《愛在。貴族學園》: Ch 22 ~ 心動 Part 3

Ch 22 ~ 心動 Part 3（連載日期：2022/12/28）

「小喬呀，依家放工時間好難搭巴士咖，不如……我送你返屋企啦，好嗎？」

韻喬聽到俊軒咁講之後，塊面即刻紅哂，然後反問「下！？唔使啦，我平時遲咗放學嘅話，我都係咁樣等巴士返去咖啦，所以我……自己ok咖啦！」

「但係，我唔想你咁辛苦，喺巴士站度等一大輪，然後又要塞住車咁企返去北角喎！」俊軒即刻繼續慫恿韻喬坐自己嘅座駕返去。

韻喬於是又話「但係我地……」





「就係因為我地兩個雖然依家唔係真，呃應該話未係真正嘅情侶關係，但係喺變成真之前，我地都要繼續演落去咖嘛，況且呢件事都已經喺學校揚咗出去，我地就更加要做得更似。但最重要嘅問題係，你上個禮拜先好返出院，所以我…….都係唔係太放心你！」

畀俊軒咁樣講一講，韻喬心裏面都開始軟化，而且情感話畀自己聽，應該要畀多啲機會自己，去等俊軒可以關心同錫自己，所以最後韻喬就話「咁好啦，就畀你送我返去啦，麻煩哂你先啦小軒！」

喺天殷去完洗手間出嚟之後，三個人就互相道別，天殷就上咗李家嘅座駕，而韻喬就偷偷地，喺天殷唔知情嘅情況之下，跟咗林家嘅座駕返屋企。

喺車上面，相對於之前嘅“見家長”飯局，俊軒同韻喬又一次坐得好埋，務求做出一種情侶嘅感覺。而俊軒都有拖住韻喬隻手，只不過今次韻喬就冇縮開隻手，任由俊軒拖住自己。

但係唔知俊軒係咪見到韻喬好似有少少攰，於是就拉咗韻喬去自己心口面前，然後再摸一摸對方額頭話「小喬啊，如果你覺得攰嘅話，你就挨落嚟休息下啦，一陣返到北角嘅時候，我再叫醒你啦，好冇？」





韻喬二話不說就點點頭，然後就將自己個頭，挨落去俊軒嘅心口附近，然後就瞇起自己嘅雙眼休息。而就喺韻喬訓覺嘅時候，雖然俊軒都不停咁，試圖令自己嘅心跳冷靜落嚟。

但係今次係俊軒同韻喬兩個，唔計之前kiss嘅話，暫時喺身體上最親密嘅接觸，所以俊軒點都有啲緊張。

不過同一時間，訓緊覺嘅韻喬似乎好享受依家訓喺俊軒心口嘅一刻，除咗露出迷人嘅微笑之外，韻喬塊面都變得越來越紅，明顯韻喬都喺度感受到俊軒緊張嘅心跳。俊軒為咗等韻喬可以訓得更加安心，於是就再進一步，慢慢伸手攬一攬韻喬。

韻喬於是就自己調整一下位置，等自己再訓得舒服啲之餘，仲可以好好咁享受住俊軒環抱自己所提供嘅安全感，但係一路嘅動作，韻喬都冇抗拒俊軒咁做。

但結果係，今日香港仔隧道又一次塞車，所以司機都用多咗唔少時間，先可以返到北角。喺司機將車停穩之後，俊軒就輕輕力咁叫醒韻喬「小喬，小喬，起身啦，我地到你屋企樓下啦！」





韻喬聽到之後，就好似有少少唔情願咁起身「下，咁快就返到啦？」

「唔快咖啦小喬，我地頭先仲要塞咗好耐車，先出到去銅鑼灣海皮呢！」俊軒一面苦笑咁回應，同時都幫韻喬孭返好自己個書包。

韻喬喺臨落車之前，就好怕醜咁同俊軒講「小軒，今日真係……唔該哂你，又要麻煩你幫我做咁多嘢，而且又阻住你啲時間咁，真係唔好意思呀…」

「唔好咁講啦小喬，呢啲都好小事啫，傻妹，最重要嘅係你開心呀嘛！」俊軒好大方咁回應，韻喬就已經有少少面紅。

「無論之後嘅事點都好，我都會陪你一齊面對咖嘛，知道未？」俊軒又摸一摸韻喬個額頭，搞到韻喬塊面又更加紅「咁……聽日返到學校見啦！」

「小軒！」喺準備落車之前，韻喬突然之間叫住俊軒。

（待續 ~）

IG link https://instagram.com/bear_big_big_writer