《愛在。貴族學園》: Ch 19 ~ 一早 Part 2

Ch 19 ~ 一早 Part 2（連載日期：2022/09/30）

「小軒呀，你地幾個都會支持我，然後都會永遠喺我身邊陪住我面對一切咖可？」韻喬突然之間問俊軒。
 
「仲使問嘅小喬？我地幾個就梗係會啦！即使大家出身嘅背景好唔同都好，但你就放心啦小喬，我地幾個都會陪住你，永遠唔會用嗰種眼光同語氣去睇你，好冇？」俊軒繼續喺韻喬耳邊細聲講。
 
韻喬之後就點點頭，然後將自己抽出俊軒嘅懷抱内，再情深款款咁望住俊軒講咗一句「多謝你地呀！可以喺學校識到你地幾個真係好開心！」

俊軒於是拍一拍韻喬嘅膊頭，講咗句「唔使客氣啦小喬，呢啲都係我地嘅分内事嚟啫，唔通我地見到嘉惠咁樣當衆蝦你，我地都繼續無動於衷嘅話，咁我地唔係就去咗做幫兇啦咩？」嚟繼續安慰韻喬。
 




「而且，雖然我地暫時都唔係真嘅，但你今晚喺呢個場合，都係我“女朋友”嚟咖嘛，我都梗係要為你挺身而出嚟保護你啦！」

不過，喺俊軒講完呢句之後，韻喬依然情深深咁望住俊軒，而韻喬塊面一早就已經紅哂，再一次成個蘋果咁嘅樣。
 
呢種紅嘅程度，就連俊軒自己都未見過，所以俊軒都開始對韻喬嘅反應感覺到非常奇怪，然後就問韻喬咩事「呃小喬呀，做咩你突然之間，成個呆咗咁望住我呀？你係咪又有邊度唔舒服呀？」

韻喬好快就搖搖頭表示自己冇唔舒服，然後就好冷靜對俊軒講「唔係呀，我冇唔舒服呀，而且我都啱啱好番哂，你就……唔好太過敏感啦！」

「咁係因為我唔想小喬你又……唔舒服唔識照顧自己，然後又要入多次醫院吖嘛！」就算韻喬真係畀人放出院都好，俊軒依然好擔心咁講。





但係韻喬就即刻扭計話「喂呀！你又蝦我嘅！」「冇呀，我只不過係好心提醒下你咁咋嘛，小喬！冇人想你又唔舒服入醫院咖嘛！」

不過俊軒咁樣講完，韻喬又一次好怕醜咁講「小軒呀，我呢有啲嘢想……同你講呀！」

「嗯嗯？做咩呀小喬？」俊軒好誠懇咁望住韻喬，但係韻喬嘅眼神好閃縮，不停咁回避俊軒，然後隔咗一陣先再開口講「不過小軒，你可唔可以應承我，你一陣咩都唔好講，而且唔好同其他人講！得唔得呀？」

俊軒依然覺得眼前嘅韻喬非常奇怪，雖然自己同韻喬相處耐咗，都知道逆對方意思嘅話，都一定唔會有好下場。俊軒於是就話「好好好，小喬，我可以應承你，一陣嘅事我咩都唔講，而且都唔會同其他人講。」

正當俊軒啱啱講完上面嘅一句話，就喺突然之間，韻喬就惦高雙腳，一步一步咁慢慢靠近俊軒塊面，然後閉上自己嘅眼睛。而俊軒此時連韻喬眼上嘅眉毛，都睇得好清楚，而且心跳都開始越來越快……
 




「小喬你……」「啜!！」！
 
冇錯，韻喬就喺毫無預警之下，突然就錫咗俊軒呢個假嘅男朋友個嘴唇一啖。雖然兩人之前都已經錫過一次，不過嗰次都係為咗應付林太突然嘅要求，俊軒先至會夾硬錫落去韻喬度。

但係今次，反而係由韻喬主動去錫俊軒。
 
面對韻喬突如其來嘅一吻，俊軒就即刻瞪大自己對眼，而自己個身體，都好似有一股強勁嘅電流，由嘴唇流通全身咁而震咗一下，完全唔敢相信眼前所發生嘅一切，居然係赤裸裸咁真實。

而係確定真實之後，俊軒整個人就更加僵硬，就好似畀魔法石化咗一樣，就連自己個腦都load唔到自己同韻喬發生緊咩事；而韻喬就繼續自己對俊軒嘅“大膽”行動。
 
不過韻喬親吻俊軒嘅呢一幕...

（待續 ~）

IG link https://instagram.com/bear_big_big_writer