《愛在。貴族學園》: Ch 16 ~ 麻煩的一天 Part 16

Ch 16 ~ 麻煩的一天 Part 16（連載日期：2022/06/17）

韻喬一接電話就對天殷放聲大哭「喂，殷殷，嗚嗚嗚….」

「喂，喬喬阿….你做咩喊呀？你冇咩事呀嘛？」天殷聽到之後就好擔心。
 
「佢地……佢地成日為咗爭我嘈交呀，我覺得好煩……好辛苦呀……嗚嗚嗚…」韻喬此時已經喊到收唔到聲。
 
聽到韻喬咁講，天殷就知道又係兩個男仔嘅老問題，所以嘆一口氣之後就問「你係咪話小軒同謙謙佢地兩個呀？」
 




「咪就係佢地囉，嗚嗚嗚！佢地……佢地到底爭完我未呀？我覺得好煩好辛苦呀！點解佢地一定要咁呀！嗚嗚嗚！」韻喬繼續淚流披面咁同天殷哭訴。
 
「做咩呀喬喬，頭先佢地兩個又喺度嗌交呀？」天殷再問韻喬「佢地又發生咩事而嘈起嚟呀？」
 
「係啊…..頭先我地落咗巴士之後，小軒佢話….見我咁樣搭巴士好辛苦，想話每日接我返放學。但禮謙聽到之後….就又要話要接，而且仲話俊軒講大話講到傻咗。之後….之後兩個就喺條街度嗌交……」韻喬喊哂咁講返頭先嘅事。
 
「唔係掛，嘈到咁好尷尬喎！而且仲人身攻擊添…」天殷完全都估唔到，平時咁有禮貌嘅禮謙，居然可以講出咁恐怖嘅說話「咁個街有冇好多人望住你地呀？」
 
「就係有呀！搞到我勁唔好意思。之後我咪好大聲話，唔想見到佢地，叫佢地喺我面前消失，然後我自己返上屋企，之後你就打電話嚟啦……嗚嗚嗚！」韻喬講完又開始喺度喊。
 




「喬喬呀，你唔好再喊住先啦！乖，殷殷喺度。」天殷其實喺講電話嘅時候，有非常大嘅無力感，因為都唔知可以點樣開解同安慰韻喬。但同時都好嬲俊軒同禮謙，點解兩個男仔都可以一直都當自己冇到。
 
「殷殷呀，我真係……好辛苦呀！點解佢地兩個一定要咁樣爭我喎？點解呀……嗚嗚！」韻喬依然都仲喺度喊。
 
「因為佢地兩個都鍾意你呀嘛，然後又想留個好印象畀你，所以咪都話接你放學同接你去party囉。不過……唉，佢地兩個又真係嘅，話極唔好咁樣就偏要就緒，係都唔聽我講！」天殷道出兩個男仔不停爭執嘅原因，同時都非常感概。
 
「咁點解……點解一定要咁樣去搶我喎？而且我都講……講咗好多次，我依家對佢地兩個，都只係有好朋友嘅感覺咋嘛！我想我地幾個都開開心心呀！」韻喬再度激動起嚟。
 
「哎呀喬喬你乖啦，唔好再喊啦！我諗兩個男仔……可能都係想有個了結掛？但我都覺得咁樣逼你過分咗囉。」天殷繼續安慰韻喬，但心裏面已經想教訓俊軒同禮謙兩個...





「而且喬喬呀，你啱啱先好返出院，而且仲食緊藥，你就冷靜一下先啦？乖啦好冇？」
 
「我知呀！但係……但係依家畀我嘅話，我真係兩個都唔會想同佢地一齊呀！」講完之後韻喬都開始收聲。
 
「其實，我都知佢地兩個都好鍾意你，佢地之前都已經同咗我講咖啦，而且喬喬你唔覺得，佢地兩個最近都好少話會搵我咩？」天殷喺韻喬稍為冷靜落嚟之後，就同對方講出，一個自己收埋喺心裏面嘅難受感。
 
韻喬於是就諗起近期嘅事，的確俊軒同禮謙都好少再主動提天殷，然後韻喬就認同話...

「你唔講由自可，你一講就好覺眼啦殷殷。我就係知道今日佢地兩個都冇話主動搵你，就已經覺得好奇怪，好似當你隱咗形咁。但係殷殷你唔會唔開心掛？」此時韻喬反而仲去顧及天殷感受。
 
「我話我完全冇唔開心就係呃你啦張韻喬！」「對唔住呀殷殷！…」韻喬對於自己個好姐妹，都因為兩個男仔掛住追自己而被受冷落，而感到非常抱歉，但天殷開朗嘅性格，都幫到唔少忙……

「放心啦喬喬！我冇事喎！而且我都唔怕同你講啦，其實喺好早之前呢，我的確有幫佢地問過，到底你係鍾意邊個多啲，而且你自己都唔係已經話，自己鍾意禮謙多少少，不過後來你有話好似同俊軒close啲咩？」

「但係今日佢地之間所發生嘅全部嘢，我事前真係完全唔知情，所以我頭先一聽到你講返lunchtime同頭先嘅事之後，我都覺得好愕然下。」天殷繼續喺度講。




 
「所以殷殷……其實你一早就知道，佢地兩個想要追我？」已經冷靜落嚟嘅韻喬追問道。

（待續 ~）

IG link https://instagram.com/bear_big_big_writer