《愛在。貴族學園》: Ch 15 ~ 告白 Part 12

Ch 15 ~ 告白 Part 12（連載日期：2022/04/29）

不過，韻喬隔咗一陣都冇答到天殷，於是就即刻望一望韻喬。天殷好快就注意得到韻喬塊面已經紅咗，而且心情都好似麻麻，所以都有小小緊張咁問......

「喬喬，你做咩咁嘅樣又唔出聲嘅？你唔舒服呀定發生咩事呀？」之後天殷仲即可摸一摸韻喬嘅額頭。

「啊…哦…我個人應該就冇咩唔舒服啦，而且依家我喺醫院，我真係有咩唔舒服嘅話，都會搵姑娘幫我睇下啦。但係…..」韻喬過咗一陣終於肯同天殷講，但偏偏又喺度欲言又止。
 
「但係啲咩呀，喬喬？」天殷即刻就好擔心咁追問，皆因韻喬依家個樣有少少奇怪「哎呀你唔好講啲唔講啲啦。喬喬你乖啦，慢慢話畀我知做咩突然之間唔開心，突然之間冇哂心機咁嘅？」
 




「今日……禮謙同小軒佢地兩個，都各自話自己鍾意我，話想同我一齊。然後佢地又話咩一定會令我鍾意佢地咁……唉呀成件事好奇怪呀！唔想再講呀！」韻喬隔咗一陣，就壓低自己嘅聲線同天殷講，同時塊面就紅得更誇張。

事先知道兩個男仔都會表白嘅天殷，為咗交戲畀韻喬睇，面部表情都變得愕然，而心裏面就梗係想食花生，順便都叫咗出嚟「下？唔係呀嘛！佢地兩個都揀今日同你表白呀？！」
 
「咪就係兩個都係今日表白囉，唉，我都唔知佢地兩個最近發生咩事……」韻喬一面不知所措咁講「我聽完之後，仲以為自己喺度發夢，於是我喺俊軒面前，打咗自己一巴，等自己清醒下」
 
「哈哈！你個傻瓜暴力狂，邊有人會咁樣自己打自己咖！？喂你唔覺得痛咖咩張韻喬？」

「痛咖！所以咪肯定係真咖囉！」韻喬講完之後，天殷就隨即哈哈大笑，然後再好認真咁望住韻喬。





「嗱，趁依家人少少，又得我地兩個喺度。咁我就想問下你啦，既然佢地兩個都同你表咗白啦，咁你自己又聽咗佢地鍾意你嘅理由啦，最後你自己有冇話鍾意邊一個多啲呀？」天殷覺得依家就係講呢啲嘅好時機，所以就追問仲喺度怕醜嘅韻喬。

但係韻喬就好似有少少不知所措「唉，我就係唔知呀。我對佢地兩個，一直都只有朋友嘅嗰種鍾意，而唔係情侶嗰種鍾意。而且我都冇拍過拖，我自己都唔知道咩係鍾意」韻喬即刻頭耷耷，又面紅紅咁講。
 
「好啦，唔緊要啦，咁我再換個方法問嘞，如果係朋友嗰種鍾意都算嘅話，咁喬喬你又會鍾意邊一個多啲呢？」雖然表面上係想幫韻喬，但係實際上，天殷再度發揮八婆仔嘅本色，目的就係要韻喬講出心中説話。
 
「嗯……如果，朋友嘅鍾意都算嘅話，我諗我應該會係鍾意禮謙多啲掛！唉呀我唔知呀，我覺得呢啲嘢好煩呀！！」天殷聽到韻喬話係鍾意禮謙多啲之後，成個人都震咗一震，因為韻喬嘅答案出乎天殷意料。
 
原因就係其實天殷自己對禮謙一直都有好感，一直好想等禮謙追求自己。





但係，如果韻喬都鍾意禮謙嘅話，自己就可能會同韻喬成為競爭對手。但天殷自己就平日所見，韻喬同俊軒對話相對於禮謙，都比較有感覺。

於是天殷再質疑韻喬嘅説法而提出問題「你肯定你真係鍾意禮謙多過俊軒？」天殷一邊抄notes一邊問韻喬。

「會唔會其實只係因為你自己睇唔過眼俊軒之前flirt女嘅行為，所以你先話自己鍾意禮謙多啲咋話？」
 
「我……我梗係唔係啦！又係林…林俊軒個衰人，自己成日都話我暴力，佢又點會真係鍾意我先得咖！頭先仲無端端話我可愛添呀，都唔知佢想點就真！」韻喬一臉正經咁反駁天殷。
 
「但係喬喬呀，無論點都好，鍾意一個人嘅話，就一定要順從自己嘅心，同埋一定要睇清楚個男仔嘅内在呀，唔好單憑外在或者平日嘅行為去斷定一個人，呢個只不過屬於其中一個要考慮嘅範疇，最重要一定要自己覺得舒服呀。」天殷好語重心長咁講，就係因為天殷都知道韻喬其實冇同自己坦白。

「而且，我地係好朋友嚟咖，我都想你幸福咖喬喬！」

（待續 ~）

IG link https://instagram.com/bear_big_big_writer