《愛在。貴族學園》: Ch 16 ~ 麻煩的一天 Part 8

Ch 16 ~ 麻煩的一天 Part 8（連載日期：2022/05/30）

過多一陣，冇目擊呢場大戰嘅天殷，就去完搵老師返到嚟班房。而同一時間，韻喬都去完洗手間返到班房，喺坐低之後......

「殷殷呀，今日不如我同你食lunch好唔好呀？而且唔好同禮謙、俊軒佢地兩個食」韻喬稍為下一下氣之後講。
 
天殷眼仔碌碌之後就好興奮咁話「好呀喬喬！我地都好耐冇試過兩個食啦，咁我地出唔出去食好呢？」不過天殷都冇問韻喬點解，但從遠處嘅俊軒同禮謙所見，大家都冇計傾，而且三個人塊面都好黑。

所以天殷好快都都估到，最少兩個男仔頭先有嗌交。但天殷就估唔到韻喬都有嗌埋一份……
 




「嗯……其實出去食我都可以呀。不過我都係啱啱好返，都唔知有咩係可以啱我食啫……」韻喬垂頭喪氣咁講。
 
「下，唔好勉強自己諗啦喬喬。如果你真係諗唔到嘅話，咁就留返喺canteen度食囉，不過……喬喬你好似做咩突然之間唔開心咁嘅？明明今朝你仲好開心咖？！」天殷注意到韻喬若有所思嘅樣，就趁機關心一下好姐妹「記得有咩唔開心都要同我講喎！知道未呀？」
 
「知道啦殷殷，不過我冇事，上堂先啦…」韻喬講完就趁機伏喺枱上面休息一下，而天殷就黑起自己口面，望向俊軒同禮謙，因為之所以可以搞到韻喬突然之間咁唔開心，好大機會都係因為呢兩個男仔所做嘅嘢有關。

之後上堂嘅時候，呢四個人都冇再有任何交流。而5A班房嘅氣氛，都因為頭先佢地幾個嘅事，而充斥住一股高壓氣場，大家上堂都變得好安靜，而且大家都好怕因為多事，或者講錯嘢而畀韻喬閙。

好唔容易先嚟到lunchtime，韻喬同天殷最後都決定留喺學校食飯，所以佢地好快就買完飯。





買完食物坐低之後，韻喬依然都仲係悶悶不樂，粒聲唔出咁慢慢喺度食自己嘅米粉。
 
「喬喬？做咩頭先小息之後，突然之間冇哂精神咁嘅？你係咪仲覺得唔舒服或者好攰呀？」明明又係話想同天殷girls’ talk，但偏偏自己又唔出聲，所以天殷就好擔心韻喬嘅情況，而先開口問侯一下對方。

當然，天殷都下意識咁，先摸下韻喬嘅額頭，因為天殷都怕韻喬又發燒。而且如果依家發燒嘅話，基本上韻喬就要返入醫院繼續治療。
 
「我……我冇唔舒服呀殷殷。但係我就覺得嗰兩隻嘢，今日好似好奇怪咁囉！」韻喬一邊食米粉，終於都一邊開口講。
 
「你話軒仔同禮謙兩個？係啦喬喬呀，做咩今日我地唔同兩位男士食飯嘅？始終佢地呢個幾禮拜，都有份照顧你咖喎，喬喬你唔使還返人情畀佢地兩個咩？」天殷夾起雞肉嘅時候問韻喬。
 




「唉，我都知人情就梗係要還啦，只不過……」聽完天殷咁問，韻喬再一次陷入沉思當中，而天殷都忍唔住問落去...

「不過咩呀喬喬？不如你慢慢講啦，我可以一邊食一邊聽你講。」過咗一陣韻喬都終於繼續開口，將頭先喺小息嘅事講埋落去……
 
「頭先小息，你去咗staff room搵老師嗰陣，禮謙首先過嚟話想同我兩個人單獨出去食飯，就當係慶祝我出院之後第一日返學咁......」

「咁我就覺得無所謂啦，難得有嘢開心嘛，但就喺我想應承禮謙嘅時候，林俊軒佢又走埋嚟，話我應該同佢而唔係同禮謙食先係喎……」

「之後佢地兩個就不停咁疲勞轟炸我，係都叫我要兩個揀一個，初時我都只係覺得煩而黑面，等佢地識得自動波收聲......」

「但佢地都係繼續喺度嘈而見唔到我已經黑面。最後我真係頂唔順，所以就喺班房裏面發脾氣，話兩個我都唔會陪。所以就變成依家得我同你食囉。」韻喬講講下對眼都開始紅。
 
天殷聽到之後，於是就放低筷子，然後去到韻喬身邊抱一抱韻喬「喬喬乖，冇事。佢地兩個咁樣做又係過分咗嘅，一陣間食完飯支付，我會再搵機會同佢地兩個講咖啦。信我啦喬喬,ok？」
 
「殷殷，其實你可唔可以講哂畀我知，到底佢地兩個呢幾日發生咗咩事？今朝我聽到文曦講俊軒嘅時候，你就突然之間閘住咗文曦，叫佢唔好講落去……」韻喬充滿疑問咁問天殷，然後又繼續食米粉。




 
「咁到底小軒佢……發生咗咩事？」

（待續 ~）

IG link https://instagram.com/bear_big_big_writer