《愛在。貴族學園》: Ch 16 ~ 麻煩的一天 Part 11

Ch 16 ~ 麻煩的一天 Part 11（連載日期：2022/06/06）

「其實聽完你地兩個咁講，我就對呢啲場合麻麻地啦。但既然auntie開到聲叫我去囉，我又點敢唔去吖！」韻喬聽完之後就好無奈咁講...

「而且，之前我地都已經洗濕咗個頭啦，就唯有繼續落去啦，如果唔係我都知道…俊軒後果會好悲慘嘅，嘿嘿嘿嘿，跳老舞隨時等緊你返去呀林俊軒！」然後韻喬就對俊軒一下壞笑。
 
天殷初時get唔到韻喬嘅意思，但諗諗下之後就「啊，我記得啦喬喬！如果叫唔到喬喬上林家食飯，林俊軒就要去相睇party，然後再同啲auntie跳舞吖嘛！哈哈哈哈！！上次咪就係為咗cover你，我先要用party去做煙幕咋林俊軒！」
 
對於兩個女仔不留情面咁，當衆喺學校挖苦自己嘅醜事，俊軒都表示極度無奈咁話「唉呀，細聲啲啦好心你地兩個！呢度學校嚟咖！」





「男子漢大丈夫，你怕咩認呀林俊軒？！」天殷再次喺都寸俊軒。
 
「不過殷殷呀，既然你都知有呢個party嘅存在，而且都受到邀請嘅話，咁即係你地屋企都應該會出席咖可？」韻喬提出疑問道，畢竟韻喬都想有個俊軒以外嘅伴，到時候可以陪住自己。

「我地屋企有收到邀請呀，所以我都會去呢個party嘅，不過到時候我都應該要陪下父母見下啲uncle之後，先可以抽時間陪你啦喬喬……」天殷回答道「而且，我諗禮謙佢一家都應該會去嘅，我記得佢地屋企年年都有收到invitation嘅！」

韻喬聽完之後就冇出聲，喺考慮一陣之後就話「既然人齊嘅話，而且聽晚我自己又冇咩做，林auntie又要我陪俊軒去，咁我ok 啦！我聽日會陪你去！」韻喬於是就答應咗俊軒嘅請求，同時再一次扮演俊軒“女朋友”嘅角色。
 
「不過我依家警告你先呀，你同禮謙到時候唔好再喺會場度嘈交呀，如果唔係大家落嘅，就係你地自己爸爸媽媽嘅面，而唔係自己面咁簡單呀，同埋你一定要帶住我呀，知道未呀，林俊軒？」韻喬再好認真同俊軒講，如同教訓自己男朋友嘅氣場一樣。
 




所以天殷都靜靜地喺度偷笑「我知道啦，長氣鬼！你呀張韻喬，返到班房記得食藥啦！」

「知道啦，林！爸！爸！」俊軒依然記得提醒韻喬食藥，不過見到韻喬咁樣玩自己，俊軒都差少少想出聲。

但礙於自己唔想又一次得罪韻喬，所以俊軒最後都冇出聲。

而佢地各自返到班房之後，大家都喺位度做自己嘢，或者準備定下晝嘅課堂，但班上嘅氣氛隨住韻喬嘅情緒回復正常，而明顯都比上晝輕鬆咗好多。

隨住放學鐘聲響起，大家都收好野，準備離開班房放學。但就喺呢個時候，韻喬已經揹好書包準備走。





但係禮謙突然之間喺門口截住韻喬「啊，小喬呀，阻住你真係唔好意思。不過我想請問你呢，聽日你放學之後，得唔得閒呀？」
 
「聽日放學之後？我應該唔係好得喎！做咩事呀禮謙？」經過lunchtime天殷同俊軒嘅解釋之後，而且自己早就應承過俊軒，會陪佢屋企出席郭氏派對，所以韻喬都大概估到，禮謙係因咩事而搵自己。

但都決定聽一聽禮謙點樣包裝，所以就講出上面嘅說話。
 
「係咁嘅小喬，喺聽日放咗學之後，我想邀請你同我出席一個party，係同埋我屋企一齊去嘅，如果小喬你ok嘅話，就放學喺班房等我啦！」禮謙此時都唔知道，韻喬早就已經答應咗俊軒出席。
 
「咦，又會咁啱都係聽晚嘅？禮謙我想問，你所講嘅party，應該唔係好似係姓郭嗰個有錢人家搞嘅party掛？」韻喬專登喺度反問禮謙，向對方暗示自己已經知道呢個場合嘅存在。
 
「呃……小喬係…係聽晚呀，而且主人家的確係姓郭嘅。不過，點解你會知道呢個party咖嘅内容嘅？係咪其實之前已經有其他人同咗你講啦？」禮謙做出一個不可思議嘅表情，心諗點解平時都唔會出席呢類場合嘅韻喬，會一早知道咁多詳情。

（待續 ~）

IG link https://instagram.com/bear_big_big_writer