《愛在。貴族學園》: Ch 20 ~ 心聲 Part 5

Ch 20 ~ 心聲 Part 5（連載日期：2022/11/04）

智慧見情況唔係太好，而且怕過於激烈嘅動作，都會引起韻喬嘅注意力，於是都解釋自己嘅說話，等大腦裏面嘅情緒稍微降溫...

「你地兩個冷靜啲先啦！呢個世界呢，人會變月都會圓嘅！或者小喬其實已經開始意識到，自己有一啲問題出咗都唔出奇嘅！」

理智完全唔明白智慧嘅說話，於是R爆頭問對方「咁智慧呀，咁你知唔知小喬到底發現咗咩問題呢？照計一直喺我同自尊嘅聯合控制之下，小喬都唔會有太大問題咖喎？」

但係喺智慧回答理智之前，情感就插嘴話「理智，如果我冇估錯嘅話，肯定係小喬已經意識到，自己愛上咗小軒啦！甚至可能覺得自己，係時候需要一個依靠都唔出奇呢！」





智慧此時卻搖搖頭糾正情感「咁情感你又唔好咁武斷，憑住依家嘅症狀，就話小喬鍾意小軒先得。反而你後面嗰句呢，就有少少合理啦，所以我都同意情感嘅推測，話小喬慢慢發覺自己已經開始依賴緊小軒！」
 
「而且，小喬依家都開始慢慢唔畀理智同自尊撳住自己啦。所以，呢個都係表示咗小喬開始信賴自己嘅情感啦！」
 
「所以，我自己覺得，喺呢件事上面，理智同自尊，就唔好插手得太多啦，因為再加強對小喬大腦嘅控制，都已經冇咩用。」

「與其係咁，我就建議你地兩個為留番精力去負責其他事，包括喺學業上面，不過都偶爾幫下情感手啦。」
 
「因為小喬對情感嘅意識都仲係好弱，如果你兩個完全唔睇住情感點樣操作小喬大腦嘅話，我都怕有一日小喬會出事。」





「不過，情感你呢個後起之秀，以後真係要加油啦，小喬終生幸福……好大程度就要靠你啦！」智慧同時都搭一搭情感嘅膊頭以示支持。
 
自尊知道自己大勢已去，表示強烈不滿「唔可能咖！！我邊可能會對小喬失去控制先得咖？！我唔理，我要繼續坐我嘅control！！情感你同我坐返去後面！」然後開始大肆破壞會議室嘅設備。
 
「自尊！你就冷靜一下啦，唔好再為小喬添煩添亂啦？而且，情感用嘅系統都比你新呀，除非你都update一下你嘅系統啦……喂唔好再搗亂啦！」理智雖然捉住咗自尊，避免自尊進一步破壞大腦會議室同控制室裏面嘅設施。

但係腦内精靈會議室嘅劇烈震動，最終都使到韻喬脾氣暴怒。

「你地幾個真係好煩呀！！我一路喺度沖涼，你地幾個就一路喺度嘈嘈嘈！我呢排都已經夠煩咖啦，你地可唔可以畀我靜靜地咁沖埋個涼先啊！？」





一衆精靈見到韻喬突然之間對佢地發咁大脾氣，都表示大吃一驚，於是班精靈都死死地氣咁同認錯道「知道啦，咁我地走先啦，記得唔好沖太耐，如果唔係又會好容易冷親咖啦！」
 
韻喬冇再理到大腦裏面嘅精靈，而係繼續自己沖涼，唯一同頭先唔同嘅就係，已經離開會議室精靈們，還咗佢一個安靜嘅環境，等韻喬自己可以一個冇其他人嘅空間裏面，盡情咁釋放一下心情。
 
好快，韻喬就離開淋浴間，望住鏡入面嘅自己望咗好耐，而且都久久不發一言。然後，韻喬就再一次諗起，呢幾日所發生嘅所有事。

「點解我頭先會覺得，喺小軒嘅懷抱裏邊，會係全世界最安全、任由我發泄情緒嘅地方呢？」
 
「點解我頭先好唔開心嘅時候，又會突然間主動去錫佢呢？」
 
「點解我又會覺得，小軒佢一定有辦法，可以安慰到我呢？而我又一定會聽佢話嘅呢？」
 
「然後每次小軒同我單獨相處，或者哄到好埋嘅時候，點解我個心又會突然之間跳得好快！唔通，我應該……唔會……真係鐘意咗佢！？」
 
「啊啊啊…..但係佢平時又口花花，又成日撩女仔喎，應該唔會咖！我肯定唔會鍾意林俊軒咖！」




 
「唉唉唉，我都係唔好再亂諗啦，越諗就越煩呀！我都好好好咁做埋屋企野，搞完哂就早啲去休息，然後等爸爸媽媽返嚟啦！」

（待續 ~）

IG link https://instagram.com/bear_big_big_writer