《愛在。貴族學園》: Ch 21 ~ 一巴掌 Part 4

Ch 21 ~ 一巴掌 Part 4（連載日期：2022/11/18）

「哈哈，喬喬你真係乖啦，實實在在一個孝順女呢！」天殷一邊講一邊繼續喺度拖地。

「還好啦。係啦，我爸爸媽媽尋晚話，要多謝你地幾個，之前喺我肺炎入醫院嗰陣，照顧得我咁好，話遲啲要請你地幾個食飯，當係還番人情畀你地喎！」韻喬坐低喺位之後繼續講。
 
而喺呢個時候，返到學校嘅俊軒就打開班房門口「早晨呀幾位！咦，一早就圍埋喺度吹水呀！？傾緊啲咩呀你地？」

天殷、禮謙、韻喬三個都一齊講「早晨呀小軒！」「冇呀小軒，啱啱講緊話我媽媽想多謝你地幾個，之前幫忙照過我吖嘛，所以話遲啲想請你地食飯喎，當係還人情畀你地喎」韻喬好開心咁同俊軒講。
 




「噢，原來呀，不過小喬你就叫auntie唔使咁客氣啦！」俊軒搭住韻喬膊頭道，搞到韻喬塊面都好紅。

而禮謙都即刻問「咦，你爸爸媽媽返咗嚟啦？」

「係呀，咪就係尋晚嘅事囉，佢地坐高鐵返嚟嘅！」韻喬點點頭回應，同一時間天殷都已經拖完地。
 
「高鐵呀！我都冇坐過喎，係咪真係跑得好快咖？」未接觸過呢個交通工具嘅天殷非常興奮，好似好有興趣咁問韻喬。

食緊麵包嘅韻喬之後到好有興趣咁話「係呀！我之前坐過一次，真係行得好快，之後有機會嘅話，同你地一齊去試下啦！」





「好呀喬喬！」「小喬，今次我地都真係要多謝張uncle張auntie先啦！而且我地都真係冇幫過啲咩，都係見你有困難所以幫得幾多就幾多咋嘛…」禮謙同樣都一貫有禮咁，感謝韻喬父母嘅邀請。
 
「只不過呢，你以後真係要好好照顧自己呀張大小姐！邊有可能會有一個咁聰明，讀書成績又咁好，但係咁唔識照顧自己都有嘅？！」天殷和應咁講。

韻喬面上露出一個羞愧同感激嘅表情「喂呀殷殷呀！之前真係醜死人啦！當小妹我求下你，你地唔好再講啦！好嗎？」

俊軒佢地難得見到喺學校會求人嘅韻喬之後，就即刻先係好辛苦咁忍笑。

但最後佢地都忍唔住喺度大爆發，搞到韻喬個樣面紅紅之餘又好嬲，但係又好無助好可憐咁「喂呀！你地做咩仲喺度笑人喎！？」





一直都唔怕死，但應該話係唔識個死字點寫嘅俊軒，就即刻繼續取笑韻喬話「咁係因為小喬你係我地班嘅學霸吖嘛，一路以嚟都只有佢地求你教佢地做功課，或者喺quiz嘅時候通下水…」

「但依家居然見到小喬你因為唔想大家笑你，而走去求我地喎！你話係咪好笑啦？殷殷你同唔同意呀？」

「我同意呀軒仔！」天殷都再一次和應俊軒。韻喬見到之後就即刻嘟住個嘴，好嬲咁唔出聲。

天殷見到就即刻勸韻喬話「喬喬呀，其實你都真係要知道點照顧自己咖啦，如果唔係喺你未有男朋友照顧你之前，咁你點樣過呀？」

韻喬聽到之後都更加怕醜咁喺度抗議「喂呀！我真係知道點照顧自己咖！」

「得啦，總之你自己記住就得啦，如果真係搞唔掂嘅話，就一定要出聲呀！知道未呀？」「知道啦長氣！」

俊軒講完呢句之後，佢地幾個就繼續一邊食早餐，一邊就嘻嘻哈哈咁傾計，但係快樂嘅時光，總會有終結嘅時候。

因為就喺呢一刻，上星期轉校嚟嘅黃嘉惠，都返到Form 5A班房。





不過嘉惠塊面好燶，表情就好似想食咗人咁，注意到嘉惠表情嘅其他同學，精神都即可緊蹦起嚟。

嘉惠佢一返到埋自己個位，喺放低自己個書包之後，就即刻一句都冇講，就走咗過嚟俊軒同韻喬佢地呢邊，然後二話不說就…….

「啪！」

（待續 ~）

IG link https://instagram.com/bear_big_big_writer