《愛在。貴族學園》: Ch 16 ~ 麻煩的一天 Part 14

Ch 16 ~ 麻煩的一天 Part 14（連載日期：2022/06/13）

三個人沿途都冇講任何嘢，估計兩個男仔都係因為怕講錯嘢，而令韻喬再發脾氣，而且佢地兩個本身都未下火，所以就唔想有任何對話。

但韻喬佢地居然，一行就行咗15分鐘，都仲未行到出到隧道口嘅巴士站。

「小喬呀，我想問我地去到巴士站未呀？點解好似要行咁遠咁咖？」平時有車跟出跟入嘅禮謙，似乎已經行到腳軟，所以就出聲向前面嘅韻喬求救。

當然韻喬聽到之後，心裏面就好鄙視禮謙“哈哈！正廢柴！行少少都鬼殺咁嘈，都話你地啲少爺仔唔得咖啦！”。





韻喬於是指住前面嘅巴士站，就話「嗱，你地自己睇下嘞，前面咪就係我平時放學要去嘅巴士站囉！就快到咖啦，你地忍多一陣啦！」

三人於是再行多3分鐘左右，終於都去到巴士站。

「哇，行咗成差唔多20分鐘，終於都嚟到巴士站啦！但係點解咁遠咁嘅，而且我地學校門口冇車可以出到呢度咩？」俊軒抖順條氣就問韻喬。
 
韻喬呢個時候就諗“哈！估唔到咁快就話遠，可能平時呢個時候，兩個大少爺已經返到大屋入面嘆世界，兩個都正一皇帝仔嚟，一個又係咁，另一個又係咁，行嗰少少路就叫哂救命，都唔知係咪男人嚟咖！”

於是就話「說話唔係咁講呀林俊軒，我地喺班房都已經坐咗成日啦，放咗學行下路，都對身體好啲呀嘛！」
 




兩個聽到呢句之後都駁唔到韻喬。不過巴士站條人龍長到嚇死俊軒同禮謙，大概前面都有超過40人左右喺度等緊車出去。

「小喬，點解呢度咁多人等車咖？而且我地仲要等幾耐先有車到啊？」禮謙又化身好奇寶寶問韻喬。
 
「哦，呢個站因為有好多唔同嘅巴士經過咖嘛，全部都係行隧道出嘅，而且附近都有其他學校，所以放學時間咪多人等車囉！」然後韻喬就拎個電話出嚟，打開巴士app睇下啱嘅巴士仲有幾耐先到站「仲有4分鐘就有車啦兩位，你地等多一陣就可以上車咖啦….」。
 
於是過咗沉默嘅幾分鐘之後，一架寫住去北角碼頭嘅42號線巴士嚟到車站，但當時車上都只係半滿到「嗱。巴士嚟啦！上車啦！你兩個有冇帶八達通呀？」
 
俊軒同禮謙點點頭，然後就跟住大隊排隊上車。





點知今日呢個站人實在太多搭車嘅關係，所以佢地上咗車之後，先發現已經冇哂位坐，要一路企返去韻喬屋企，或者至少要巴士出到銅鑼灣、有人落車之後先會有位坐。

「小喬呀，點解會冇位坐咖？」俊軒一臉難色咁問韻喬，但結果就換來韻喬嘅白眼...

「喂，問問題麻煩有深度少少得唔得呀學霸？巴士人多咪要企囉！」韻喬有少少嬲咁講「而且可能今日巴士脫班掛，耐唔耐都有一次半次好耐都冇車到，然後架車又多人，所以咪要企，或者你地……兩個今日真係唔好彩啦！」韻喬心裏面都暗爽。
 
「小喬，咁我想知道，你平時要幾耐先返到去？」禮謙問。

「正常嘅話就四、五個字啦！不過如果隧道、銅鑼灣一塞車嘅話就要耐啲啦…」韻喬順便帶起耳機，開始喺電話度聽歌，擺到明就想當兩個男仔透明。
 
「下，正常都要咁耐？而且你點會有可能，可以喺巴士企超過15分鐘啊！」俊軒聽到韻喬咁講之後，就喺度埋怨韻喬點解要咁辛苦。

「咪就係囉，萬一塞車嘅話，車程就仲要耐少少，小喬你咁樣企法唔會攰咖咩？」禮謙緊接住和應道。

當然其他乘客聽到呢番離地嘅說話，都為之側目，畢竟如果有位坐唔塞車嘅話，邊個會想咁辛苦呢？





「喂，你地兩個唔係咁冇用呀嘛？！企幾個字都嫌辛苦呀？我就覺得還好啦。人地住屯門、元朗、天水圍、上水嗰啲，出市區喺巴士度一冇位坐，就要企一個鐘過外喎，人地咪又係一樣咁企！」韻喬冷眼回應道。

「不過啱咖啦今日，就畀機會你地兩個大少，體驗下普通人貼地嘅生活啦哈哈！」俊軒同禮謙聽完韻喬咁講之後都冇咩好講，繼續靜靜咁喺巴士度玩下電話咁。

（待續 ~）

IG link https://instagram.com/bear_big_big_writer