《愛在。貴族學園》: Ch 21 ~ 一巴掌 Part 2

Ch 21 ~ 一巴掌 Part 2（連載日期：2022/11/14）

（Penana版700喜歡加更，多謝各位讀者一直嘅支持）

而到咗星期一嘅朝早，外面嘅天氣就更加涼，所以唔少同學都已經換上冬季校服，甚至有同學嘅早餐都由平時嘅三文治變成湯麵。

不過唔知點解，今日禮謙嘅情緒異常緊張，直到佢等到天殷返到Form 5A嘅班房之後，就好驚慌咁即刻捉住天殷。
 
「早晨呀謙謙！？喂你做咩一早就咁緊張嘅？你係咪有緊要嘢要同我講呀？」天殷咬住一份三文治，問好緊張咁捉住自己手臂嘅禮謙。
 




「早晨呀天殷，呀…捉得你好似太實真係唔好意思呀！」禮謙先同天殷道歉。

「呃唔緊要啦，咁到底……發生咩事啊？」天殷面紅紅咁問禮謙，始終……頭先都叫做同好朋友有肌膚之親。

「其實都算係嘅，本來我想星期六就同你講咖啦。不過，你話你去咗韻喬屋企度溫書做功課嘛，所以我咪冇同你講到囉！」禮謙回應道。
 
「但係喺我同你講之前，天殷你一定一定要應承我，喺你聽完之後，唔好有太大嘅反應喎！如果唔係，到時候又有人聽到，然後又有人講閒言閒語就唔係幾好啦！」禮謙又突然之間好凝重咁，同天殷講呢段說話。
 
「下！？咁你講下係關於啲咩嘅先？感情、學業定朋友上先？」天殷對眼瞪到大一大咁講，同時繼續咬住個三文治「而且，你一早就捉住我講啲聽落好爆嘅嘢，咁樣我會好驚咖喎大哥！」
 




天殷之所以話驚，係因為禮謙依然都係用一個非常認真嘅mode對住天殷「其實都係同嗰兩個有關係嘅。至於邊兩個啦喎，就當然喺你同我都認識咖啦！」
 
「你係話…喬喬同軒仔呀？！佢地兩個又發生咩事呀？係八卦吖定係又嗌交嚟呀？你好快啲講啦喎！」天殷古古惑惑咁講，同時都好心急咁等待禮謙嘅答案。
 
「全部都唔係呀！不過，我諗小喬和小軒都應該未知發生咩事吧！」聽到禮謙咁講之後，天殷成個人都即刻收起笑容，好凝重咁問「咁係發生咩事先，同埋，點解你會咁講呀謙謙？」

「咁我講啦！其實，喺星期五party嗰晚，當小喬突然之間喺會場外面，錫落小軒個嘴唇度嘅嗰一刹那，除咗我親眼見到之外，其實仲有另一個人喺附近，離遠睇到佢地兩個喺度kiss……」

「但係佢地兩人當時實在係太過投入啦，應該完全發現唔到有其他人嘅存在！所以喺俊軒同韻喬發現我喺度之後，佢地兩個都係好驚訝咁望住我！」禮謙今次一氣呵成咁，將呢句咁爆嘅嘢講出嚟畀天殷知道。





天殷聽到之後完全O哂嘴，露出一個不可思議嘅表情咁答禮謙「唔係呀嘛，你估依家拍戲咩謙謙？！呢啲咁狗血嘅套路，都可以發生喺你地身上！啊唔係，係喬喬同小軒兩個身上先真呀！」
 
「唉，我都唔想咖天殷，但係咪就係真係咁狗血囉！當晚喺我見到嘅時候，都不知道有幾咁尷尬，我都唔知將對眼放喺邊好。」

「但係，我就係因為見到呢樣嘢，所以呢兩晚都訓得唔係太好，睇嚟一陣間我都應該要落去買罐咖啡提神咖啦，如果唔係嘅話，一陣間上堂我實訓死都似！你自己睇下我個眼袋先啦天殷！」禮謙一邊講都指住自己兩個眼袋，非常無奈咁講。
 
「嘩！好大喎個眼袋，陰功囉謙謙王子！」天殷聽到禮謙好似好凄涼咁，就即刻哄到自己好埋去禮謙度研究下個眼袋，然後就再問禮謙...

「咁，你頭先咪話有人離遠見到嘅？咁……你知唔知嗰個人係邊個先？係咪都係我地識嘅人嚟咖？」同時天殷飲住包熱朱古力奶。

「你話呢個人？我地識咖，而且仲要係我地5A嘅人嚟，大家都一定識。」

（待續 ~）

IG link https://instagram.com/bear_big_big_writer