《愛在。貴族學園》: Ch 21 ~ 一巴掌 Part 5

Ch 21 ~ 一巴掌 Part 5（連載日期 2022/11/22）

「啪！」
 
呢一下清澈嘅聲音，令到5A其他同學即刻將視線，望向聲音嘅來源，而且都將手上做緊嘅功課，又或者喺度食緊嘅早餐通通放低，去留意一下到底發生咩事。
 
冇錯，嘉惠一返到班房，就無端端狠狠咁刮咗韻喬一巴。

俊軒同禮謙基於本能反應，即刻將嘉惠同韻喬隔開，而天殷就摸一摸韻喬被打嘅面兼且好擔心咁問「喬喬你有冇事呀？」但韻喬今次冇答佢，只係好嬲咁掩住自己畀嘉惠打傷嘅面，咩都冇講。
 




俊軒、天殷、禮謙佢地三個於是就同時質問嘉惠「黃嘉惠同學！你知唔知你依家喺度做咩！？做咩無啦啦打人一巴呀？！呢度係學校嚟咖？！知唔知係唔可以喺學校打人咖？！」

但同時間，原本冇出聲嘅韻喬都開始大喊「好痛啊！你做咩無啦啦……咁大力打我啊？我又冇得罪你啲咩！？」之後有兩滴眼淚由韻喬嘅眼角冒出。

嘉惠唔單止冇答到韻喬，仲擺脫禮謙嘅控制，上前一手捉住韻喬嘅衫領話「張韻喬你呢個賤人！！我問你呀！你嗰晚無端端做咩喺party度錫軒軒呀？！邊個畀你錫佢咖？！賤民？！你又唔係佢嘅女朋友！？」

俊軒聽到嘉惠咁講之後瞬即無名火起，怒氣衝衝咁去到嘉惠面前，並擋喺韻喬面前話「黃嘉惠！邊個畀你咁話小喬係賤人呀？！你有冇搞錯呀！？你估喺度真係有錢大哂呀依家？！」

但係俊軒認為，如果呢個時候唔做啲嘢去保護韻喬，搞不好韻喬一定會畀嘉惠蝦多兩錢重不特止，可能自己都唔會得到韻喬嘅芳心，於是就將自己呃林太嘅大話，改為呃全班「不過黃小姐，我應該未同你講過，其實小喬……真係我嘅女朋友，而且我媽媽都知道嘅。」
 




「既然佢係我女朋友，咁我都想問下你，小喬佢錫我又有咩問題呢？」講完之後，俊軒就拖起韻喬嘅手，同嘉惠（以及其他對韻喬有意思嘅男同學）“宣示主權”。

而同時，其他5A嘅同學，喺聽到俊軒嘅呢句話之後，都露出不能置信嘅表情。
 
韻喬當然都好識做，雖然真係冇同俊軒一齊到，但喺情感上，韻喬又覺得今次俊軒有做嘢去保護自己，所以韻喬都冇鬆開手，繼續心跳加速咁，暗自享受被拖手嘅呢一刻。

但表面上，韻喬嘅表情都好銳利咁同嘉惠互睥。

嘉惠對於眼前自己鍾意嘅男仔，大模斯樣咁拖住另一個女人嘅手，而且仲要係自己最討厭嘅女人嘅手，心裏面當然感到唔好受，於是眼紅紅咁問俊軒「林俊軒你……你居然同呢個賤人…...係……情侶關係？！但……你地之前又話……」





天殷冇等嘉惠講完呢句，就插嘴兼七情上面打斷對方話「係呀！我地係呃緊你啊！應該話呃哂全班同學啊，咁又點呀？！其實佢地一齊嘅事，我地都唔想喺學校有太多人知道，因為喬喬同軒仔兩個人，都係我地呢屆嘅模範生。」
 
「佢地嘅一舉一動，喺學校裏面都有人緊緊咁睇住，而且佢地嘅身邊，都有好多人圍住佢地。所以，如果佢地太過高調拍拖的話，我地都怕佢地兩個會畀其他人講好多閒話……」
 
「黃同學，雖然我地都認識唔係好耐，但其實我地都有眼睇得出，你好鍾意小軒，你仲好想得到佢。不過，既然小軒都有喬喬呢個女朋友囉，加上你又啱啱先轉校入嚟，我覺得你都無謂咁快就背住第三者嘅污名，然後走去拆散人地啦！」
 
「而且，你要做埋呢啲咁“破格”嘅行為嘅話，我恐怕…其他班嘅同學都會講我地班好多閒話，咁樣對5A其他嘅同學，都好似唔係好公平呢！」禮謙一臉正義咁，接住天殷指責嘉惠，畢竟自己都鍾意韻喬，幫口都係應分。
 
而俊軒就點點頭，一來認同佢地嘅講法，二來佢都要感謝兩個好朋友，幫自己同韻喬講好說話。

（待續 ~）

IG link https://instagram.com/bear_big_big_writer