《愛在。貴族學園》: Ch 16 ~ 麻煩的一天 Part 9

Ch 16 ~ 麻煩的一天 Part 9（連載日期：2022/06/01）

「咁到底小軒佢……發生咗咩事？」韻喬再問多句之後，天殷一邊飲維他奶一邊回答韻喬...

「喬喬呀，你應該都仲記得，佢地兩個上個禮拜趁喺你住緊醫院嘅時候，咪各自都同你表咗白嘅？」
 
「我記得呀！咁跟住呢？但係我喺醫院都係醫病咋嘛，呢個同佢地依家喺度嘈交有咩關係喎！？」韻喬點點頭表示認同，但係都好想快啲知道原因。於是天殷就話…
 
「表白之後，佢地兩個就喺學校同放學之後，都少咗好多交流，而且都曾經喺班房同電話上面嗌交。但係我地為咗唔令你擔心而加重病情，所以就喺你面前嘅時候，兩個就會扮冇事。」





「所以我都好懷疑，佢地兩個係咪都因為好勝心強，然後兩個都好想喺今次得到你嘅芳心，咁樣就可以同你喺埋一齊…」天殷將自己所懷疑嘅真相講出「不過，我都仲懷疑緊一樣嘢…」
 
點知韻喬聽完天殷咁講之後，就更加唔安樂，而且都冇畀機會天殷講埋自己懷疑緊嘅嘢「唉呀！我之前咪同大家講過囉，我依家對住佢地兩個，都只係有好朋友嘅感覺咋嘛，點解兩個都仲係咁唔化都有嘅？都唔知有冇心肝聽我講嘢咖！仲好意思話鍾意我……」
 
天殷見到韻喬冇再講落去，於是就繼續頭先自己想講嘅説話「其實殷殷我都少少陰謀論啦，我覺得佢地兩個咁做，無非都係想逼你表態啫，所以先會用人為製造出呢種咁緊張嘅局勢……」
 
「喂！佢地乜料呀依家！大佬呀，感情呢樣嘢……邊會有得逼咖！？好心佢地兩個就咪再咁樣玩啦！你都知啦，愛情呢樣……」韻喬聽到之後就有少少嬲，差少少又將當日對禮謙講嘅偉論，喺天殷面前再講多次出嚟。
 
天殷聽完韻喬一大堆愛情偉論之後，就話「所以我自己就覺得，喬喬你就順其自然啦，最重要嘅考慮點係，你自己覺得同邊個一齊嘅時候，你會覺得舒服啲嘅，就去同嗰個一齊啦...」





「當然，我唔係叫你一定要同邊個一齊，因為個前提係你都要鍾意對方先得咖！」講完之後，天殷都有拍一拍韻喬嘅膊頭。
 
「不過喬喬呀，其實我都想知道，你喺經過住院嗰幾日之後，你自己有冇諗過，或者有冇覺得佢地兩個之間，邊個會對你好啲先？又或者佢地之中，邊個會令你覺得舒服先？」天殷再問韻喬。
 
「呃…其實我冇呀殷殷，就係都仲係好朋友嘅嗰一種關係囉……」韻喬照直咁答天殷「但係，如果你話容易相處或者自然、舒服嘅話，我就覺得應該係俊軒啦...」

「雖然佢個人比較情緒化，又鍾意同我頂嘴，而且之前雖然係就係會拈花惹草，但至少會比做得多過禮謙先……」天殷對於韻喬會轉軚都感到有啲意外。

「至於禮謙啦喎，雖然就真係比較有禮貌，唔會下下都窒住我先，而且都比較會聽我意見。但係，如果我對得多佢嘅話，我怕我將來都會好容易悶，同埋我都會想我將來嘅男朋友，都係會有主見啲，至少都可以有人幫我安排同錫我咖嘛。」





「唉呀殷殷呀，我都唔知點揀好！但係我真係唔想佢地再為我而嘈交咋！點解可以咁煩咖？」韻喬講完之後就將自己收埋喺天殷心口度。
 
天殷於是就好認真咁分析韻喬嘅意思，然後就話「如果你依家未有決定嘅話，不如就你自己再觀察佢地多一段時間先，同時都叫自己有多啲機會同時間，睇下自己鍾意邊個多啲…」

「或者仲有個可能性，就係你鍾意嘅人，其實唔係佢地兩個，而係其他人啦。但點都好啦，我今晚都會打電話同佢地講，叫佢地唔好逼得你咁緊之餘，都唔好做得咁過分咖啦，好冇呀喬喬？」天殷提議道，不過天殷都用手，環抱韻喬嘅纖腰，同時都錫咗韻喬額頭一啖。
 
韻喬冇為意天殷嘅親密舉動，於是就點點頭話「好啦，就咁決定啦！多謝你呀，殷殷！」

「唔好客氣啦，喺學校裏面，你都係我最好嘅姐妹嚟嘛，你唔開心我梗係要陪你咖啦，係咪？」天殷拖一拖韻喬嘅手，作為支持對方嘅舉動。

韻喬之後就對一對表，然後就話「好啦，時間都差唔多啦，不如我地返上去班房休息下，順便等我可以食藥，好嗎？」

「嗯嗯，咁喬喬你之後要開心返咖喎！知道未呀？」天殷微笑道。「知道啦！」韻喬於是掛起笑容，然後同天殷手拖手咁，行返上5A班房休息。

（待續 ~）





IG link https://instagram.com/bear_big_big_writer