《愛在。貴族學園》: Ch 20 ~ 心聲 Part 3

Ch 20 ~ 心聲 Part 3（連載日期：2022/10/28）

聰明嘅俊軒，好快都意識到天殷嘅意思「殷殷講得冇錯，因為以我之前點樣花心、點樣用最輕佻嘅態度，去對身邊嘅女同學都好，小喬都可以完全冇反應，正如頭先殷殷都已經講過啦…」
 
「所以我自己覺得，要能夠提供足夠嘅新刺激，令到小喬覺得要採取行動嘅話，必定會係新出現嘅人同事。但係殷殷呀，其實我諗多兩層，真係覺得你嘅諗法，對小喬都有少少殘忍喎…你真係要咁樣對你好姐妹咩？」俊軒都好似突然之間諗到啲好恐怖嘅嘢…
 
「呃，其實你地兩個既然都已經講到咁，我覺得，我照天殷嘅語氣，我估到呢個可以幫到我地嘅人，就應該就係黃…….？」禮謙聽到呢度，終於明白到底俊軒同天殷嘅計劃係點。

而天殷對於兩個男仔估到自己想點做之後，都表示非常興奮「Marvellous！你地可以明白小妹到嘅意思就好啦。冇錯，經過今日一整日嘅考慮之後，我就係想試下到底嘉惠同學嘅行為，可唔可以刺激到小喬嘅情感思維啦…」





但係呢個時候，俊軒就若有所思咁講「但係殷殷呀，其實除咗頭先party發生嘅事之外，你地都知道今日5A班房裏面發生過咩事咖啦。我覺得咁樣做……好似有啲太殘忍啦喎殷殷！我真係唔想再要小喬面對呢啲霸凌行為呀！」
 
「軒少呀，呢啲嘢呢，殘忍就點都會有咖啦，頭先喬喬錫你嘅時候，對謙謙嚟講，何嘗都唔係殘忍咩？」天殷反駁俊軒嘅諗法「不過我覺得，如果單憑小嘉一個嘅話…應該都未必會有足夠效果刺激到小喬。」
 
「所以喺你地可以順順利利咁喺埋一齊之前，可能都要辛苦你付出下啦，而且付出都唔少咖，軒仔！」

「唉！」俊軒好無奈咁講「但係我覺得，為咗將你自己心愛嘅小喬追到手，我覺得都…值得啦！」天殷再一次接住俊軒講。
 
「不過天殷同學呀，聽你咁講，好似就想利用嘉惠同學啦，但係你會唔會同嘉惠同學去夾一下，要點做先會幫到軒仔同韻喬同學呀？」禮謙又再提出疑問。
 




「我諗我應該就唔會啦，你試下認真諗下喎，如果呢件事畀嘉惠同學知道咗嘅話，你覺得要同小喬搶軒仔嘅嘉惠，會咁順攤去幫我地呢？而且，就算我地畀嘉惠知道咗，而佢都話會全力配合嘅話，我就係覺得佢點都會有私心去搶軒少，結果到最後反而更加難控制…」天殷非常正經咁答。
 
「不過，其實今次呢個計劃，我地都會賭得好大，畢竟有嘉惠呢個最不確定嘅因素喺度。所以今次，軒仔你自己都要好好應對呀，如果唔係嘅話，受痛苦嘅人真係會有好多，希望你可以為你自己同喬喬嘅將來幸福而好好加油！」天殷繼續講。
 
「我知道啦，多謝你先，咁天殷你如果有咩部署，你同我開聲就得咖啦！我都一定會盡力配合啦！」俊軒拍哂心口咁講。
 
「你加油啦，軒少，如果有咩可以幫到你地同埋天殷嘅話，你地都可以隨時開聲同我講，得嘅話我都會出嚟幫手！」禮謙都有全力支持自己個死黨。
 
「多謝你地兩個先！之後呢兩日呢，我自己都會再諗下辦法咖啦。好啦兩位，時間都…..唔早啦，有咩要傾嘅話不如聽日先再講啦！啊…….好眼訓阿，唔得啦，早抖啦兩位！」天殷瞬間跌哂watt咁講。





「晚安啦！」俊軒同禮謙道。之後呢個三人通話就此結束。

天殷因為自己一返到屋企，只係除低套晚禮服就直接講電話，而且講講下都越來越眼訓，所以都第一時間去洗手間梳洗然後休息。

同韻喬一齊走嘅禮謙，因為一早已經返埋屋企嘅關係，自然喺講電話嘅時候，可以好舒服咁攤喺床上休息。

而今晚畀韻喬錫，但同時又有嘉惠追求自己嘅俊軒，心裏面已經亂到就快要入醫院嘅地步，因為佢自己都意想不到，以前一向拿捏感情問題都好好嘅自己，如今面對三角關係之時，居然會變得束手無策，無法將自己同兩個女仔喺漩渦越滾越大之前救出全部人

“到底我應該要點做，先可以同小喬一齊呢？”呢個，最近都係俊軒最大嘅苦惱。

（待續 ~）

IG link https://instagram.com/bear_big_big_writer