《愛在。貴族學園》: Ch 21 ~ 一巴掌 Part 3

Ch 21 ~ 一巴掌 Part 3（連載日期：2022/11/16）

「你話呢個人？我地識咖，而且仲要係我地5A嘅人嚟，大家都一定識。」

「咪住先謙謙，你唔好同我講呢個人係咩下話……」聽完禮謙咁講，再加上禮謙面上惶恐嘅表情，天殷隔咗一陣，大概都已經估到係邊個。

禮謙於是點點頭之後，就低頭嘆息話「你估得冇錯，天殷，呢個人就係小嘉，黃嘉惠同學！」

天殷聽到之後，就即刻噴出一口朱古力奶，但好在冇噴到去禮謙身上「小嘉！？唉呀呢次大獲啦OMG！咁……咁點算呀謙謙？！我怕一陣佢同小喬返到嚟之後，又會有事發生啊！」
 




「我都覺得會呀，我都覺得一陣嘉惠同學返到嚟之後，會搵韻喬同學麻煩，係一定會。然後，又可能再一次發生上個禮拜嘅事…」禮謙搖頭嘆息咁講，同時都注意到天殷搞出嘅大頭佛…

「不過天殷呀，你噴出嚟啲朱古力奶噴到一地都係，我使唔使去工友度，幫你攞個地拖入嚟，畀你拖返乾净個地啊？」

天殷聽到禮謙對自己咁好，就即刻勁唔好意思耷低頭咁話「好……好呀，唔該你呀謙謙！」

禮謙喺講完之後，就去搵工友度借地拖。不過佢都好快返到嚟，然後就將地拖交畀天殷。
 
「唔該你呀謙謙！」「唔使客氣！」天殷接過地拖之後，再一邊拖地細細聲問禮謙「不過謙謙呀，咁你將嗰晚嘉惠見到喬喬kiss佢嘅事，話咗畀軒仔知未呀？」





禮謙聽到之後好似有少少頭痛，於是就搖一搖頭好無奈咁話「我都仲未同佢講呀天殷。應該話……我都唔知點開口同佢講好。所以呢兩日，我都冇搵過軒少……」
 
「咁點解你喺星期五嗰晚，唔喺三人通話嗰陣，順便講埋佢呀？然後等大家呢兩日有時間可以一齊諗辦法點拆吖嘛！？」天殷立即好擔心咁追問禮謙。
 
「依家咁樣，就變咗畀嘉惠佔咗上鋒啦，無論佢一陣間做咩都好，喬喬同我地都要硬食，到時候就真係要靠我地嘅臨場反應，先可以幫到喬喬同軒仔啦！」天殷繼續好心急咁講。
 
禮謙呢個時侯就安慰天殷話「冇辦法啦，不過都唔緊要啦天殷，我地盡量幫嘅話，應該可以化解到問題嘅。喂！韻喬佢返到啦，我地唔好再講住啦！」而就喺呢個時候，韻喬就打開5A班房門口啦，然後慢慢行返自己位。

「早晨呀，禮謙、天殷！」韻喬依舊非常有禮貌咁同朋友打招呼。





不過，天殷同禮謙一臉驚慌回應「早......早......早晨呀，小喬…..」

韻喬聽到佢地咁嘅語氣之後，就一臉奇怪咁話「喂！你地兩個做咩呀？連講句早晨都講甩甩cut cut咁！？而且天殷……你做咩拎住個地拖，一碌木咁企喺度做咩呀？你頭先倒瀉嘢嚟呀？」

天殷依然戰戰兢兢咁話「我…..我冇咩呀事喬喬！不過，可能係我今朝未訓醒啦，所以頭先唔小心倒瀉咗少少水落個地下度，我一陣就會還返個地拖咖啦！」天殷都唔敢講自己頭先因為聽到啲關於韻喬咁爆嘅嘢而噴奶嘅事畀韻喬知道。
 
「咁你呢喬喬？休息咗兩日之後，你應該都……冇咩事啦嘛？」天殷依然心繫自己好姐妹，畢竟過去一段時間都發生咗咁多事...

「之前都已經咁多事發生，再加埋上個星期五嘅事，我都未有機會問侯過你，而且你都唔好再放喺心上啦！」
 
「嗯……我好好多啦，多謝李家大小姐你嘅關心啦。而且，我阿爸阿媽尋日都返咗嚟香港吖嘛，咁我咪喺屋企陪佢地傾下計、慰勞下佢地兩個咁囉，而且我聽到佢地講，佢地今次喺上面做野都做得好辛苦咁…」韻喬轉移話題之後，低下頭好擔心咁講。

（待續 ~）

IG link https://instagram.com/bear_big_big_writer