《愛在。貴族學園》: Ch 16 ~ 麻煩的一天 Part 13

Ch 16 ~ 麻煩的一天 Part 13（連載日期：2022/06/10）

經過長達一分多鐘嘅爭奪同對駡，隨住越來越多隔離班嘅同學，都因為聽到激烈嘅爭吵聲，而開始喺5A班房外面嘅走廊度趁墟。

身為主角嘅韻喬，此時已由尷尬變成憤怒，雙眼更加好似想殺人咁。

「林俊軒！程禮謙！你兩個即刻同我收聲同我停呀！！！你地朝早已經嘈咗一次咖啦，到依家放學又再嘈過，煩唔煩啲呀？！」韻喬大聲到連隔離幾班嘅人都過嚟睇發生咩事，而其他未見過韻喬發脾氣嘅同學，都被韻喬突如其來嘅氣場嚇親。
 
「小喬，你冷靜少少先啦！依度學校嚟咖，一陣間畀老師聽到就唔好啦，乖啦！」天殷立即跑過嚟安慰韻喬，同時怒啤點火嘅俊軒同禮謙...





「喂！你地到底有冇聽過我講嘢咖？！我已經叫咗你地好多次，唔好再咁樣搶小喬，或者喺學校嘈交咖啦？點解你地仲要越來越過分咁咖？！」
 
「得啦殷殷，你都冷靜少少先，我ok咖，多謝你先！」韻喬先反過來安慰已經想喊出嚟嘅天殷，然後再繼續對俊軒同禮謙兩個爆seed...

「兩位大少，我都已經喺呢間學校生活到第五年啦，唔通我都仲係唔識自己坐車返屋企咁低能咩？！我邊鬼使要你地兩個少爺仔送我返去呀！！？」
 
面對韻喬如此强烈情緒爆發，俊軒同禮謙都嘗試解釋理由。

「對唔住呀小喬，因為平時得你自己一個放學，我都會擔心你嘛。而且重點係，小喬你今日先啱啱出院復課，所以我先話先送你返去啫，你唔好嬲啦！」禮謙先道出要送韻喬返去嘅理由。





「係呀，而且你又唔係唔知自己有幾咁大頭蝦咖啦！自己發燒又唔知，夠鐘食藥又唔知，如果你唔係咩都唔知嘅話，點解上個禮拜會搞到自己要肺炎入醫院？」俊軒用肺炎做論點，再用激將法去justify自己送放學嘅做法。

然而俊軒講完之後，同禮謙兩個都仲喺度互啤。
 
天殷聽到之後，就好揪心咁同韻喬講「喬喬呀，可能佢地兩個，都係因為你今日啱先好番出院，所以先話要送你返屋企啫，你就先唔好向嗰個方向諗住先啦喬喬！」
 
韻喬靜咗20秒之後，再深呼吸一下之後，就話「算啦，我怕咗你兩個皇帝仔啦。今日，就當我啱啱出院，成個人個狀態都唔好，外加天殷肯同你地兩個講好說話，所以本小姐就畀一次機會你地...」

「如果你兩隻嘢真係咁想送我返屋企嘅話，咁就依家同我一齊行去隧道口搭巴士，再送我返去啦！」
 




兩個男仔聽到話要行出去香港仔隧道口搭巴士之後，就即刻兩個都呆咗，然後互相對望。

因為佢地兩個有錢仔，都真係好少坐巴士。再過多一陣之後…

「喂，你地兩個點咖？成分鐘都屙屎唔出咁！仲送唔送呀？你地唔送嘅話，咁我自己走咖啦，唔係走車就要等下一部咖啦！」韻喬向俊軒同禮謙兩個反個白眼之後，再催促佢地兩個講。

「送，點解唔送！行啦小喬！」俊軒同禮謙一齊答道，然後幾個人好尷尬咁，一齊行出去學校大門口。

至於其他喺度睇戲嘅同學，見鬧劇完結之後就即刻四散，但都係繼續對住佢地議論紛紛。
 
「咁你兩個跟住我啦。殷殷呀，我一陣返到去屋企先再打俾你啦，聽日見啦！」韻喬喺李家座駕前，同準備上車嘅天殷講。
 
「好啦，你小心啲啦喬喬！林俊軒、程禮謙，你地兩個同我好好照顧喬喬呀！唔係我一定代喬喬打扁你地咖，bye！」天殷道別過後就上車返李家大宅。

同時俊軒同禮謙都分別叫自己嘅司機，改去韻喬屋企樓下等自己。





於是，喺三個人由學校行去巴士站嘅路上，韻喬就心諗...

“哼！睇佢地兩隻嘢一定嬌生慣養，平時好日都唔會搭巴士出入咖啦。今次就比佢地試一次，下一次就唔會再敢跟著我咖啦。”然後韻喬就會心微笑。

（待續 ~）

IG link https://instagram.com/bear_big_big_writer