《愛在。貴族學園》: Ch 16 ~ 麻煩的一天 Part 17

Ch 16 ~ 麻煩的一天 Part 17（連載日期：2022/06/20）

「所以殷殷……其實你一早就知道，佢地兩個想要追我？」已經冷靜落嚟嘅韻喬追問道。
 
「其實你都啱咗一半啦喬喬，因為我自己都唔知道，佢地兩個之間嘅牙齒印，居然可以為咗你而突然間可以大成咁，呢個就係我都估唔到嘅…」其實天殷喺早幾日之前，已經知道兩個喺度大鬥法緊。

但因為唔想病咗嘅韻喬太過擔心，所以天殷都暪住韻喬唔講住先，免得韻喬擔心而出唔到院。
 
不過，依家天殷見到韻喬咁嘅情況，如果再講嘅話，對於韻喬嚟講，其實都會係一種傷害。





「但係呢，我自己就覺得我都需要再好認真咁同佢地兩個講，話想追喬喬你唔緊要，但係都真係唔好搞到依家咁核突。」天殷再向韻喬補充。
 
「唉，佢地搞到咁，我真係寧願繼續做好朋友好過啦，唔好再喺度追嚟追去，結果搞到大家都面阻阻咁…」韻喬若有所思咁講。

「係啦，今次真係唔該你啊殷殷，好在你啱啱好打電話嚟咋，如果唔係有你嘅話，我真係都唔知可以同邊個講好。」韻喬再一次感謝天殷，花時間傾聽自己身上嘅麻煩事。
 
「唉呀喬喬啊，呢啲小事就唔緊要啦，大家做咗幾多年姐妹呀，都仲要咁客氣都有嘅？」天殷喺度扮嬲咁講，但係都覺得係時候轉話題，所以就話......

「係喎喬喬呀，聽晚就係郭氏嗰個party啦喎，你要唔要上我到揀定衫，順便嚟我屋企食飯呀？橫掂你屋企都冇人，得你自己一個…」
 




「下？點解呀？我聽日放咗學先一次過上嚟唔得咩？而且你突然之間叫我上嚟你屋企食飯嘅話，會唔會阻住你地屋企就真呀？」韻喬非常好奇而且擔心咁問，畢竟天殷又製造一個機會去令韻喬覺得自己麻煩到人地。
 
「唔會啦喬喬，我之所以會叫你今晚上嚟，就係怕你聽日放學之後，你先上嚟試衫嘅話，你會唔夠時間呀。」

「而且，你今次要同林家去喎，如果你要先去我度，然後再匯合林家嘅話，好似都唔係太好喎…」天殷開始解釋佢嘅原因。

「再加上，你喺屋企橫掂都係得你自己一個喺度咖啦，與其喺屋企度對住四面牆咁悶呀，倒不如過嚟我度，我地可以一齊試衫順便都做功課呀嘛！你話我個計劃係咪好perfect呢？」天殷講嘅時候都講得越來越興奮。
 
韻喬考慮咗一陣之後就話「如果…我唔會阻住你地嘅話，我今晚都可以上去你屋企嘅。不過真係唔好意思啦殷殷，我又要打搞你到你屋企。而且因為我要繼續扮個死人頭林俊軒嘅女朋友，睇嚟小女子我，都要草錢買定少少晚裝旁身啦！」
 




「哈哈，喬喬你咁快就咁上心林家嘅事啦？睇嚟你不如假戲情真，直接做軒仔個真女朋友，咁你咪可以名正言順叫佢買衫畀你出去威囉！」天殷居然搵到一個位去寸韻喬，所以都即刻嘲笑對方。

「我先唔要呀！」韻喬聽到之後抗議道，所以天殷都即刻兜「我都係講下笑咋嘛喬喬。不如咁啦，我依家叫司機出車過嚟北角接你？不過你要應承我，今晚唔準再喊咖喎，知道未呀張韻喬？」
 
「知道啦，咁好呀，咁一陣見啦，唔該你呀殷殷！」喺同天殷收線之後，韻喬就除低自己套校服，換上輕便嘅hoodie同牛仔褲，順便放埋頭髮，再化個淡淡地嘅妝，就等天殷嘅座駕出嚟北角接佢。
 
而喺同一時間，就喺李家嘅座駕上面，天殷都已經換過衫，跟隨座駕一齊出去接韻喬，同時都打電話去俊軒度。

喺接通之後，天殷好快就話「喂軒仔呀，我係慇殷呀，想請問依家你方唔方便講兩句呀？因為我有啲嘢想要同你交代下…」
 
「我ok呀天殷，不過我都係啱啱先入門口，你等我一陣呀……係……請問有咩事呀殷殷？」俊軒好快就聽電話，然後俊軒就一邊講電話，一邊行返上自己嘅睡房。

（待續 ~）

IG link https://instagram.com/bear_big_big_writer