《愛在。貴族學園》: Ch 19 ~ 一早 Part 7

Ch 19 ~ 一早 Part 7（連軋日期：2022/10/18）

而喺上車之後，韻喬就一直靜靜咁，望住窗外嘅風景，自然就一邊諗起今日發生嘅所有事。

禮謙好快就察覺到，韻喬依家其實係喺度死忍自己嘅情緒，於是就主動打開話題問「小喬呀！？你真係…冇咩事吖嘛？」

發緊夢嘅韻喬畀禮謙突然之間開聲講嘢，所以都成個人震一震。禮謙於是就好溫柔咁問「小喬呀，其實呢你係咪真係冇嘢咖？」

「我冇……冇事，你唔使太擔心啦禮謙！」韻喬就同禮謙微笑咁講。





但係，禮謙喺心裏面依然覺得韻喬嘅笑容有少少牽強，所以禮謙都想趁呢個獨處嘅機會開解一下韻喬，同時都嘗試自己去摸底，睇下韻喬對於愛情嘅方面有咩表態。

不過，禮謙為咗唔想講得過於明白，而令到韻喬有機會唔對自己坦白，所以，禮謙都決定要包裝一下，然後先再開口同韻喬講。
 
「嗯，小喬呀，其實經過咁耐時間，我有啲嘢，覺得我作為你身邊嘅其中一位，可以交心嘅好朋友，都會想同你講…」

禮謙突然之間講出人生道理，令到韻喬都非常驚訝，而且都唔知道要點樣反應「禮謙你做……」

「我冇事，你放心啦小喬。不過小喬呀，我想同你講嘅係，有啲嘢呢其實喺到咗要選擇嘅時候，就應該要有決定咖啦；而唔係喺度優柔寡斷，一直都唔去做出一個決定而拖拖拉拉，咁樣對於身邊嘅人嚟講，其實都唔一定係好事……」
 




「與其要大家都受到長時間嘅不確定性影響，而令到大家收到精神上，唔怕得罪講句，可以話喺折磨嘅時候，倒不如勇敢啲，一早去面對佢啦，而且都可以盡快等自己了咗一件心事……」
 
「所以我覺得，無論你最後選擇邊一個都好，最重要係選擇到自己真係喜歡嗰個，一定要好好順從你内心嘅諗法，但絕對唔好因為怕傷害到，或者會對唔住邊個，而埋沒自己内心嘅想法…」
 
「因為有啲時候做選擇，無論你點選擇都好，都一定會有人受到傷害，係根本無可避免嘅。但係我要提醒你嘅係，有時候唔果斷選擇嘅話，說造成嘅傷害，隨時畀做出一個正確嘅選擇嚟得更大……」

「所以請問程禮謙，你依家同我講呢堆說話嘅意思係？」韻喬聽完禮謙嘅一大堆說話，就問咗對方呢個問題，不過，禮謙居然喺度賣關子…
 
「哈哈！小喬以你嘅冰雪聰明，讀書成績咁好，貴為全級之霸，照道理呢啲咁簡單嘅人生道理，對你都唔會好難明白，你應該好快會明我講咩咖，哈哈！」禮謙微笑道。





「但係我都希望小喬你，都可以盡快諗清楚，到底自己想點啦。但係請你放心，我都會等你嘅好消息！」然後再摸摸韻喬嘅手。

韻喬聽完之後，就冇再講過其他嘢，依然都係望住窗外面嘅風景。
 
話咁快，程家嘅座駕就去到韻喬屋企樓下停低。韻喬喺落車之前，就先同禮謙道別...

「我到啦禮謙，啱啱真係麻煩哂你送我返嚟呀！而且依家都已經唔早啦，你都快啲返屋企搞掂你啲嘢啦！」
 
「放心啦小喬，嗰啲事我都有分數嘅..」禮謙微笑道，但係韻喬都再補充多一樣嘢「至於你頭先同我講嘅嘢，得閒嘅時候我就會諗下咖啦！不過，我都好多謝你提醒咗我！」
 
「唔使客氣啦小喬，大家都一場朋友同埋同學。但係無論點都好，我同頭先一樣，都係會支持你咖！」禮謙道「好啦小喬同學，你搞掂哂之後都早啲休息啦！呢兩日為咗呢個party，真係辛苦哂啦！啊仲有呀，記得食藥呀！」
 
「我記得啦長氣！不過，小妹我都多謝你地，帶我去玩、帶我去認識你地嘅世界就真。好啦，我返上去啦，我會同俊軒、天殷報平安咖啦，晚安！」韻喬落車對禮謙揮揮手之後，就進入福生大廈裏面。

而程家嘅座駕，就翻番去party嘅會場，接載父母返屋企。




 
至於程、李、林三家嘅家長，都冇再就今晚發生喺韻喬嘅事，而去問幾個後生仔，但係喺私底下，有幾個唔同嘅party，都有去討論今晚嘅事，當中仲包括埋俊軒同天殷佢地，同埋仲有…

（Ch 19 一早 ~ 完）

IG link https://instagram.com/bear_big_big_writer