛住你煮嘅嘢呀！」
 
「就普通炒菜心啫，又唔係咩特別嘢，你都識炒啦！」張太答返韻喬，但係好快就...

「哦！你個衰女包梗係趁我同daddy去咗出差，然後餐餐出去食飯呀？」張太故意喺度扮嬲咁講。
 
「冤……冤枉呀媽咪！除咗住喺醫院嗰排，同出院之後有一晚同班同學出去打邊爐之外，其他時間我都有自己煮飯咖！」韻喬當然要幫自己辯護，同時嘛，都要搵位贊下張太「不過都係媽咪你煮會好食好多，所以嘛，咪話掛住你煮嘅飯囉！？」
 




「最好係啦下！冇見你個衰女一排，把口就好似啷過油咁！快啲去洗手換衫，準備食飯啦！仲有幫手開飯呀！」張太繼續炒餸道。
 
「知道啦！」講完之後，韻喬就先返房放低書包同換上睡衣，然後仲要幫張太手開飯。喺等張生都返到屋企之後，張家三口都開始食夜晚飯。
 
正常張家佢地食飯都會睇下電視，但係今晚食飯嘅時候，張氏夫婦都同韻喬，分享返去駐馬店公幹期間，所發生嘅有趣事情。

「其實駐馬店係咪有好多馬賣咖？」聰明嘅韻喬問咗一個好白癡嘅問題，引得父母哈哈大笑。
 
「梗係唔係啦傻妹」張生回答韻喬嘅有趣問題「因為喺古代嘅中國，唔會有汽車可以用，而如果官宦要出差嘅話，就只可以騎馬。而因為呢個地方，都係啲馬匹嘅中途休息站，所以呢，就叫做駐馬店，而唔係有好多馬賣呀！」

「原來係咁！不過搞咗咁大個笑話出嚟，真係唔好意思呢!」韻喬得知自己搞錯之後，就即刻掩住半邊嘴笑。

不過去到後面，張太就趁機教訓韻喬，點解唔好好照顧自己，搞到自己病要入醫院，而要遠在河南嘅兩老擔心。

（待續 ~）





IG link https://instagram.com/bear_big_big_writer