《愛在。貴族學園》: Ch 21 ~ 一巴掌 Part 1

Ch 21 ~ 一巴掌 Part 1（連載日期：2022/11/11）

喺郭氏派對之後嘅星期六，因為家住九龍嘅李家出開去香港島嘅關係，所以天殷就順便去韻喬屋企，拎返韻喬出席party而借嘅嗰一套晚裝返去之餘，同埋天殷都去韻喬屋企一齊溫書做功課。

但係喺開始溫書嘅時候，佢地兩個都冇再刻意討論星期五全日發生過嘅事。
 
不過，天殷心底裏依然好擔心韻喬嘅心情，所以喺做功課之前嘅時候，天殷都係忍唔住搭住韻喬膊頭話「喬喬呀，呢兩日發生嘅事呢，你就唔好再擺喺心上啦，就好似一直以嚟咁，你就將全副心機放返喺功課上面，繼續做好你嘅天才，然後喺quiz嘅carry下我仲好啦！」
 
「喂李天殷我冇事喎！乜你覺得我好有事咩依家？！定其實有事嗰個係你呀？!」韻喬冇天殷咁好氣，於是白眼反哂上天咁講...





「仲有呀，你又話嚟做功課嘅！？好心就快少少啦你，仲下下quiz嘅時候都要我carry你，唔好喺度浪費時間！」
 
「好囉，好歹我仲喺度咁擔心你！張韻喬你正一冇良心呀！」

「係啦係啦，對唔住啦殷殷，不過我真係冇……冇嘢呢！」之後天殷就去拎功課出嚟，同韻喬喺飯廳度一齊做，一做就做咗三個幾鐘。

「呀！好攰呀！殷殷呀，一唔一齊落去食飯，陪下我咁話呀？」一直好辛苦做功課嘅韻喬，伸一伸懶腰問天殷。

同樣都頭暈暈嘅天殷都即刻精神哂咁話「好呀喬喬，不如落去食壽司啦？我都好耐冇食過啦！」「好呀！」之後兩人就落去英皇道某間連鎖壽司店食壽司。
 




初時佢地兩個都食得好開心。但喺席間，原本話自己冇事嘅韻喬，突然之間都好想將自己可能喜歡俊軒嘅事，直接同天殷講。

不過去到最後，韻喬都冇鼓起到勇氣，講出自己嘅情感，因為怕自己嘅選擇，會傷害到佢地幾個好朋友之間嘅友情。
 
但係喺夜晚，俊軒突然之間喺Signal度搵韻喬，但結果搞到韻喬一時間都覺得好緊張。畢竟佢地兩個之前，都冇點試過喺電話裏面單對單傾計。

但係依家除咗講功課之外，佢地兩個都有傾下生活上嘅嘢，都令到韻喬開始慢慢對俊軒改觀，甚至好樂意同俊軒傾計。

而之後去到星期日，因為張生張太終於都去完駐馬店公幹返到香港，所以韻喬都冇出去搵朋友，而選擇喺留屋企準備，然後等張生張太返到屋企之後，陪下辛勤工作嘅爸爸媽媽，然後喺食晚飯嘅時候，韻喬都同父母講返，之前因為肺炎而入醫院嘅事。





「阿女，今次好在有一班同學識得照顧你咋，如果唔係真係等爸爸媽媽返嚟之前，都冇人照顧你嘅話，可能你就已經燒壞咗個腦啦！」張太一邊食飯，一邊教訓一直唔識照顧自己嘅韻喬。

「唉呀，得啦媽媽，我以後一定會照顧好自己咖啦！你就唔好咁長氣啦！」韻喬又喺度嫌抱怨自己大頭蝦嘅人，但係韻喬都知道，張太嘅出發點都係為自己好，所以先會咁長氣。

「小喬呀，既然你班同學今次幫咗你咁多，又願意犧牲自己放學之後嘅私人時間去陪你，不如等你放假嘅時候，爸爸媽媽請佢地食一餐飯，當係報答一下佢地嘅貢獻好冇呀？」

「我同意呀爸爸！咁大嘅人情，我地張家禮貌上，點都要還畀你啲同學咖嘛！」平日一向持家有道嘅張太，竟然咁快就同意張生嘅提議。

不過，韻喬就突然之間若有所思咁話「但係咁樣真係好咩？始終佢地……」

「阿女呀，我知道你喺度諗緊咩嘅！不過放心啦，少少錢爸爸媽媽都拎得出嘅，一餐半餐就無所謂啦！」張生好快就抱一抱韻喬，安慰下自己個女，等韻喬唔好拘泥於自己同其他人之間嘅身份問題。

韻喬都知自己一定講唔贏個爸爸，就唯有接受「咁好啦，我聽日返到學校同佢地講啦，咁我都代表佢地多謝爸爸媽媽先！」

「乖啦！咁你啲功課做好未呀？聽日又要準備返學啦喎？」張太問喺度食提子嘅韻喬。





「做好啦，不過我都要溫一陣書先！」講完之後，韻喬就幫手執好碗，先再返自己間房度溫書。

不過同尋晚唔同嘅係，今晚俊軒反而冇乜點搵過韻喬，搞到近日同俊軒成日相對嘅韻喬，竟然有少少唔習慣「呀，做咩個衰人唔搵我嘅？」

心思思嘅韻喬，雖然都好想俊軒搵自己傾計，但係結果等到夜晚11點幾，韻喬嘅電話都冇收過俊軒嘅訊息，所以韻喬最後都決定唔等，自己走去訓覺。

（待續 ~）

IG link https://instagram.com/bear_big_big_writer