《愛在。貴族學園》: Ch 19 ~ 一早 Part 3

Ch 19 ~ 一早 Part 3（連載日期：2022/10/04）

不過韻喬親吻俊軒嘅呢一幕，就畀同樣喺度搵緊韻喬嘅禮謙，一次過離遠睇到哂。當禮謙見到韻喬親吻俊軒之後，自己都掩住自己個嘴，覺得眼前見到嘅呢一切都好難以置信。
 
但好快禮謙就感到自己個心，喺見到頭先嘅一幕之後，突然之間痛起嚟，覺得好似有一把利劍，狠狠咁直插入自己嘅心臟一樣。

因為禮謙覺得，自己無論再點努力都好，都已經唔會再得到韻喬，搞到成個人都好down。
 
然而，俊軒就喺嗰一刻，離遠見到禮謙喺度睇住自己同韻喬，認為對方已經將頭先韻喬對自己所做嘅一切，而嚇到心都離埋。





於是俊軒就即刻將自己放開口，而且將依然緊緊依靠自己嘅韻喬稍為推開「小喬呀，你介唔介意放一放開我先，後面好似有…」

韻喬聽到俊軒嘅要求之後，而且佢都知道自己剛才所做嘅，已經超越咗同學同朋友嘅紅線，而好快咁縮開。

而韻喬聽到俊軒所講嘅後面好似有啲事情發生，所以就下意識擰轉身望去後面。

不過韻喬一擰轉頭，就見到禮謙帶住絕望嘅眼神，望住自己同俊軒。

韻喬見到之後自然就被嚇到啦，覺得頭先嘅事已經被禮謙睇到哂之餘，仲覺得非常尷尬，同埋唔知道要點樣同禮謙解釋，於是就急急同俊軒講…





「唔好意思呀小軒，我啱啱先記得，今晚我仲有緊要嘢未做，我諗我都要返去屋企先啦！」

「下，你之前唔係話你已經將今晚空咗出嚟咖咩？咁做咩……？」俊軒聽到韻喬咁樣講，覺得非常奇怪。
 
「係呀，呢件事……我係完全唔記得咗，都係啱啱先記得……真係唔好意思呀！」俊軒其實都知道，韻喬喺度同自己講大話，不過俊軒都唔想韻喬難做，於是都選擇放過韻喬……

「小軒呀，麻煩你一陣間呢，順便幫我同林Uncle、林auntie講聲，好多謝佢地今晚邀請我參加呢個party，令到我都見識唔少人同事。但係，都麻煩幫我同佢地講聲唔好意思同道歉，因為我突然之間走咗去，好似好冇禮貌咁…」

「同埋，可唔可以幫我都同天殷講聲唔好意思先！咁我地…星期一返學再見啦！」韻喬繼續同俊軒講。





俊軒深深嘆咗一口氣之後道「既然係咁嘅話，我都唔強人所難啦，放心啦，一陣返到入去會場裏面，我會同佢地講你有急事要走先。」「唔該你！小軒！」

「咁我地星期一返學再見啦！不過你臨走之前，可唔可以應承我，唔可以再亂諗今日發生嘅所有事，包括埋喺學校嘅事，知道未？」俊軒喺韻喬臨走之前，吩咐韻喬少少嘢，要對方應承自己。

韻喬考慮咗幾秒之後，就點點頭應承俊軒，再用一個好無辜嘅眼神，用手拖一拖俊軒講「我知道啦，但係都真係好對唔住呀小軒，本來我想聽auntie話，今晚要好好咁陪住你，但結果就搞成咁，真係真係好唔好意思。」
 
「咁我走先啦，bye bye小軒！」韻喬於是就拎起個手拿包，喺再一次擰轉身之後就非常冷靜咁同禮謙講...

「咦，禮謙你喺度做咩呀！？我見你好似…..企咗喺度好耐下，你係咪有事要搵小軒呀？」

「呃……係啊！不過其實你地可以繼續咖，我又唔係啲咩趕急嘢要討論，我可以一陣先再搵俊軒…」禮謙面紅紅咁講，而且語氣同樣都係支吾以對。

韻喬聽到之後都煞有介事咁款，認為呢個地方都係不宜久留，於是就同禮謙講「都係唔好啦，既然你地有嘢要講，我就唔喺度八卦啦，我都係走先啦，你地今晚都玩得開心D啦，星期一返學再見啦！」

「噢，不過小喬同學……你有冇車返去屋企呀呢度？要唔要我叫司機車你返去？」禮謙好關心咁問，同時俊軒都借機觀察一下，到底韻喬同埋禮謙嘅互動又會係點。




 
韻喬就即刻話「呢度有呀，所以我可以自己坐巴士返去呀。但係，禮謙你就唔洗擔心我啦，你搵完小軒之後，就好快啲返入去同天殷跳舞啦！費事殷殷一陣間又唔開心啦！bye！」
 
韻喬之後就慢慢行去升降機，準備離開呢個荒謬絕倫，兼且畀人當衆奚落自己嘅有錢人派對，同時向俊軒同禮謙道別。

（待續 ~）

IG link https://instagram.com/bear_big_big_writer