《愛在。貴族學園》: Ch 20 ~ 心聲 Part 2

Ch 20 ~ 心聲 Part 2（連載日期：2022/10/25）

「而且軒仔，正如我頭先喺會場出面嘅時候，都已經同你講過，呢個世界仲有你去愛小喬，所以，我希望我割愛之後，林俊軒你可以好好幫我去愛小喬，好嗎？」

俊軒聽到禮謙咁講之後，即刻好大反應咁反對話「喂！頭先先咪話咗唔關你事囉！點解程禮謙你真係咁唔化都有嘅？」
 
天殷接住都認同俊軒話「軒仔其實講得啱呀，其實就算禮謙繼唔繼續爭都好，造成呢個局面最重要嘅原因，都唔關禮謙你嘅事，所以禮謙唔好再咁自責啦...」

「依家個問題係，我地或者喬喬社交嘅環境裏面，都冇嘢可以令到喬喬佢發覺到呢件事。不過我唔怕坦白同你地兩個講埋啦，軒仔其實你之前都刺激唔到佢。」





「下！？我覺得唔太可能呀喎殷殷！」俊軒今次又反駁返天殷嘅觀點「如果真係照你咁講，小喬佢一早就愛上咗我嘅話，咁平時喺佢見到我喺度調戲緊其他女同學嗰陣，點解佢又冇呷醋，又或者表達不滿嘅？」

天殷自己心裏面笑一笑，然後再平靜咁道出緣由「咳咳林俊軒！咁就係因為小喬佢雖然成日會睇好多書，當然都包括愛情小說啦，然後就算讀書成績再好都好，但係佢偏偏就係唔明白乜嘢係愛情…」
 
「仲有一樣嘢就係，小喬佢係感覺唔到自己嘅真正諗法，所以先至會冇去用言語表達自己鍾意邊個，而直接用咗潛意識去表達咋嘛。頭先小喬喺會場度，突然之間攬住同錫小軒嘅舉動，好明顯就係潛意識驅使肉體，直接去表達内心嘅情感。」

「咁其實係咪可以話，小喬同學係依家需要一件大事，去刺激到佢嘅情感神經，佢先至會明白自己嘅想法！而今日一連串發生嘅事，就足以挑動到小喬嘅潛意識，從而再直接用行動去表達？」禮謙再問天殷。

「我諗都應該係啦，因為頭先喺小喬錫我嘅時候，成件事都係非常突然，根本一啲先兆都冇。而且我由佢嘅表情、說話、動作睇落，根本都完全唔似平時嘅佢……」俊軒再次提到頭先發生喺會場外面發生嘅事。
 




「不過，既然係咁嘅話，咁我地應該做啲咩，去幫助小喬佢去面對呢樣嘢呢？又或者換個講法啦，到底喺佢身邊有咩人，可以幫手做到呢樣嘢呢？因為，我怕我地同小喬太熟，實在冇咩特別嘅事可以刺激到佢。」
 
「哈哈！林俊軒，其實我覺得……可以做到呢樣嘢嗰個人，都已經出現咗，而且我好肯定佢參與嘅話，都絕對會係一個狠角色，足以挑動到喬喬嘅神經…」天殷用自信嘅語氣回答。
 
「雖然咁樣做，就係對你同小喬之間嘅情感，甚至係之前咁辛苦建立返嘅友情，會殘忍咗少少，而且都唔一定控制到個結果。但係，為咗你地將來嘅長遠幸福，呢啲少少嘅考驗又等於啲咩呀？」
 
「你話呢個人已經出現咗！？而且會係一個狠角色？！咁天殷同學，我想問呢個人會唔會係我地學校嘅人？」禮謙非常驚訝咁問電話裏面嘅天殷，搞到天殷都笑一笑「你使唔使咁大反應呀程禮謙？！」「我都係擔心小喬啫！」
 
「放心啦謙謙，呢個狠角色絕對係我地學校嘅人。而且，我自己都有諗過，就算我再用曹家公子個後宮套路，叫俊軒再一次喺學校裏面，不停周旋喺班女同學之間，從而去刺激喬喬嘅情感，都唔會有咩太大嘅效果，最後都可能只會維持原狀…」天殷繼續搵論點，鋪陳自己心中嘅計劃。





（待續 ~）

IG link https://instagram.com/bear_big_big_writer