《愛在。貴族學園》: Ch 20 ~ 心聲 Part 4

Ch 20 ~ 心聲 Part 4（連載日期：2022/11/01）

至於喺另一頭嘅北角福生大廈，今日經歷咗好多事情嘅韻喬，情緒久久都未能平復落嚟，畢竟由韻喬肺炎入院到依家，所發生嘅事情實在太多。

而喺韻喬嘅腦裡面，住咗幾位控制韻喬思想嘅精靈，精靈們定期都會為咗一啲關於韻喬嘅事而開會。
 
然而，因為今日發生咗“韻喬當衆擁抱及親吻俊軒事件”，於是精靈們必須召開緊急會議去商討對策。然而佢地開會嘅時間，居然係選擇喺韻喬沖涼、放鬆心情嘅嘅時間去開。

一直喺大腦控制韻喬絕大部分行為嘅理智，作為一直嘅會議主席，先召集幾位精靈入去會議室「好啦，各位精靈大臣，頭先嘅事搞到小喬同大家都兵荒馬亂，唔知大家對小喬呢個行為有咩睇法？」
 




自尊首先發表意見，但係語氣就好唔禮貌咁話「妖！一日都係你囉，理智！你依家仲好意思霸住嚟做會議主席咖喎！？如果唔係你頭先吞port嘅話，小喬頭先就唔會做埋啲咁樣嘅事啦！？」然後自尊就上前捉住理智嘅衫領。

理智喺面對自尊嘅武力威脅下，依然可以保持一貫理智嘅頭腦，然後就話「阿自尊呀，麻煩你放低我先。我到底做錯過啲咩啊？我只不過講係咗第一句啫，你都唔使即刻將把火燒落我度掛？！」

自尊放低理智嘅衫領之後，再一次好憤怒咁話「你仲好講喎！？如果你啊頭先唔係訓着咗嘅話，你覺得我地小喬就可以投懷送抱，仲要自己錫咗嗰個賤人一啖咩？！下？」

但係理智繼續好冰冷咁話「係，雖然我頭先係唔小心訓着咗，而令到小喬暫時失去理智一陣。但其實小喬喺整個party上面，頭腦都係清醒狀態咖喎，包括同其他人嘅對答都係一切正常，咁話說頭先我到底訓咗幾耐先？」但係冇其他精靈答得出理智嘅問題。
 
「嗱，答唔出即係唔一定關我事啦！不過我想分析嘅係，如果情感冇選擇到嗰個人嘅話，咁小喬照計都唔會做呢兩個行為咖喎！」理智繼續冷靜分析，同時將火頭撥向情感身上。





情感一邊飲茶一邊慢慢講「唉呀阿理智，你同自尊兩個都已經㩒住咗小喬對呢個人嘅情感都就快5年啦，後年小喬就中學畢業，要同呢班人分開咖啦，你地仲忍心唔畀佢承認互相喜歡對方咩？」

自尊聽到情感指責自己之後，就即刻嬲到爆炸「我同理智兩個唔畀佢承認咁又點樣呀？小喬嘅自身條件咁好，點解要自己向一個咁渣嘅男仔獻身喎！？」

情感都開始反駁「唔得囉！你地都應該記得好清楚咖啦，十幾年前小喬出世嗰陣，因為我係最後一個精靈進入小喬個大腦入面…」
 
「變咗小喬本身對情感嘅感官已經比較低，尤其係愛情嘅部分，更加係異常恐怖咁低呀，小喬根本就完全sense唔到自己想點！」
 
「所以，大家應該為咗小喬嘅終生幸福着想，自尊同理智，我就求下你地兩個，今次就放一放手啦，等到小喬真係結婚，又或者當個渣男真係做一啲，對我地小喬唔住嘅事情，先再出現啦！」





經過一番反復思量之後，一路喺會上都未講過嘢嘅智慧都決定表達意見，而且都語出驚人咁話「我想講，就一句好簡單。根據我嘅估計，自尊同埋理智兩個，已經就快唔可以控制到小喬啦。」

理智此刻斜視住智慧道「喂智慧！其實你到底知唔知自己喺度講緊咩咖？！咩叫做我同自尊都就快唔可以控制到小喬啊？」

自尊依然非常激動咁講，而且仲開始喺度拍枱狂閙「冇可能咖智慧！！小喬一直都好相信我同理智兩個，點可能我地兩個會就快對小喬失去控制先得咖？！」同時韻喬嘅情緒都因為大腦嘅激烈爭吵，開始有少少怪怪地，而且都已經開始頭痛。

（待續 ~）

IG link https://instagram.com/bear_big_big_writer