《愛在。貴族學園》: Ch 16 ~ 麻煩的一天 Part 18

Ch 16 ~ 麻煩的一天 Part 18（連載日期：2022/06/22）

「喔其實係咁嘅軒仔，因為聽晚就係郭氏個party啦嘛，我想問下呢，你聽日會唔會一放學嘅時候，就直接接喬喬去你屋企換衫。定係你會同佢返一返屋企，先會再出去咖？」天殷喺等俊軒話ok之後，就問對方。
 
俊軒好明顯冇考慮過呢個問題，而且明明聽晚韻喬同林家嘅行程，都唔會同李家有任何關係，故此俊軒對天殷嘅問題感到好奇怪，所以就索性反問天殷...

「我未知呀，但係其實我自己都有諗過，如果將佢套校服同埋個書包，直接放喺我屋企又好似唔係太好咁。但係你做咩無啦啦講小喬嘅殷殷？」

「冇呀，因為我就怕聽日放學之後，喬喬搞得嚟會唔夠時間回合你地啫，一係我一陣間會再搵佢同佢傾，睇下小喬到底想點先啦！」天殷回答道。





「ok啦殷殷，咁等你今晚覆我啦！」

「嗯嗯，聽晚嘅事就咁樣住先那。不過林俊軒，我會想話，我今日之所以會打呢個電話畀你，其實係有另一樣嘢要同你講。」天殷稍為壓低自己聲線道，去提醒俊軒會講一個比較嚴肅嘅話題。
 
「喔竟然？！咁係關於咩事咖？」俊軒非常好奇咁反問天殷，但天殷依然都繼續壓低自己把聲「其實係關於你、小喬同禮謙。你地幾個其實….」

俊軒喺一聽到係講同韻喬、禮謙有關嘅事之後，就即刻臉色一沉，因為自己都知道係一件麻煩事。
 
「其實你覺唔覺呢幾日，你同禮謙都好似有少少over咗，I mean喺你地追小喬嘅時候….」天殷繼續非常嚴肅咁問俊軒，而且都接近用拷問嘅形式去問。
 




「你做咩咁講呀天殷？」俊軒嘅語氣都即刻有少少不服「而且，其實我自己都唔知禮謙呢兩日發生咩事，感覺佢一聽到我講凡係同小喬有關嘅事，佢都即刻要衝住我而嚟咁，完全唔知道佢呢幾日喺度搞咩！」
 
天殷於是清一清喉嚨，然後就開始講佢自己對俊軒嘅要求「啦小軒，大家都清楚對方嘅性格，我就唔怕直接，坦白同你講啦…」「係…」

俊軒雖然喺心裏面都知道，天殷今次都會話自己，但係事到如今，就算天殷會閙自己都好，都要聽下先知道要點樣化解局面。

天殷喺俊軒反應咗之後就話「我想講，其實都係因為你地兩個都各不相讓，所以先會搞到依家咁樣面阻阻咋。而且雖然一直我都好支持你地兩個去追小喬呢個内外都接近完美嘅女仔，同時都應該有好嘅表現，去令小喬慢慢咁鍾意你地是但一個…」

「但係爭取還爭取嘅同時，你地兩個唔應該再咁樣發生衝突囉！你地自己數下，今日你地嘈過三次交啦，你地咁樣已經令小喬佢好唔開心同唔安樂，而且小喬都已經私底下同我講咗好多次，佢話暫時對你地兩個，都只係有好朋友嘅感覺。」天殷繼續講…





「所以你同禮謙兩個，呢排都好自為之，由其聽晚喺派對嘅會場，唔好再發生任何形式嘅衝突啦下，如果唔係到時候都只會失禮大家，知道未呀？」
 
「唉，頭先喺街畀人望住哂個感覺真係好樣衰……」俊軒諗返起之後，就覺得無奈咁講。

「哈！抵死啦，今次你知道樣衰呢。如果你唔想再咁樣衰嘅話，就以後唔好再咁做啦。而且你自己都唔想，自己喺小喬嘅心中，留下一個唔好嘅印象咖嘛，係咪先？」天殷反問道。
 
「呢個都係真嘅。不過，我都會檢討一下自己咖啦，我都多謝你話我知，到底我地有咩不足，同埋韻喬真正嘅感覺呀殷殷！」於是俊軒都非常感激咁同天殷講。
 
「唔使客氣啦！我其實都係幫小喬轉達，佢對你地嘅諗法啫。我同你講呀林俊軒，小喬佢真係一個好女仔嚟咖，如果你真係鍾意佢嘅話，你就好好珍惜佢啦！知道未呀？！」天殷又一次好語重心長同俊軒講。

「嗯嗯，我知道啦，多謝你！」俊軒感激道「好啦小軒，我都唔同你講住先啦，我有少少嘢要忙，聽日返學見到之後再傾啦，bye！」「bye!」佢地之後就收線。

而天殷都趁機打電話畀禮謙，同禮謙講返類似嘅說話。而且同俊軒一樣，禮謙都好後悔自己所做過嘅事，同時都知道應該要點做。

（待續 ~）





IG link https://instagram.com/bear_big_big_writer