《愛在。貴族學園》: Ch 19 ~ 一早 Part 6

Ch 19 ~ 一早 Part 6（連載日期：2022/10/14）

至於喺另一邊廂，早走嘅禮謙喺電話裏面，簡單通知一下父母，以及自己屋企嘅司機之後，好快就落到大堂。

喺大堂裏面搵咗一陣之後，就見到韻喬坐喺大堂嘅其中一張凳上面。韻喬當時手上拎住張紙巾，好細聲咁喺度喊。
 
身為朋友同埋同學，以及一位有風度嘅男士，禮謙當然就走埋去，然後安慰道「小喬你個傻妹呀，做咩自己一個坐喺度喊呀？」禮謙於是都拎出自己嘅紙巾，然後幫韻喬抹一抹眼淚。「陰功囉小喬，對眼喊到又紅又腫！」
 
「冇呀禮謙，我坐喺度只不過就係想畀自己冷靜一下。然之後先出去出面個巴士站坐車返屋企咋嘛……」相對於面對俊軒嗰陣嘅激動，韻喬依家情緒已經冷靜唔少，對答亦都相對冷靜...





「係呢禮謙？乜你今晚唔係要陪天殷跳舞咖咩？做咩無啦啦自己一個走落嚟，然後陪我傾計呀？」
 
「而且你走落嚟嘅話，你真係唔怕殷殷一陣間會唔開心咖咩？其實喺今晚之前，殷殷都一直好期待同你跳舞嘅時光咖喎！」韻喬繼續同禮謙講。

不過，「嗯，我已經喺剩低嘅時間，將天殷交咗畀小軒照顧。而我，今晚就會負責照顧你，呢個我已經同小軒講好咗咖啦」禮謙平心靜氣同韻喬講。
 
「改由你嚟照顧我？而且仲同小軒講好咗呀，咁其實你意思係……？但係殷殷…你有冇問過佢嘅意思咖？」韻喬喺呢個時候，都仲係好擔心天殷，會唔會因為自己嘅事，搞到冇得同禮謙跳舞而唔開心。

「好啦，我都係同你坦白吧小喬。其實我今晚……都唔係話真係太得閒咖咋，我本身都係抽時間出席，所以其實都要走咖啦。不過，我係見你都要早走，所以就……呀……今晚不如等我送你返屋企吧，好嘛？」禮謙呢個理由當然都係假咖啦，目的都係想韻喬内心會好過啲。
 




「呃，禮謙呀……其實你啱啱話你自己唔得閒，但仲依家仲要你車我返屋企，其實會唔會唔會太好呀？」韻喬若有所思道「如果你真係忙嘅話，不如我就自己坐巴士返去都得咖！時間都唔係差好多咋嘛」。
 
禮謙此時拍一拍韻喬膊頭道「唔怕啦，而且呢度返去你屋企，都係一陣啫，又唔係遠，我ok呀，又唔會用多太多時間嘅…….」
 
「而且小喬你今晚着到咁靚，行出嚟都扮到成個女神咁，我怕你夜晚晚一個女仔喺條街度行唔安全呀，所以我都係同你返去啦……呀！我地架車到啦，小喬我地上車啦！記得睇下自己有冇帶漏嘢呀！」禮謙喺講嘢嘅時候，同時指住停喺出面嘅程家座駕，然後禮謙突然間拖起韻喬嘅手，帶佢上車。

面對禮謙突然拖起自己隻手，韻喬都有少少嚇到，但係好快就好淡定咁話「哎呀！你個程禮謙呀！依家做咩連你都會口花花架！？救命呀！不過點都好啦，我都要多謝你抽時間陪我先啦，禮謙！」韻喬都冇禮謙咁好氣，然後就同禮謙上車。

韻喬喺同程家司機講要自己屋企個地址之後，程家嘅座駕就離開會場，向北角渣華道方向開去。而喺同一時間，禮謙就喺Signal裏面，通知俊軒同天殷，話畀兩位好朋友知已經開車
 




「5A程禮謙：喂俊軒、天殷呀，我同小喬上咗車，離開咗會場啦          21:25」

「5A林俊軒：收到！唔該你啦禮謙！幫我好好咁送佢小喬返去，       21:27」俊軒好快都覆咗禮謙。

「5A李天殷：唔該你呀謙謙王子😘          21:28」
「5A李天殷：好好幫我地睇住小喬呀！            21:28」

當然，禮謙都唔明白點解天殷會send一個kiss嘅emoji係咩意思。

（待續 ~）

IG link https://instagram.com/bear_big_big_writer