《愛在。貴族學園》: Ch 19 ~ 一早 Part 1

Ch 19 ~ 一早 Part 1（連載日期：2022/09/27）

今晚同林家一齊出席郭氏party嘅韻喬，頭先因為受唔住新同學黃嘉惠再一次嘅無理歧視，於是自己一個跑出party嘅會場。

而份屬好友嘅天殷、禮謙同俊軒，喺先後指責嘉惠不是之後，都先後跑出會場尋找韻喬嘅下落。
 
不過，由於佢地三個人踏出門口之後去嘅地方都唔同，結果最先搵到韻喬嘅，唔係韻喬嘅好姐妹天殷，都唔係喺軒、謙之爭中，一直處於下風嘅禮謙，反而係最後離開嘉惠嘅俊軒。
 
俊軒見到韻喬企喺走廊窗邊嘅一個角落度，一直低聲飲泣，於是慢慢上前，然後向韻喬遞上一張紙巾，好溫柔咁講...





「小喬呀，我知道你係因為你自己同屋企，畀嘉惠同學咁樣無理針對，而令到自己好唔開心。但係，你都唔好為呢種咁過分嘅人喊啦好嗎？唔值得呀小喬！乖！」

韻喬喺見到嚟關心自己嘅第一個人就係俊軒之後，就放聲向俊軒大哭道「小軒啊！到底我做錯咗啲咩呀？點解我屋企冇你……你地環境咁好，就要畀個有錢女當扯綫公仔咁玩呀？點解我又要再一次好似以前咁呀！？嗚嗚嗚嗚…….！！」

講完之後，韻喬就撲入俊軒嘅懷裡大喊一場。俊軒出於自然反應，就將韻喬輕輕咁抱住。不過，今次都係俊軒第一次抱到自己一直追求嘅韻喬，所以對於韻喬突然向自己投懷送抱，初初點都有少少不知所措。
 
至於呢一刻嘅韻喬，内心突然之間覺得俊軒嘅懷抱裏面，提供咗好大量嘅安全感畀自己，至少喺呢一刻，韻喬覺得俊軒係一個可以信賴嘅傾訴對象。
 
但後來為咗可以畀到韻喬安心，俊軒於是就慢慢抱緊韻喬「你冇做錯到呀，小喬乖啦！」俊軒出言安慰韻喬「而且錯嗰個係嘉惠，而唔係你呀！小喬你就唔好諗埋一邊先啦！」
 




「如果我唔係窮，今晚就唔使要喺呢個有錢人嘅鬧劇裏面俾人羞辱呀！日頭都唔使喺班房畀佢喺殷殷面前畀人歧視呀！」韻喬繼續好大聲咁喊住講。

「我都唔知當初入嚟呢間學校係為咩呀？！如果……如果當初我繼續留喺真光讀上去嘅話，我張韻喬就唔使喺今日當衆畀有錢人當係玩具咁玩啦！？係咪呀？！」
 
俊軒於是輕聲但又有少少重嘅語氣喺韻喬耳邊講道「小喬，你聽我講先啦好冇？如果我地Form 5A甚至學校其他同學，真係唔鍾意你嘅話，大家咁多年嚟，都唔會咁包容你啦，係咪？」
 
「你又唔自己諗下喎，喺你每次上台攞獎嘅時候，點解台下面嘅同學，都會好大聲咁拍手掌去支持你？」
 
「咁就係因為大家，都已經接受你同佢地係一樣，係呢間學校嘅一份子呀！能夠得到大家嘅肯定，呢個絕對係你嘅光榮嚟咖！而且，之前你都有代表過學校，出席過好多唔同嘅公開場合，就代表你已經喺學校裏面，有一個好特殊嘅地位，而且都唔係其他同學，包括埋我在内，都可以同你相提並論呀！」
 




「所以小喬呀，你就唔好為咗呢種唔了解你嘅人，去令你自己傷心難過，好嗎？我地Form 5A所認識嘅張韻喬，係一個好堅强而且好乖嘅女仔嚟咖，你就用返平時嘅性格，去面對嘉惠同學啦，好嗎？」
 
「另外，我星期一都會同Ms張同5A其他同學，交代呢件事，希望嘉惠同學佢可以停止呢種霸凌嘅行為，然後再要佢同你道歉，好冇呀？如果做到咁佢都真係唔聽我地講，繼續喺度蝦你嘅話，咁我就交上去Ms Koo度，要求訓導處跟進…」
 
「所以呢，小喬，你就唔好再喊先啦，唔係就唔靚女咖啦，乖乖！」韻喬聽到俊軒呢番說話，就畀起頭先更加覺得安心。

但係，雖然平時韻喬都好堅強，不過今晚嘅佢，都想得到俊軒更多嘅安慰，於是就開口問「小軒呀，你地幾個都會支持我，然後都會永遠喺我身邊陪住我面對一切咖可？」

（待續 ~）

IG link https://instagram.com/bear_big_big_writer