《愛在。貴族學園》: Ch 16 ~ 麻煩的一天 Part 10

Ch 16 ~ 麻煩的一天 Part 10（連載日期：2022/06/03）

「咦，小喬、天殷？乜咁啱嘅？」兩女喺返上Form 5A班房途中，喺樓梯上面遇到自己一個出去食完飯返嚟嘅俊軒。

雖然就係偶遇，但其實係俊軒見到韻喬同天殷嘅背影之後，刻意喺後面追上佢地兩個。
 
韻喬同天殷聽到有人喺後面叫自己，於是就停低咗，見到係俊軒之後...

「哦，原來係小軒你呀？但係你跑得咁急搵我地做咩事呀？唔通你要同喬喬道歉？」天殷好好奇咁問，但同時韻喬就一臉尷尬，面紅紅咁唔敢直視俊軒。
 




俊軒於是就話「呃，道歉呢個就固然要啦。小喬呀，頭先喺小息發生嘅事，真係好對唔住，頭先我自己反省之後都覺得，自己喺小息嘅時候實在太過失禮，希望……你會接受我嘅道歉。不過，我之所以跑得咁急，係因為我有啲重要嘢要同小喬你講。」
 
「喔，是但啦，見你有同我道歉，但係唔好再畀我見到你有下次啊下！」韻喬好認真咁同俊軒講，而俊軒都答咗一句知道去回應。

「不過小軒呀，你頭先咪話想同我講啲緊要嘢嘅？我想請問下係關於咩啲咖？同埋我地可唔可以一路行一路講呀？因為我要返去班房食藥啊！」韻喬再問俊軒。
 
「當然可以呀。咁行啦我地！」俊軒好快就同意，於是佢地三個再次起步，然後就話...

「其實就係咁嘅，我媽媽尋晚喺我返到屋企之後，就叫我今日要同你講，話喺聽日放咗學之後，我地受到邀請要出席一個party，我媽於是叫我帶埋個“女朋友”一齊去，即係變咗要你同埋林家一齊出席呢個派對……」





俊軒好有禮貌咁講，始終今次又一次要勞煩韻喬幫忙「我知道我咁樣依家先嚟同你講，好似都有啲急咁，而且基本上冇時間準備，呢度我都代表我屋企同你講聲抱歉先。但係小喬，聽晚你應該都得閒咖可？」
 
「軒仔呀，我想問，你係咪講緊聽晚郭氏個anniversary party？」天殷諗一諗之後，再問俊軒到底佢邀請韻喬去嘅party，係咪同自己所指嘅係同一個。

而一直唔知道發生咩事嘅韻喬，就梗係聽到一舊雲咁啦。
 
「真係聰明呀天殷，咪就係郭氏嗰個囉！」俊軒點頭稱是「你地屋企都收到郭氏邀請卡咩天殷？」

「有呀！而且年年郭氏都搞到好大排場咖啦，但係係應該大唔過劉氏同黃氏家族咖啫！」天殷回答俊軒道。
 




聽到呢度韻喬都終於要搞清楚依家到底發生咩事，於是就好好奇咁問「殷殷呀，其實你同俊軒講，想邀請我出席嘅郭氏party，其實係咩party嚟咖？點解我之前都冇聽過你地要出席呢啲party嘅？」
 
「嗯，小喬呀，我都係細細聲講好啦…」俊軒道，之後就喺韻喬同天殷耳邊講...

「其實你地普通人都應該知道，香港有好多有錢嘅望族，呢班人其實都同政府關係都好密切，而政府不時都會畀唔少政策優惠畀佢地，所以咪成日話有官商勾結囉。」

「所以呢啲大型party，美其名就係大家聯誼、跳舞、開心嘅場合，其實就係有錢人家交流、傾生意，或者難聽少少嘅話，可以叫係方便做枱底交易，或者講數嘅場所嚟……」俊軒解釋嘅時候，同樣都會陪父母出席呢類場合嘅，天殷都好無奈咁點頭表示同意。
 
「呃，乜原來香港真係咁黑暗咖，就好似啲小說、大台膠劇所講嘅咁。但係有樣嘢我就唔係好明白啦，點解呢種大人傾生意，或者做所謂枱底交易嘅場合，都會關我地呢啲中學生嘅事呢？」韻喬聽完之後，就嗱埋口面問天殷同俊軒。
 
「其實你問得冇錯呀喬喬，本來就唔應該關我地事嘅。但事實上又點會咁簡單呀，我地之所以都要去嘅目的，其實就係等各家嘅潛在接班人，喺大個之前互相認識，甚至成為親家。」

「等大家大個咗、接棒同有經驗之後，以後之間嘅合作就會更加順利囉。」今次到天殷解釋畀韻喬知道。

「不過，如果小喬你去嘅話，其實就可以當觀摩下，跟住小軒同埋佢父母，識下朋友，同埋見下軒仔屋企啲商業夥伴，順便咪食下好嘢咁囉...」





「既然都係望族主辦，出席嘅又係政府高官同其他望族，呢啲party其實食物都唔會太難食嘅。雖然我記得類似嘅說話，我有同小喬講過。但係我擔心嘅點，就係喬喬到時一定會好悶！」天殷都非常擔心韻喬同呢種場合，根本就冇任何化學作用可言。

（待續 ~）

IG link https://instagram.com/bear_big_big_writer