《愛在。貴族學園》: Ch 16 ~ 麻煩的一天 Part 15

Ch 16 ~ 麻煩的一天 Part 15（連載日期：2022/06/15）

最後都因為銅鑼灣太過塞車嘅關係，原本25分鐘嘅車程，都搞到最後長達八個字先返到去北角。

佢地落咗巴士之後，俊軒同禮謙對腳都已經好痹，眼神話畀韻喬知佢地已經喺度懷疑緊人生。
 
「癡線咖！？乜原來香港咁大都有咖咩？香港仔出嚟北角，居然都要用成八個字先到！？」俊軒再一次首先抱怨。
 
「咪係！而且架巴士仲要咁多人。小喬呀，其實除咗呢架車之外，仲有冇其他車可以坐呀？」禮謙又再和應俊軒嘅睇法。
 




「有其他車呀，咪38、77同埋99囉！頭先學校附近嗰個站都有呀，不過咁啱有42嚟先咪上42囉！唔通你地好鍾意喺個巴士站度罰企咩？」韻喬擰轉面反問兩個男仔，然後再講「或者你地唔怕遠嘅，可以再行出少少去搭地鐵咖，但係要喺金鐘站轉車，夠快啦！但係我就覺得好兜啦！」
 
「唔係，不過咁樣企巴士就真係好攰姐！」兩個公子一齊轉軚話。

「而且搭地鐵咪仲更加冇位坐，所以都係唔好啦！」俊軒再補充多一句咁講，而呢一句說話，擺到明係想通過認同韻喬，去增加韻喬心目中嘅好感度。
 
「你兩個就真係冇鬼用呀！喺巴士度企一陣咋嘛，都好似攞你地命咁！虧到咁都唔知係咪男人嚟咖！以後都唔知道你地兩個，點樣同個女朋友喺歐洲啲名店度，幫佢地排隊買包包呀！」韻喬藉機攻擊道，同時將原本心裏面嘅說話講出口。

俊軒眼見自己喜歡嘅女仔，要日日咁辛苦咁樣逼巴士，實在太過唔忍心，於是隔一陣就同韻喬提議...





「小喬呀，其實見你每日返放學都咁逼，好似唔係幾好咁。不如咁呀，我以後都嚟接你返學同放學呀！好嘛？」
 
禮謙聽到之後，自然非常不滿，於是又再一次進入作戰狀態，然後又開始發動攻勢「唔使啦，韻喬同學等我屋企嚟接送咪得囉！而且小軒你唔係住灣仔半山咖咩？你過嚟北角呢邊嘅話，好似唔多順路喎？」
 
「唔順路都唔緊要啦禮謙，反正我嘅出發點，都係唔想小喬辛苦姐，我自己辛苦少少，就冇咩所謂啦…」俊軒反駁道，當然相對於之前，今次俊軒都已經收咗火，無非都係唔想再得罪韻喬。
 
「唔係呢林俊軒，我就住喺寶馬山，我過嚟呢邊近好多喎，一落山就係。你就唔洗特登要你司機跑完電氣道出北角，再塞香港仔隧道返放學啦！一陣兩個都遲到又畀Ms張閙就唔好啦！」禮謙試圖繼續用車程同埋舊事重提，去逼俊軒收手。

「喂，我地兩個都係唔好再爭啦，真係等我嚟啦，我同小喬做戲要做全套呀！」俊軒堅持自己想法，甚至搬出自己同韻喬嘅“情侶關係”出嚟做原因。





但係韻喬聽到呢度，已經開始黑面，但因為自己行前面，所以兩個男仔都見唔到。
 
「咁又點先林俊軒，全世界都知你地兩個係假咖啦，呃得一時唔呃得一世！你估你呀媽真係lulu，咩都聽你點呀？！如果係呀，佢上次就唔會玩咁大啦！所以都係等我嚟啦，唔好再自欺欺人啦！」禮謙繼續用假女朋友嘅point攻擊俊軒。
 
「喂！話人呀媽咁冇禮貌都有嘅你，呢啲人都係唔好埋小喬身啦！」「咩呀！小喬係我接！」「都話我囉！」…..

就係咁樣你一言我一語，兩個男仔再一次喺度爭奪韻喬，而今次仲要喺大街上。
 
因為佢地越來越大聲嘅關係，所以唔少路人都望住佢地三個。

而韻喬對於短時間之内，兩個好朋友再一次因為自己而發生衝突，終於都再一次忍無可忍，擰轉身講…

「夠啦！林俊軒、程禮謙！好煩呀你地兩個！！一次唔夠就爭兩次，兩次都唔夠重要爭夠第三次！你地兩個係咪一定要你死我亡肯先收手呀？！！你地依家即刻喺我面前消失呀！！！我唔想見到你兩個呀！！！」韻喬好嬲咁指住兩個男仔嚟鬧。
 
韻喬講完呢句，兩個男仔都即刻停咗落嚟，而因為韻喬都叫得好大聲，唔少路人都再停低，睇下幾個後生仔發生咩事。





之後韻喬就留低俊軒、禮謙兩個喺街上面，然後自己一個返翻上屋企。
 
入屋之後，韻喬就開始喊，仲喊得好大聲「嗚嗚嗚……點解佢地會…變成咁咖？」

「點解唔可以……唔可以……好似以前咁，四個人開開心心返學、放學、做朋友呀？」「點解一定要逼我揀一個喎？」
 
同時韻喬開始不停用拳頭，打地板同牆璧去發泄情緒。

不過就喺呢個時候，天殷就打電話畀韻喬。韻喬見到係天殷嘅來電，於是好快就接電話，等自己可以同好姐妹傾訴...

（待續 ~）

IG link https://instagram.com/bear_big_big_writer